ޢީދުގެ މާނައަކީ އުފާވެރިކަމެވެ. މިފަހަރު 1443ގައި މިއަންނަނީ އީދެކެވެ. ފިތުރު އީދެވެ.

އެހެންނަމަވެސް 1441 އަދި 1442ގައި (2020 އަދި 2021ގައި) ކޮވިޑުގެ ބަލިމަޑުގެ ތެރޭގައި އުފާވެރި ދުވަސްތަކެއް އަދި އައިސްފައެއް ނުވެއެވެ.

މިއަންނަ ފިތުރު އީދަކީ އިސްލާމް ދިވެހިރާއްޖެއަށް އަންނަ 896 ވަނަ ފިތުރު އީދެވެ.

ދަރުމަވަންތަ ރަސްގެފާނު (އައްސުލްޠާާން މުޙައްމަދު ބިން ޢަބްދުﷲ) އިސްލާމްވެވަޑައިގެން ރަސްމީގޮތުން ދިވެހިރާއްޖެއަށް އިސްލާމީ ހިދާޔަތުގެ ނޫރު އަލިވިލުނީ 548ގެ ރަބީޢުލްއާޚިރު މަހުގެތެރޭގައެވެ. ދިވެހިންނަށް ނަމާދާއި ރޯދައާއި އިސްލާމީ އީދު ތައާރަފުވީ 548ގައެވެ.

ދިވެހިރާއްޖެއަށް އައި 895 އީދުގެ ތެރެއިން މުސީބާތާއި ނާމާންކަމާއި ބިރުވެރިކަމާއި ހިތްދަތިކަމާއި ތަދުމަޑުކަމާއި ބަލިމަޑުކަމުގެ ދުވަސްވަރު އައި އީދުތަކަށް ބަލާލާއިރު، ފޯޗުގީޒުން ރާއްޖެ އަޅުވެތިކުރި 965ން 981ށް (މީލާދީން) ޕޯޗުގީޒުންގެ ކޮންޓުރޯލުގެ ދަށުން ފާހަގަކުރެވުނު އީދުތައް ހިމެނެއެވެ. (ތިލަދުންމަތީ ބައުރަށުގައި މިގޮތުން ފާހަގަކުރެވުނު ބައެއް އީދުގެ އިހުތިފާލުތަކުގައި ބޮޑުތަކުރުފާނު ބައިވެރިވެވަޑައިގެންފައިވެއެވެ.)

މިމުއްދަތު ހިޖުރީގޮތުން ބަލާއިރު 17 ވަރަކަށް އަހަރު ކަމަށްވާތި އެ 17 ވަރަކަށް އަހަރުގެ އީދުތަކެވެ. އަދި ފުރަތަމަ ބޮޑުހަނގުރާމައިގެ ތަދުމަޑުކަމުގައި މީގެ 110 އަހަރުކުރިން 1320ގެ އަހަރުތައް (މީލާދީން 1914 - 1918) ހިޖުރީގޮތުން 5 އަހަރުގެ އީދުތަކެވެ.

ހަމައެފަދައިން، ދެވަނަ ބޮޑުހަނގުރާމައިގެ ތަދުމަޑުކަމާއި ބަލިމަޑުކަމުގައި 1358ން 1372 (މީލާދީން 1939 - 1953) އަދި ފުރަތަމަ ޖުމުހޫރިއްޔާ ނިމުމާ ހަމަޔަށް 14 އަހަރުގެ އީދުތަކެވެ.

ދެން، ކޮވިޑުގެ ވަބާގައި 1441، 1442ގެ ކުޑައީދު ބޮޑުއީދެވެ. ވީމާ، ފާއިތުވި 895 އަހަރުގެ ތެރެއިން 40 ވަރަކަށް އަހަރުގެ އީދުތައް ހިތާމަވެރިކަމުގައެވެ.