ރާއްޖޭގައި ބަޖެޓުގައި ނުހިމަނައި ބައެއް މަޝްރުއުތައް ހިންގަމުންދާތީ އާއި ބަޖެޓްގައި ހުރި ބައެއް މަޝްރޫއުތައް ހިނގަމުން ނުދާ މައްސަލާގައި ރައްޔިތުންގެ މަޖިލީހުގައި މިނިސްޓަރު ތޯރިގް އިބްރާހީމް ދެއްވި ޖަވާބާއި ގުޅިގެން އިދިކޮޅު ބައެއް މެމްބަރުން ރައްދު ދެއްވައިފި އެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވަޒީރާ ސުވާލު ކުރުމަށް، ކިނބިދޫ ދާއިރާގެ މެމްބަރު އަބްދﷲ ރިޔާޒު ހުށަހެޅުއްވި ސުވާލާ ގުޅިގެން މިނިސްޓަރު ތޯރިގް ވިދާޅުވީ ތ. ވަންދޫ ގިރާ ސަރަހައްދު ހިމާޔަތް ކުރެވޭނެ ވަކި ދުވަހެއް ދަންނަވަން ނޭނގޭ ކަމަށާއި މިއަހަރު އެމަޝްރޫއު ނުފެށީ މިއަހަރުގެ ބަޖެޓްގައި އެ މަޝްރޫއަށް ފައިސާ ހިމަނާފައި ނުވާތީ ކަމަށެވެ.
ރިޔާޒު ސުވާލުކުރެއްވީ ތ. ވަންދޫ ގިރާ ސަރަހައްދު ހިމާޔާތްކުރުމުގެ މަސައްކަތް ފެށޭނެ ދުވަހެއް ސާފުކުރެއްވުމަށެވެ.
ރިޔާޒުގެ އެސުވާލަށް މިނިސްޓަރު ތޯރިގް ދެއްވި ޖަވާބުގައި މިއަހަރުގެ ބަޖެޓްގައި ވަންދޫ ގިރާ ސަރަހައްދު ހިމާޔަތް ކުރުމަށް މިއަހަރުގެ ބަޖެޓް ފާސްކުރިއިރު ނެތް ކަމަށެވެ. ނަމަވެސް އެމިނިސްޓްރީގެ ބަޖެޓްގައި ޕީއެސްއައިޕީގެ ދަށުން އެ ޕްރޮޖެކްޓް ހިންގުމަށް ހިމެނުއްވި ކަމަށް ތޯރިގް ވިދާޅުވި އެވެ.
ތޯރިގް ޖަވާބާ ގުޅިގެން މަޖިލީހުގެ ބައެއް މެމްބަރުންގެ ހިތްހަމަ ނުޖެހުން ފާޅުކުރެއްވި އެވެ. އަދި 2014 ވަނަ އަހަރާއި 2015 ވަނަ އަހަރުގެ ބަޖެޓްގައި އެ ޕްރޮޖެކްޓް ހިމަނާފައި އޮތްއިރު، އެމަޝްރޫއު ނުހިންގީ ކީއްވެތޯ ރިޔާޒު ވަނީ ސުވާލުކުރައްވާފައެވެ. ޖަވާބުގައި ތޯރިގް ވިދާޅުވީ އެ ދެ އަހަރު ބަޖެޓްގައި ހިމެނިނަމަވެސް، ދައުލަތުގެ ޚަރަދުތައް ބޮޑުކަމުން އެ މަޝްރޫއު ހިންގޭގޮތް ނުވީ ކަމަށެވެ.
އެމްޑީޕީ ޕާލަމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް އާއި އަދާލަތު ޕާޓީގެ މަޖިލިސް މެމްބަރު އަނާރާ ނައީމު ވެސް ވަނީ ތޯރިގް ޖަވާބަށް ރައްދު ދެއްވާފަ އެވެ. އެބޭފުޅުން ވިދާޅުވީ ބައެއް އަހަރަތަކުގައި ދައުލަތުގެ ބަޖެޓްގައި ޖެހުމަށް ފަހު އެ އަހަރުތަކުގެ އެމަޝްރޫއު ނުހިންގާ، ޖެހިގެން އަންނަ އަހަރު ދައުލަތުގެ ބަޖެޓުން އެމަޝްރޫއު ގެއްލިގެންދާ ތަން ވެސް ފެންނަ ކަމަަށެވެ. އަދި ބަޖެޓްގައި ހިމެނުމަށް ފަހު ބައެއް މަޝްރޫއުތައް ނުހިންގާއިރު، ބަޖެޓްގައި ނުހިމެނޭ ގިނަ މަޝްރޫއުތަކެއް ހިންގަމުންދާ ކަމަށް ވެސް އިދިކޮޅު މެމްބަރުން ވިދާޅުވި އެވެ.
ވަޒީރުންނާ ސުވާލު ކުރުމަށް އިދިކޮޅު މެމްބަރުން މަޖިލީހަށް ހުށަހެޅި ނަމަވެސް މިއީ ވަޒީރާއި ސުވާލު ކުރުމަށް މިއަހަރު ދެއްވި ފުރަތަމަ ފުރުސަތެވެ. ވަޒީރުންނާ ކުރުމަށް ހުށަހަޅާފައިވާ ސުވާލުތައް މަޖިލީހަށް އެޖެންޑާ ނުކުރާތީ އިދިކޮޅު މެމްބަރުން ވަނީ ތަކުރާރުކޮށް ކަންބޮޑުވުން ފާޅުކޮށްފައެވެ.
