އަފްޣާނިސްތާނުގެ ހައި ސްކޫލްތައް އަންހެން ކުދިންނަށް ބަންދުކުރިތާ ހަތް މަސްފަހުން ހުޅުވާލިތާ ގަޑިއިރުތަކެއްފަހުން މުއްދަތެއް ނެތްގޮތަށް އަނެއްކާވެސް ބަންދުކޮށްފިއެވެ.
އަފްޣާނިސްތާނުގައި ވެރިކަން ކުރަމުން އަންނަ ތާލިބާން ސަރުކާރުން ބުދަ ދުވަހު ހައި ސްކޫލްތައް އަންހެން ކުދިންނަށް ހުޅުވާލާނެކަން އިއުލާންކޮށްފައިވަނީ މިދިޔަ ހަފްތާއެވެ. އޭގެފަހުން އަންގާރަ ދުވަހު ތާލިބާން ސަރުކާރުގެ އެޑިޔުކޭޝަން މިނިސްޓްރީގެ ސްޕޯކްސްމަން ވަނީ ކުދިންނަށް މަރުޚަބާ ކިޔާ ވީޑިއޯއެއްވެސް އާންމުކޮށްފައެވެ.
ނަމަވެސް ބުދަ ދުވަހު ކުދިން ސްކޫލަށް ދިޔުމުން ކުދިންނަށް އަންގާފައިވަނީ އަނެއްކާވެސް ސްކޫލްތައް ބަންދުވީކަމުގައެވެ. މިއާއެކު ކުދިންނަށް ވަނީ އަނެއްކާވެސް މާޔޫސްކަން ވެރިކުރުވާފައެވެ.
ތާލިބާންގެ މިނިންމުމާއެކު ގްރޭޑް ހައަކުން މަތީ ގްރޭޑްތަކުގައި ތައުލީމު ހާސިލުކުރަމުންދާ އަންހެން ކުދިންނަށް އަނެއްކާވެސް ސްކޫލްތައް ބަންދުވީއެވެ.
ބުދަ ދުވަހު އެޑިޔުކޭޝަން މިނިސްޓްރީން ބުނެފައިވަނީ އިސްލާމީ ޝަރީޢަތާއި އަފްޣާނިސްތާނުގެ ޘަގާފަތާ އެއްގޮތަށް އަންހެން ކުދިންނަށް ސްކޫލްތަކަށް ގޮސް ތައުލީމު ހާސިލުކުރެވޭފަދަ ނިޒާމެއް ގާއިމުކުރެވެންދެން ސްކޫލްތައް ބަންދުވާނެކަމަށެވެ.
ތާލިބާންގެ ސްޕޯކްސްމަން އިނާމުﷲވެސް ވަނީ މިކަން އޭއެފްޕީއަށް ކަށަވަރުކޮށްދެއްވާފައެވެ. ނަމަވެސް އެކަމާއި ގުޅޭ ސަބަބެއް އޭނާ ހާމަކުރައްވާފައެއް ނުވެއެވެ. އެޑިޔުކޭޝަން މިނިސްޓްރީގެ ސްޕޯކްސްމަން އަޒީޒް އަހުމަދު ރަޔާން ވިދާޅުވީ އެކަމާއި ބެހޭގޮތުން އެއްޗެއް ވިދާޅުވުމުގެ ހުއްދަ ނެތްކަމަށެވެ.
ތާލިބާނުން އަފްޣާނިސްތާނުގައި ވެރިކަންކުރަން ފެށުމާއެކު ގިނަ އަދަދެއްގެ ބަޔަކު އަފްޣާނިސްތާން ދޫކޮށް ދިޔުމުން އެގައުމަށް ވަނީ ޓީޗަރުންގެ ދަތިކަން އިހުސާސްކުރަން ޖެހިފައެވެ. ތާލިބާން ސަރުކާރުގެ ސްޕޯކްސްމަން ވިދާޅުވީ މިމައްސަލަ ހައްލުކުރުމަށް އެތައް ހާސް ޓީޗަރުންނެއް ބޭނުންވާކަމަށެވެ.
މީގެކުރިން ތާލިބާނުން އަފްޣާނިސްތާނުގައި ވެރިކަންކުރިއިރު އަންހެން ކުދިންނާއި އަންހެނުން ތައުލީމު ހާސިލުކުރުމަކީ މަނާކަމެކެވެ. އަދި ގިނަ އަންހެނުންނަށް އޭރު ވަޒީފާ އަދާކުރުމަށް ދިޔުމަކީވެސް މަނާކަމެކެވެ. ނަމަވެސް މިދިޔަ އަހަރުގެ އޮގަސްޓްމަހު އަލުން ސަރުކާރާއި ހަވާލުވިފަހުން ތާލިބާނުން ވަނީ އަންހެނުންނާއި އަންހެން ކުދިންނަށް ތައުލީމު އުނގެނުމުގެ ފުރުސަތު ދޭނަކަމަށާއި ވަޒީފާ އަދާކުރުމުގެ ފުރުސަތު ދޭނެކަމަށް ވައުދުވެފައެވެ.
އަދި އަންހެންނުންނާއި އަންހެން ކުދިންގެ ހައްގުތައް ރައްކާތެރިކުރުމަކީ ބައިނަލްއަގްވާމީ މުޖުތަމައުން ތާލިބާނަށް އެހީތެރިކަން ފޯރުކޮށްދިނުމުގައި ކަނޑައަޅާ އެންމެ މައި ޝަރުތަށްވެސް ވަނީ ވެފައެވެ.
އަންހެން ކުދިންނަށް ސްކޫލްތައް ހުޅުވާލުމަށްފަހު އަނެއްކާވެސް ބަންދުކުރުމުން ބައިނަލްއަގްވާމީ މުޖުތަމައުން އަންނަނީ އެކަމުގެ ކަންބޮޑުވުން ފާޅުކުރަމުންނެވެ. އެގޮތުން އދ ގެ ސެކްރެޓަރީ ޖެނެރަލް އެންތޯނިއޯ ގުޓަރޭސް ވިދާޅުވީ މިކަމާއި ވަރަށް ބޮޑަށް ހިތާމަކުރައްވާކަމަށާއި ތާލިބާނުންގެ މިނިންމުމާއެކު އަފްޣާނިސްތާނަށް ވަރަށް ބޮޑެތި ގެއްލުންތަކެއް ވާނެކަމަށެވެ. ގުޓަރޭސް ވަނީ ވީއެންމެ އަވަހަކަށް ސްކޫލްތައް ހުޅުވުމަށް ތާލިބާނުންނަށް ގޮވާލައްވާފައެވެ.
