ފްރެންޗް ކަޕުގެ ގަދަ 16 ގައި ހޯމަ ދުވަހުގެރޭ ކުޅުނު މެޗުން ޕެނަލްޓީ ޖަހައިގެން ނީސް އަތުން ބަލިވެ އެންމެ ފަހުގެ ޗެމްޕިއަން ޕީއެސްޖީ ކަޓައިފިއެވެ.

ޕީއެސްޖީގެ ދަނޑުގައި ކުޅުނު މި މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމުން ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީގައި ނީސް ކުރިހޯދީ 6-5 ގެ ނަތީޖާއަކުންނެވެ.

މި މެޗު ޕީއެސްޖީން ފަށާފައިވަނީ މިދިޔަ ފިނި މޫސުމުގެ ބްރޭކުގައި ހުއްޓައި ކޮވިޑް-19 އަށް ޕޮޒިޓިވްވި އާޖެންޓީނާގެ ތަރި ލިއޮނެލް މެސީ ފުރަތަމަ އެގާރައިގައި ހިމަނައިގެންނެވެ. އަދި މި މެޗުގައި މެސީ ބޭނުންކޮށްފައިވަނީ 10 ނަންބަރު ޖާޒީއެވެ. ބާސެލޯނާ ދޫކޮށް ޕީއެސްޖީއަށް ބަދަލުވެ މެސީ 30 ނަންބަރު ޖާޒީ ބޭނުންކުރަމުން އައި ނަމަވެސް، ފްރެންޗް ކަޕުގައި ކުޅުންތެރިންނަށް ނަންބަރު ބަދަލުކުރުމުގެ ފުރުސަތު ލިބެއެވެ. އެގޮތުން ޕީއެސްޖީގެ ރަސްމީ 10 ނަންބަރު ޖާޒީއަށް މިހާރު ކުޅެމުން އަންނަނީ ބްރެޒިލުގެ ތަރި ނޭމާއެވެ.

ހޯމަ ދުވަހުގެރޭ ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، ވަރުގަދަ ފޯވާޑް ލައިނެއް އޮތް ޕީއެސްޖީއަށް މި މެޗުގައި ނީސްގެ ގޯލަށް ނުރައްކާކޮށް މާ ގިނަ ހަމަލާތަކެއް އުފެއްދިފައެއް ނުވެއެވެ. އެގޮތުން މުޅި މެޗުގައި ޕީއެސްޖީން ނީސްގެ ގޯލާ އަމާޒުކޮށް ފޮނުވާލެވިފައިވަނީ އެންމެ ދެ ހަމަލާއެވެ.

މި މެޗުގެ ފުރަތަމަ އެގާރައިގައި ޕީއެސްޖީން އެ ޓީމަށް ކުޅެމުން އަންނަ ފްރާންސްގެ ޒުވާން ތަރި ކީލިއަން އެމްބާޕޭ ނުހިމެނި ނަމަވެސް، ދެވަނަ ހާފުގައި އޭނާ ވަނީ ކުޅެން އަރުވާފައެވެ. އެގޮތުން ކުޅެން އަރައި އެމްބާޕޭ ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމުން ނަތީޖާ ނެރުމަށް ޕެނަލްޓީ ޖެހިއިރު، ލެއަންޑްރޯ ޕަރޭޑޭސް ފޮނުވާލި ޕީއެސްޖީގެ ތިންވަނަ ޕެނަލްޓީ ނީސްގެ ގޯލްކީޕަރު މާކިން ބަލްކާ ވަނީ މަތަކޮށްފައެވެ. އެކަމަކު ޖަވާބުގައި ނީސްގެ އެންޑީ ޑެލޯޓް ފޮނުވާލި ހަތަރުވަނަ ޕެނަލްޓީ ޕީއެސްޖީގެ ގޯލްކީޕަރު ޖިއަންލުއީޖީ ޑޮންނަރުންމާ ވަނީ ހުއްޓުވާފައެވެ. މި މެޗުން ޕީއެސްޖީ ބަލިވީ އެ ޓީމުގެ ޒަވީ ސިމޯންސް ފޮނުވާލި ހަތްވަނަ ޕެނަލްޓީ ނީސްގެ ގޯލްކީޕަރު ބަލްކާ މަތަކުރުމުންނެވެ.

މި ނަތީޖާއާއެކު ޕީއެސްޖީ ފްރެންޗް ކަޕުން ކެޓިއިރު، އެ ޓީމަކީ މި މުބާރާތުގެ އެންމެ ކާމިޔާބު ޓީމެވެ. އެގޮތުން ޕީއެސްޖީން ވަނީ މިހާތަނަށް ފްރެންޗް ކަޕް 14 ފަހަރު ކާމިޔާބުކޮށްފައެވެ.