ޔުއެފާ ޗެމްޕިއަންސް ލީގުގައި ލިވަރޕޫލްއާ ބައްދަލުކުރާ ފައިނަލް މެޗަށް ރެއާލް މެޑްރިޑްގެ ޑޭވިޑް އަލާބާ ފިޓްވާނެކަމަށް ރިޕޯޓުތައް ބުނެފިއެވެ.
އަލާބާއަށް އަނިޔާވީ މުބާރާތުގައި މެންޗެސްޓަރ ސިޓީއާ ބައްދަލުކުރި ސެމީ ފައިނަލުގެ ފުރަތަމަ މެޗުގައެވެ. ނަމަވެސް އަނިޔާއިން ސަލާމަތްވެ ޓީމުގެ ފަރިތަކުރުންތަކުގައި އަލާބާ މިހާރު ވަނީ ބައިވެރިވާން ފަށާފައެވެ. އަދި ސްޕެނިޝް ލީގުގެ ފަހު މެޗުގައި ރެއާލް ބެޓިސްއާ ދެކޮޅަށް ނުކުންނަ މެޗުގައިވެސް އަލާބާއަށް ކުޅެވޭނެކަމަށް ރިޕޯޓުތައް ބުނެއެވެ. މިއީ ޗެމްޕިއަންސް ލީގު ފައިނަލްގެ ކުރިން ރެއާލް ކުޅޭނެ ހަމައެކަނި މެޗެވެ.
އަނިޔާއިން ސަލާމަތްވެ އަލާބާ ޓީމާ ގުޅުމަކީ ކޯޗު ކާލޯ އަންޗެލޯޓީއަށް ލިބޭނެ ވަރަށް ބޮޑު ހިތްހަމަޖެހުމެކެވެ. އަލާބާގެ އިތުރުންވެސް އަނިޔާގައި ތިބި ރެއާލްގެ ހުރިހާ ކުޅުންތެރިންވެސް ޗެމްޕިއަންސް ލީގުގެ ފައިނަލަށް ފިޓްވާނެކަމަށް ރިޕޯޓުތައް ބުނެއެވެ. މީގެ ތެރޭގައި މި ސީޒަން ނިމުމަށްފަހު ޓީމު ދޫކޮށްލާނެ މާސެލޯއާއި ބޭލްވެސް ހިމެނެއެވެ.
މާސެލޯއަކީ ރެއާލްއާއެކު އެންމެ ގިނަ ކާމިޔާބީތައް ހޯދި ކުޅުންތެރިޔާއެވެ. ރެއާލްއިން 14 ވަނަ ފަހަރަށް ޗެމްޕިއަންސް ލީގު ކާމިޔާބު ކުރުމަށް ނިކުންނައިރު، މާސެލޯ ވަނީ ރެއާލްއާއެކު 24 މުބާރާތް ކާމިޔާބުކޮށްފައެވެ. 2007 ވަނަ އަހަރު ރެއާލްއާ ގުޅުނު މާސެލޯއަށް މިފަހަރުގެ ޗެމްޕިއަންސް ލީގު ކާމިޔާބުކޮށްގެން ޖުމްލަ 25 މުބާރާތް ރެއާލްއާއެެކު ކާމިޔާބު ކުރުމުގެ ފުރުސަތު އެބައޮތެވެ.
