މިއީ ދިވެހިރާއްޖެ ތަރައްގީއާއި ކުރިއެރުން އައު އުސްމިންތަކަށް ވާސިލުކޮށްދިން ފަތުރުވެރިކަމުގެ ރަންޔޫބީލު މުނާސަބަތެވެ. އެ ސިނާއަތަށް 50 އަހަރު ފުރުނީއެވެ. މިއީ ރަންޔޫބީލް އަހަރެވެ. ވޭތުވެދިޔަ 50 އަހަރު ރާއްޖެއަށް އައި ހުރިހައި ކުރިއެރުމަކާއި ތަރައްގީގައި އެންމެ ބޮޑު ހިއްސާއެއް އަދާކުރި ސިނާއަތަކީ އެއްވެސް ޝައްކެއް ނެތި ފަތުރުވެރިކަމެވެ.

ރާއްޖޭގެ އިގުތިސާދާއި ވަޒީފާގެ ބާޒާރާއި މަސައްކަތްތެރިކަން މިވަގުތު ހުރިނެތްގޮތް މިނެކިރާއިރު މަައިގަނޑު ސިނާއަތްތައް ގިންތިވެގެން އަންނަނީ ތިރީގައި ބަޔާން މިކުރާ ތަރުތީބުންނެވެ.

1 ފަތުރުވެރިކަމުގެ ސިނާއަތު

2 ދަތުރުފަތުރާއި މުވާސަލާތުގެ ސިނާއަތު

3 އިމާރާތް ކުރުމުގެ ސިނާއަތު

4 އާންމު ވިޔަފާރީގެ ސިނާއަތު

5 މަސްވެރިކަމުގެ ސިނާއަތު

6 ދަނޑުވެރިކަމުގެ ސިނާއަތު

ފަތުރުވެރިކަން މިހާރު ރާއްޖޭގެ އިގުތިސާދުގެ 40 އިންސައްތަ ހިއްސާކުރެއެވެ. ދެންހުރި ސިނާއަތްތައް ކުރިއެރުމުގައިވެސް ފަތުރުވެރިކަމުގެ ހިއްސާ ބޮޑެވެ.

އިއްޔެ (16 ފެބުރުއަރީ 2022) އަކީ، ދިވެހިރާއްޖެއަށް ފަތުރުވެރިކަން ތައާރަފުވިތާ 50 އަހަރުވީ ރަންޔޫބީލް ދުވަހެވެ. ރާއްޖެއަށް ފަތުރުވެރިންގެ ފުރަތަމަ ގްރޫފެއް އައީ މީގެ 50 އަހަރު ކުރިން 16 ފެބުރުއަރީ 1972ގައެވެ. އިޓަލީވިލާތުގެ ޓުއަރ އޮޕަރޭޓަރެއް ކަމަށްވާ މިސްޓަރ ޖޯޖް ކޯބިންއާއެކު އިޓަލީވިލާތުގެ ފަތުރުވެރިންގެ 22 މީހުންގެ ގްރޫޕެއް 16 ފެބުރުއަރީ 1972ގައި ރާއްޖެ އައިސް ދެހަފުތާއަށް ރާއްޖޭގައި ތިބުން ހިމެނުނީ ރާއްޖޭގެ ފަތުރުވެރިކަމުގެ ފެށުން ކަމުގައެވެ.

މިސްޓަރ ޖޯޖް ކޯބިންގެ ދެމަފިރިންނާއި ތުއްތު ދަރިފުޅު ޖޯޖިޔާ ކޯބިންވެސް މިދަތުރުގައި ބައިވެރިވިއެވެ. މިއަދު މިސްޓަރ ޖޯޖް ކޯބިންއާއި ޖޯޖިޔާ ކޯބިން ރާއްޖޭގައި ތިބުމަކީ މިތާރީޚީ ރަންޔޫބީލުގެ އެންމެ ތާރީޚީ ހަނދާނީ ޝަރަފެވެ. މިއަހަރު ގައުމީ ގޮތުން، ފާހަގަ މިކުރެވެނީ ރާއްޖޭގެ ފަތުރުވެރިކަމުގެ ރަންޔޫބީލް އަހަރެވެ. ރާއްޖޭގެ ފުރަތަމަ ރިސޯޓު މާލެއަތޮޅު ވިހަމަނާފުށީގައި (ކުރުނބާ) ހުޅުވުނީ 3 އޮކްޓޫބަރު 1972ގައެވެ. މިދުވަސް (3 އޮކްޓޫބަރު) މިއަހަރުން ފެށިގެން ގައުމީ ފަތުރުވެރިކަމުގެ ދުވަހުގެ ގޮތުގައި ފާހަގަކުރެވޭނެއެވެ.

ރާއްޖޭގެ ފަތުރުވެރިކަން ކުރިއަރާފައިވަނީ ވަރަށް ބާރު ދުވެއްޔެއްގައެވެ. ރާއްޖޭގައި ފަތުރުވެރިކަން ފެށުނުތާ 20 އަހަރު ނުވަނީސް (1990ގެ އަހަރުތައް ފެށުނުއިރު) ރާއްޖޭގެ އިގުތިސާދުގެ 1ވަނަ ސިނާއަތަކީ ފަތުރުވެރިކަން ކަމުގައިވިއެވެ. ދުނިޔޭގެ ފަތުރުވެރިކަމުގެ ދާއިރާއިން އެކިއެކި ރޮނގުތަކުން ރާއްޖެއާ ރާއްޖޭގެ ރިސޯޓުތަކަށް އެންމެމަތީ ވަނަތައް 1990ގެ އަހަރުތަކުން ފެށިގެން އަންނަނީ ލިބެމުންނެވެ. މީގެ 20 އަހަރު ކުރިން 2000ގެ އަހަރުތައް ފެށުނުއިރު ރާއްޖޭގެ ފަތުރުވެރިކަން ވަނީ ދުނިޔޭގެ ފަތުރުވެރިކަމުގެ އެންމެމަތީ ދަރަޖައަށް އަރާފައެވެ.