ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ރެފްރީ ޖަރުމަނުގެ މާކަސް މަރކް ވެސް މޯލްޑިވްސް ސްޕޯރޓްސް އެވޯޑްސް 2022 އިވެންޓް ގައި ބައިވެރިވާނެކަން މިނިސްޓްރ އަހުމަދު މަހުލޫފް އިއުލާބްކުރައްވައިފިއެވެ.
މިމަހުގެ 17 ވަނަ ދުވަހުގެރޭ އޮންނަ ބޮޑު ހަފްލާ ގައި ކުޅިވަރުގެ ދާއިރާގެ ޓެކްނިކަލް ބޭފުޅުންނަށްވެސް އެވޯޑް ދިނުމަށް ވަނީ ހަމަޖެހިފައެވެ. އެބައިގެ އެވޯޑްތައް ދިނުމުގައި މާކަސް މަރކް ބައިވެރިވާނެއެވެ. އޭނާއަކީ ފީފާއިން ހޮވާ އެންމެ މޮޅު ރެފްރީގެ މަޤާމް ތިންފަހަރު ހޯދާފައިވާ ރެފްރީއެކެވެ. އަދި ބުންޑަސްލީގުގެ އެންމެ ގިނަ މެޗަށް އިންސާފްކުރި ރެފްރީއަކީވެސް މާކަސްއެވެ. އޭނާ ވަނީ ޖަރުމަނުގެ އެންމެ މޮޅު ރެފްރީގެ އެވޯޑް ހަ ފަހަރު ހޯދާފައެވެ.
ކުލަގަދަކޮށް ބާއްވާ ބޮޑު އެވޯޑް ހަފްލާގައި ދުނިޔޭގެ ގިނަ ޗެމްޕިއަނުންތަކެއް ބައިވެރިވާނެކަން މިހާތަނަށްވެސް ވަނީ އިއުލާންކުރައްވާފައެވެ. އޭގެތެރޭގައި ތަފާތު ކުޅިވަރުތަކުގެ ކުރީގެ ޗެމްޕިއަނުން ހިމެނެއެވެ. މިއީ ހުރިހާ ކުޅިވަރެއް ހިމަނައިގެން ރާއްޖޭގައި އެވޯޑް ދޭ ފުރަތަމަ ހަފްލާއެވެ. އަދި މިހާތަނަށް ބާއްވާ އެންމެ ބޮޑު އެވޯޑް ހަފްލާއެވެ.
