ސިވިލް ކޯޓުގެ ގާޒީ މަރިޔަމް ވަހީދު އަށް ރާއްޖޭގެ އެއްވެސް ކޯޓެއްގައި ޝަރީޢަތް ކުރުމުގެ ހައިސިއްޔަތު ލިބިގެން ނުވާ ކަމަށް ނިންމައި ސުޕްރީމް ކޯޓުން މަރިޔަމް ވަހީދު ފަނޑިޔާރު ކަމުން ވަކިކުރި ނަމަވެސް މަރިޔަމް ވަހީދުއަކީ އަދިވެސް ސިވިލް ކޯޓުގެ ގާޒީއެއް ކަން ހާމަވެއްޖެއެވެ.

ޖުޑިޝަލް ސާވިސް ކޮމިޝަންގެ ވެބް ސައިޓުގައި އާންމު ކޮށްފައި ދިވެހިރާއްޖޭގެ ފަނޑިޔާރުންގެ ލިސްޓުގައި އަދި ވެސް މަރިޔަމް ވަހީދުގެ ނަން ހިމެނެއެވެ. އެގޮތުން ޖޭއެސްސީގެ ފަނޑިޔާރުންގެ ލިސްޓުން ދައްކާ ގޮތުގައި މަރިޔަމް ވަހީދު އަކީ އަދިވެސް ސިވިލް ކޯޓުގެ ގާޒީއެކެވެ.

މިކަމާ ގުޅިގެން ޖޭއެސްސީގެ މީޑިއާ އޮފިޝަލް އަށް ގުޅާލުމުން ވިދާޅުވީ ޖޭއެސްސީން މަރިޔަމް ވަހީދު ފަނޑިޔާރު ކަމުން ވަކިކޮށްފައި ނުވާ ކަމަށާއި އަދި ފަނޑިޔާރުން ވަކިކުރުމުގެ ބާރަކީ ޖޭއެސްސީ އަށް ލިބިގެންވާ ބާރެއް ނޫން ކަމަށް މީޑިއާ އޮފިޝަލް ވިދާޅުވިއެވެ.

ސުޕްރީމް ކޯޓުން މަރިޔަމް ވަހީދު ފަނޑިޔާރުކަން ކުރުމުގެ ހައިސީއްޔަތު ނެތް ކަމަށް ކަނޑައަޅާފައިވާތީ އެކަމާ ގުޅިގެން ސުވާލު ކުރުމުން ޖޭއެސްސީގެ މީޑިއާ އޮފިޝަލް ވިދާޅުވީ އެ މައްސަލާގައި މީގެކުރިން ޖޭއެސްސީން ގޮތެއް ނިންމާފައިވާނެ ކަމަށެވެ.

ގާޒީ މަރިޔަމް ވަހީދު އަށް މުސާރަ ދެމުންދާ ކަމަށް ދެކެވޭ ވާހަކަތަކާ ގުޅިގެން ސުވާލުކުރުމުން ޖޭއެސްސީގެ އޮފިޝަލް ވިދާޅުވީ ފަނޑިޔާރުންނަށް މުސާރަ ދިނުމުގެ ކަންތައްތަކަކީ ޖޭއެސްސީން ބަލަހައްޓާ ކަންތައްތަކެއް ނޫން ކަމަށާއި އަދި އެއީ ޖޭއެސްސީގެ އިހްތިސާސްތަކުގެ ތެރޭގައި ހިމެނޭ ކަމެއް ނޫން ކަމަށް އޮފިޝަލް ވިދާޅުވިއެވެ. އަދި ވިދާޅުވީ ކޮންމެ ކޯޓެއްގެ ވެސް ފަނޑިޔާރުންގެ މުސާރަ ދޭނީ އެ ކޯޓަކުން ކަމަށާއި އަދި އެކަންކަން ބަލަހައްޓާނީ ޖުޑިޝަލް އެޑްމިނިސްޓްރޭޝަންއިން ކަމަށް އޮފިޝަލް ވިދާޅުވިއެވެ.

ގާޒީ މަރިޔަމް ވަހީދުގެ މައްސަލައިގައި ޖޭއެސްސީން ބޭއްވި ބައްދަލުވުމުގައި ނިންމާފައިވަނީ، ގާނޫނުގައި ކަން އޮތް ގޮތް ބަޔާންކޮށް ސުޕްރީމް ކޯޓުން ނިންމާ ނިންމުންތަކަކީ އެންމެ ފަހުގެ ނިންމުން ކަމަށް ވާއިރު، ގާޒީ މަރިޔަމް ވަހީދު ރާއްޖޭގެ ކޯޓުތަކުގައި ވަކާލާތު ކުރުމުގެ ޝަރުއިއްޔަތާއި އަހުލިއްޔަތާއި ވިލާޔަތު ގެއްލިފައިވާ ކަމަށް ކަނޑައަޅާފައިވާ ކަނޑައެޅުމާ ގުޅިގެން، އެ ކޮމިޝަނުން އަޅަންޖެހޭ ފިޔަވަޅެއް އޮތް ކަމަށް ނުފެންނަ ކަމަށެވެ.

ސިވިލް ކޯޓުގެ ގާޒީ މަރިޔަމް ވަހީދު އަށް މުސާރަ ދޭކަން ސާފުކުރުމަށް ސިވިލް ކޯޓަށް ގުޅުމުން އެ ކޯޓުގެ މީޑިއާ އިފިޝަލް ވިދާޅުވީ އެކަމާ ގުޅޭ ގޮތުން ސިވިލް ކޯޓުން އެއްވެސް ކޮމެންޓެއް ކުރަން ބޭނުން ނުވާ ކަމަށެވެ.

މިކަމާ ގުޅިގެން ޖުޑިޝަލް އެޑްމިނިސްޓްރޭޝަންގެ ތަރުޖަމާން ފާތިން އަށް ގުޅާލުމުން ވިދާޅުވީ މައުލޫމާތު ސާފް ކުރުމަށް ފަހު ގުޅާނެ ކަމަށެވެ. ފަހުން ރާއްޖެއެމްވޫން ގުޅި ނަމަވެސް ފަތިން ފޯނަށް ޖަވާބް ދެއްވާފައެއް ނުވެއެވެ.

ސުޕްރީމް ކޯޓުގެ އަމުރުގައި ބުނެފައި ވަނީ ވ. ބޮޑުމޮހޮރާ ޓޫރިސްޓް ރިސޯޓެއްގެ ގޮތުގައި ތަރައްގީ ކުރުމަށް ކުއްޔަށް ދިނުމަށް އެއްބަސްވުމަކަށް ވާސިލުވުމަކީ ސަރުކާރަށް ލިބިފައިވާ އިޚްތިޔާރީ ބާރެއް ކަމަށް އެ ކޯޓުން ކަނޑައަޅާފައިވަނިކޮށް، ހަތް ދުވަހުގެ ތެރޭގައި އެގްރީމެންޓްގައި ސޮއިކުރުމަށް ލާޒިމްކޮށް ގާޒީ މަރިޔަމް ހުކުމް ކޮށްފައިވާތީއެވެ.

މީގެ އިތުރުން އެ އަމުރުގައި ބުނެފައިވަނީ އެފަދަ އެއްބަސްވުމެއްގައި ސޮއިކުރުމަށް ސަރުކާރުގެ މައްޗަށް މަޖުބޫރުކުރާ ނުވަތަ ލާޒިމްކުރާ ގާނޫނީ އެއްވެސް އަސާސެއް ނެތް ކަމަށެވެ.

ގާނޫނު އަސާސީގެ 145 ވަނަ މާއްދާ އާއި 143 ވަނަ މާއްދާގެ (ރ) އާއި ފަނޑިޔާރުންގެ ގާނޫނުގެ 30 ވަނަ މާއްދާ އާއި ކޯޓުތަކުގެ ގާނޫނުގެ 20 ވަނަ މާއްދާ އާއި 22 ވަނަ މާއްދާ އާއި ސުޕްރީމް ކޯޓުގެ ގަވާއިދުގެ 86 ވަނަ މާއްދާއަށް ރިއާޔަތްކޮށް، ރާއްޖޭގެ ކޯޓުތަކުގައި ޝަރީއަތް ކުރުމުގެ ޝަރުއިއްޔަތާއި އަހުލިއްޔަތާއި ވިލާޔަތު، މަރިޔަމް ވަހީދުގެ ކިބައިން ގެއްލިފައިވާ ކަމަށް ކަނޑައަޅާ ކަމަށް ސުޕްރީމް ކޯޓުގެ އަމުރުގައި ވެއެވެ.

ފަނޑިޔާރުންގެ ގާނޫނުގެ 35 ވަނަ މާއްދާގައި ބުނެފައިވާ ގޮތުން ފަނޑިޔާރުންނާ މެދު ފިޔަވަޅު އެޅުމުގެ ބާރަކީ ޖޭއެސްސީގެ އިހުތިސާސްގައި ހިމެނޭ ކަމެކެވެ.

މީގެ އިތުރުން ފަނޑިޔާރުންގެ ގާނޫނުގެ 22 ވަނަ މާއްދާގައި ބުނެފައިވަނީ ފަނޑިޔާރުކަމުގެ މަގާމުގައިހުރި މީހަކު މަގާމުން ވަކިކުރެވޭނީ ފަނޑިޔާރުކަމުގެ މަގާމަށް އެ މީހަކު ގާބިލުނޫން ކަމަށް ނުވަތަ އެ މަގާމަށް އެކަށީގެންނުވާފަދަ އަމަލެއް އެ ފަނޑިޔާރަކު ކޮށްފައިވާކަމަށް ޖޭއެސްސީ އަށް ގަބޫލުކުރެވިގެން، އެ ފަނޑިޔާރަކު މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހަޅައި، މަޖިލީހުގައި ނަގާ ވޯޓުގައި ބައިވެރިވާ މެންބަރުންގެ ތިންބައިކުޅަދެބައިގެ އަޣުލަބިއްޔަތުން ފާސްވުމުން ކަމަށެވެ.

މީގެ އިތުރުން ފަނޑިޔާރުންގެ ގާނޫނުގެ ނުވަ ވަނަ މާއްދާގައި ބުނެފައި ވަނީ، ފަނޑިޔާރަކު އޭނާގެ މަގާމުގެ މަސްއޫލިއްޔަތާއި ވާޖިބު އަދާކުރުމުގައި ދިން ރައުޔަކާ ގުޅިގެން ނުވަތަ ކުރި އަމުރަކާ ގުޅިގެން ނުވަތަ ކުރި ހުކުމަކާ ގުޅިގެން، ގާނޫނު އަސާސީ އާއި ގާނޫނުގައި ބަޔާންވެގެންވާ އިސްތިއުނާފު ކުރުމުގެ އުސޫލުތަކުގެ ބޭރުން ނުވަތަ ފަނޑިޔާރުންގެ ސުލޫކާ ގުޅޭގޮތުން ފިޔަވަޅު އެޅުމަށް ގާނޫނު އަސާސީ އާއި ގާނޫނުގައި ބަޔާންވެގެންވާ އުސޫލުތަކުގެ ބޭރުން، އެއްވެސް ފަރާތަކުންއެ ފަނޑިޔާރަކު ޖަވާބުދާރީއެއް ނުކުރެވޭނެ ކަމަށެވެ.

އެޓާނީ ޖެނެރަލް އޮފީހުން ހުށަހެޅި މައްސަލައަކާ ގުޅިގެން ސިވިލް ކޯޓުން ގާޒީ މަރިޔަމަށް ފިޔަވަޅު އެޅި އިރު، ފަނޑިޔާރުންގެ ގާނޫނުގެ 37 ވަނަ މާއްދާގައި ވާގޮތުން، ފަނޑިޔާރެއްގެ ތައުދީބީ މައްސަލަތައް ހުށަހަޅަންޖެހެނީ، ކުރެވިފައިވާ ތުހުމަތުތަކާއި އެ ތުހުމަތަށް ތާއީދު ދެނިވި ހެކިތަކާއެކު، އެކަމަށް ކަނޑައެޅިފައިވާ ފޯމަކުން ޖޭއެސްސީ އަށެވެ. އަދި އެފަދަ މައްސަލައެއް ޖޭއެސްސީގައި ތަހުގީގު ކުރާއިރު، އެ ފަނޑިޔާރަކު މައްސަލައިގައި ބުނާ އެއްޗެއް ހޯދުމަށް އަޑުއެހުމެއް ބޭއްވުމަށް ފަހު، މައްސަލައިގެ ބާވަތަށާއި، ފަނޑިޔާރަކު މައްސަލައިގައި ބުނާ އެއްޗަކަށް ރިއާޔަތްކޮށް އެ ފަނޑިޔާރަކު ވަޒީފާ އަށް ނުނިކުމެ މަޑުކުރުމަށް އެންގިދާނެ ކަމަށެވެ.

ގާޒީ މަރިޔަމް ވަހީދަށް ފިޔަވަޅު އެޅި އިރު އާންމު އުސޫލެއްގެ ގޮތުގައި މައްސަލައެއް ކޯޓަށް ބަލައިގަތުމަށް ނިންމަނީ ރަޖިސްޓްރާއެވެ. އަދި އެ މައްސަލަ ގާޒީއާ ހަވާލުކުރާނީ ފަނޑިޔާރުންގެ މަޖިލީހުން އިސް ގާޒީއެވެ.