މިއަހަރުގެ ފަހުކޮޅު ގަތަރުގައި ކުރިއަށް ގެންދިއުމަށް ހަމަޖެހިފައިވާ ފީފާ ވޯރލްޑް ކަޕްގައި އަންހެން ރެފްރީންނާއި އަންހެން އެސިސްޓެންޓް ރެފްރީން ބޭނުންކުރުމަށް ނިންމައިފިއެވެ.
މިއީ ވޯރލްޑް ފިރިހެން ޑިވިޝަންގެ ކަޕެއްގައި އަންހެން ރެފްރީން ބޭނުންކުރާނެ ފުރަތަމަ ފަހަރެވެ. މިއަހަރުގެ ވޯލްޑް ކަޕުގައި ބޭނުންކުރުމަށް މިހާތަނަށް ހަމަޖެހިފައިވަނީ އަންހެން ތިން ރެފްރީންނާއި ތިން އެސިސްޓެންޓް ރެފްރީންނެވެ. ރެފްރީންގެ ގޮތުގައި ބޭނުން ކުރަން ނިންމާފައިވަނީ ސްޓެފަނީ ފްޚާފާޚް، ރުވަންޑަން ސަލީމާ މުކަންސަންގާ އަދި ޔޮޝީމީ ޔަމާޝިތާއެވެ.
ރެފްރީންގެ ގޮތުގައި ބޭނުންކުރަން ނިންމާފައިވާ ސްޓެފަނީ ފްޚާފާޚްއަކީ ޗެމްޕިއަންސް ލީގު މެޗެއްގައި ރެފްރީކަންކުރި އެންމެ ފުރަތަމަ އަންހެން ރެފްރީއެވެ. މީގެ އިތުރުން ޔޫރަޕިއަން ކޮލިފަޔަރގައިވެސް ރެފްރީކަންކޮށްފައިވާ ސްޓެފަނީ ވަނީ ފްރެންޗް ލީގުގެ މެޗުތަކަށްވެސް އިންސާފުކޮށްފައެވެ.
ސަލީމާއަކީ އެފްރިކާ ކަޕް އޮފް ނޭޝަންސްގެ މެޗެއްގައި ރެފްރީކަންކުރި އެންމެ ފުރަތަމަ އަންހެން ރެފްރީއެވެ. އޭނާ މި މުބާރާތުގައި ރެފްރީކަންކުރީ މިއަހަރުގެ ކުރީކޮޅުއެވެ. ޖަޕާނުގެ ޔޮޝީމީ ވަނީ މިއަހަރުގެ ކުރީކޮޅު އޭއެފްސީ ޗެމްޕިއަންސް ލީގުގެ މެޗެއްގައި ރެފްރީކަންކޮށް، މި މުބާރާތަށް އިންސާފުކުރި ފުރަތަމަ އަންހެން ރެފްރީގެ މަގާމު ހޯދާފައެވެ.
އެސިސްޓެންޓް ރެފްރީންގެ ގޮތުގައި ބޭނުންކުރުމަށް ހަމަޖެހިފައި ވަނީ ބްރެޒިލްގެ ނިއުޒާ ބެކް އަދި އެމެރިކާގެ ކެތުރީން ނެސްބިޓްގެ އިތުރުން މެކްސިކޯގެ ޑިއާޒް މެދީނާއެވެ.
ފީފާ ރެފްރީންގެ ކޮމިޓީގެ ޗެއަރމަން ޕިއެރލުއިޖީ ކޮލީނާ ބުނީ، އަންހެން ރެފްރީންތަކެއް މިފަހަރުގެ ވޯރލްޑް ކަޕަށް ނެރެނީ ފީފާ މެންސް ޖޫނިއަރ އަދި ސީނިއަރ މުބާރާތްތަކަށް އިންސާފުކުރުވައި ތަޖުރިބާ ހޯދައިދީގެން ކަމަށެވެ. އަދި ވަކި ޖިންސަކަށް ނިސްބަތްވުމަށްވުރެ މުހިންމީ ކޮލިޓީކަން މިކަމުން ވަރަށް ރަނގަޅަށް ސާބިތުކޮށްދޭ ކަމަށްވެސް އޭނާ ބުންޏެވެ.
މިފަހަރުގެ ވޯރލްޑް ކަޕަށް އެކުލަވާލާފައިވަނީ 36 ރެފްރީންނާއި 69 އެސިސްޓެންޓް ރެފްރީންގެ ޓީމެކެވެ. އަދި ވީއޭއާރު އޮފިޝަލުންގެ ގޮތުގައި 24 އޮފިޝަލުންގެ ޓީމެއް ހަރަކާތްތެރިވާނެއެވެ.
