ބައިނަލްއަޤްވާމީ ރަހުމަތްތެރިކަމުގެ މެޗެއްގައި ރޭ އަލްބޭނިޔާ އަތުން ސްޕެއިން އުނދަގޫ މޮޅެއް ހޯދައިފިއެވެ. މެޗުން ސްޕެއިން މޮޅުވީ 2-1 ނެވެ.

މެޗު 1-1 ން އެއްވަރުވާން ދަނިކޮށް, ސްޕެއިން މެޗުން މޮޅުކޮށްދިން ލަނޑު އިތުރުވަގުތުގައި ޖެހީ ޑެނީ އޮލްމޯއެވެ. މެޗުގެ ފަހު 15 މިނިޓްގައި ލަނޑުތައް ފެނުނު މެޗުގެ ފުރަތަމަ ލަނޑު ޖަހާ ސްޕެއިންއަށް ކުރި ހޯދައިދިނީ ފެރަން ޓޮރޭޒްއެވެ. އޭނާ ލަބޑުޖެހީ 75 ވަނަ މިނިޓްގައެވެ. އެކަމަކު 85 ވަނަ މިނިޓްގައި އުޒޫނީ ލަނޑު ޖަހާ އަލްބޭނިޔާއަށް ނަތީޖާ ހަމަހަމަކޮށްދިނެވެ. އޭނާ ކުޅެން ނިކުތީވެސް ބަދަލުކުޅުންތެރިއެއްގެ ގޮތުގައެވެ.

ސްޕެއިންގެ ދަނޑުގައި ކުޅުނު މެޗުގައި އަލްބޭނިޔާއަށް އެޓޭކްތައް ނުއުފެއްދުނަސް ކައުންޓަރ އެޓޭކްގައި ކޮންމެސްވަރަކަށް ސްޕެއިންއަށް އުނދަގޫކުރިއެވެ. ރޭ ކުޅުނު ބައިނަލްއަޤްވާމީ ރަހުމަތްތެރިކަމުގެ އެހެން ބައެއް މެޗުތަކަށް ބަލާއިރު ކޮރޭޝިޔާއާއި ސްލޮވޭނިޔާ ވާދަކުރި މެޗު ނިމުނީ 1-1 ން އެއްވަރުވެގެންނެވެ. އިންގްލެންޑް ވަނީ 2-1 ން ސްވިޒަރލެންޑް ބަލިކޮށްފައެވެ.