ކުރިޔަށް އޮތް ހޫނު މޫސުމާ ދިމާކޮށް ޔޫރަޕުން މިހާރު ފެންނަމުން އަންނަ މަންކީޕޮކްސްގެ ކޭސްތައް އިތުރުވެދާނެކަމުގެ ކަންބޮޑުވުން ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ)ގެ ޔޫރަޕިއަން ޗީފް ހާންސް ކްލޫގް ފާޅުކުރައްވައިފިއެވެ.

ހޫނު މޫސުމާ ދިމާކޮށް ގިނަ އަދަދެއްގެ ބަޔަކު އެއްތާކަށް އެއްވެގެން ބާއްވާ ޕާޓީތަކާއި ފެސްޓިވަލްތަކާއި އެހެނިހެން ހަރަކާތްތައް އިތުރުވެގެންދާނެއެވެ. އެއާއެކު ކޭސްތައް އިތުރުވެދާނެކަމަށް ހާންސް ވިދާޅުވިއެވެ. ހާންސް އިތުރަށް ވިދާޅުވީ، މިހާރު ފެންނަމުންދާ ކޭސްތައް ގިނައިން ފެންނަމުންދަނީ ޖިންސީ ގުޅުމުގެ ތެރެއިން ކަމަށްވާއިރު، ގިނަ ބަޔަކަށް މިބަލީގެ އަލާމާތްތައް އެހާ ބޮޑަށް އަދި ނޭނގޭކަމަށެވެ.

މިހާތަނަށް 9 ގައުމަކުން ވަނީ މަންކީޕޮކްސްގެ ކޭސްތައް ފެނިފައެވެ. އެއީ ބެލްޖިއަމް، ފްރާންސް، ޖަރުމަނު، އިޓަލީ، ނެދަރލެންޑްސް، ޕޯރޗުގަލް، ސްޕެއިން، ސްވިޑްން އަދި އިނގިރޭސިވިލާތެވެ. މީގެއިތުރުން އެމެރިކާ، ކެނެޑާ އަދި އޮސްޓްރޭލިއާއިން ވެސް ވަނީ މަންކީޕޮކްސްގެ ކޭސްތައް ފެނިފައެވެ.

ހުކުރު ދުވަހު ސްޕެއިނުން އަލަށް 24 ކޭސް ވަނީ ފެނިފައެވެ. ގިނަ ކޭސްތަކެއް ފެނިފައިވަނީ މެޑްރިޑު ސަރަހައްދުންނެވެ. މިކޭސްތަކާ ގުޅުންހުރިކަމަށް ބެލެވޭ ސައުނާއެއް ސްޕެއިން ސަރުކާރުން ވަނީ ބަންދުކޮށްފައެވެ.

އިނގިރޭސިވިލާތުން މިހާތަނަށް 20 މީހުންނަށް މަންކީޕޮކްސް ޖެހިފައިވާކަން ވަނީ ޔަގީންވެފައެވެ. ޔޫކޭގެ ހެލްތު ސެކިޔުރިޓީ އެޖެންސީން ބުނާގޮތުގައި މީގެތެރޭގައި ގިނައީ ފިރިހެނުންނެވެ. އޭގެތެރެއިންވެސް އެއްޖިންސުން ގުޅުންހިންގާ މީހުންނެވެ.

ޕޯޗުގަލްއިން ޖުމްލަ 23 ކޭސް ފެނިފައިވާއިރު، ހުކުރު ދުވަހު އެކަނިވެސް 9 ކޭސް ފެނިފައިވެއެވެ.

ކުރިން ފެނިފައިވާ 14 ކޭހަކީ ސެކްޝުއަލް ހެލްތު ކްލިނިކްސް ތަކުން ފެނިފައިވާ ކޭސްތަކެވެ. އުމުރުން 20 އަހަރާ 40 އަހަރާ ދެމެދުގެ މިމީހުންނަކީވެސް އެއްޖިންސުން ގުޅުންހިންގާ ފިރިހެނުންނެވެ.