ރާއްޖޭގެ ސީނިއަރ ގައުމީ ކްރިކެޓް ޓީމްގެ މެނޭޖަރަކަށް އިބްރާހީމް ޝާޒް ހަބީބު ހަމަޖައްސައިފިއެވެ.
ކްރިކެޓް ޓީމްގެ މެނޭޖަރަކަށް ހަމަޖެއްސި ޝާޒްއަކީ ކުރިން ނިއުރޭޑިއަންޓްގެ ފުޓްބޯޅަ ޓީމްގެ މެނޭޖަރުކަން ކުރިފަރާތެކެވެ. އަދި އޭނާ ވަނީ ގައުމީ ކްރިކެޓް ޓީމާއި, ބައެއް ކްލަބްތަކަށްވެސް ކުޅެފައެވެ. ގައުމީ ކްރިކެޓް ބޯޑުން މިއަދު ވަނީ ސީނިއަރ ޓީމުގެ އައު މެނޭޖަރަކަށް ޝާޒް ހަމަޖެއްސިކަން އިއުލާންކޮށްފައެވެ. ޝާޒް ގައުމީ ޓީމުގެ މެނޭޖަރުކަމަށް ހަމަޖެއްސީ އަންނަ މަހު މެލޭޝިޔާގައި އޮންނަ މުބާރާތަކަށެވެ. ޖުލައި 1 ވަނަ ދުވަހު ފަށާ މި މުބާރާތުގައި ރާއްޖެއާއި މެލޭޝިޔާގެ އިތުރުން ވާދަކުރަނީ ތައިލެންޑާއި ބޫޓާނެވެ.
މެނޭޖަރ ޝާޒް ބުނީ މިއީ ރާއްޖެއިން އިސްނަގައިގެން, ރާއްޖެއިން އެދިގެން ބާއްވާ މުބާރާތެއްކަމަށެވެ. ނަމަވެސް މުބާރާތް ރާވައި ހިންގުމުގެ ކަންކަން ކުރަނީ މެލޭޝިޔާއިންކަމަށެވެ. މުބާރާތުގެ ކުރިން މިމަހު ތަމްރީނު ހޯދަން ސްރީލަންކާގައި ރާއްޖޭގެ ގައުމީ ޓީމް ކޭމްޕްކުރުމަށް ވަނީ ހަމަޖެހިފައެވެ.
