ގަވައިދާ ހިލާފަށް ރާއްޖޭގައި ދިރިއުޅެމުންދަނިކޮށް ހައްޔަރުކޮށްފައިވާ ޖޯން ސޭފަޓް ޑީޕޯޓްކޮށްލައިފި އެވެ.

އިމިގްރޭޝަންގެ އިންފޮމޭޝަން އޮފިސަރ ހަސަން ހަލީލު  ވިދާޅުވީ، ޗާލްސް ޖޯން ސޭފަޓް ޑީޕޯޓްކޮށްލާފައި ވަނީ ހޯމަ ދުވަހުގެ ރޭގެ ވަގުތެއްގައި ކަމަށެވެ.

އޭނާ ޑީޕޯޓްކޮށްލާފައިވަނީ 10 އަހަރަށް ކަމަށް ހަލީލު ވިދާޅުވި އެވެ. ހަލީލު ވިދާޅުވީ، މިއީ އާއްމުކޮށް މިފަދަ މައްސަލަތަކުގައި ރާއްޖެއިން ޑީޕޯޓުކުރާ މުއްދަތު ކަމަށެވެ.

އެމެރިކާގެ ރައްޔިތެއް ކަމުގައިވާ ޖޯން ޑީޕޯޓްކޮށްލާފައިވާ އިރު  ޖޯންއާގެ މައްސަލަތަކެއް ރާއްޖޭގެ ކޯޓުތަކުން ވަނީ ބަލާފަ އެވެ. އެގޮތުން، ވަކީލު ޗަމްބާސް އެލް އެލް ޕީގެ ނަމުގައި ހިންގާ  ލޯފާމަކަށް 2،500 އަށް ވުރެ ގިނަ ޑޮލަރު ދެއްކުމަށް ޖޯންގެ މައްޗަށް ސިވިލް ކޯޓުން ވަނީ މިދިޔަ ޑިސެމްބަރު މަހު ހުކުމްކޮށްފަ އެވެ.

މީގެ އިތުރުން ސިވިލް ކޯޓުން ބެލި އެހެން މައްސަލައެއްގައި 42،000 ޑޮލަރު ޖޯން އަށް ދެއްކުމަށް އޭނާ އާއި  އެކު ވިޔަފާރީގައި އުޅުނު ވ. ފުލިދޫ، ޑޭޒީމާގޭ އަބްދުލްހަސީބް މުހައްމަދުގެ މައްޗަށް ހުކުމްކޮށްފައި ވެއެވެ. އަދި މި މައްސަލައިގައި ފައިސާ ލިބިފައިނުވުމާ އެކު ޖޯންގެ ފަރާތުން އެ މައްސަލަ ހައިކޯޓަށް ހުށަހެޅުމުން ވަނީ އެ މައްސަލަ ބާތިލްކޮށް އެ އަދަދަށްވުރެ މަދު އަދަދެއް ޖޯން އަށް ދިނުމަށް ހައިކޯޓުން ހުކުމްކޮށްފަ އެވެ.

ގަވައިދާ ހިލާފަށް ރާއްޖޭގައި ދިރިއުޅެމުން ދިޔަ ކަމަށް ބުނެ ހައްޔަރުކޮށްފައިވާ ޖޯން ދިވެހި ބަޔަކާއި އެކު ގެސްޓް ހައުސް ވިޔަފާރިއެއް ފެށި ނަމަވެސް އެކަމުގައި ބައިވެރި މީހުން ޖޯން އަތުން ފައިސާ އަތުލައި، ޕާސްޕޯޓް ވަގަށް ނަގާފައިވާ ކަމަށް ޖޯންގެ ވަކީލުން މީގެ ކުރިން ވަނީ ހާމަކޮށްފަ އެވެ.

ޖޯން އިމިގްރޭޝަނުގެ ބެލުމުގެ ދަށަށް ގެންގޮސްފައި ވަނީ މިދިޔަ ޖެނުއަރީ މަހުގެ 16 ގަ އެވެ. އިމިގްރޭޝަނުން އޭނާ ހައްޔަރުކޮށްފައި ވަނީ ވިސާނެތި ރާއްޖޭގައި ދިރިއުޅެމުންދާތީ ކަމަށް ބުނެއެވެ.