މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ން ވިއްކާ ޑީސަލްގެ އަގު ބޮޑުކޮށްފިއެވެ.
މިފްކޯއިން ވިއްކާ ތެލުގެ އަގު ބޮޑުކުރުމާއެކު, މިހާރު މަސް ދޯނިތަކަށް އެކުންފުނިން ޑީސަލް ލީޓަރެއް ވިއްކާނީ 12.08 ރުފިޔާއަށެވެ. އަދި އާއްމުންނަށް ޑީސަލް ލީޓަރެއް ވިއްކާނީ 14.26 ރުފިޔާއަށެވެ.
މިފްކޯއިން ވިއްކާ ޑީސަލްގެ އަގަށް އެންމެ ފަހުން ބަދަލު ގެނެސްފައިވަނީ މިދިޔަ އަހަރުގެ އޭޕްރީލް މަހުއެވެ. އެފަހަރުގެ ބަދަލުތަކާއެކު މިއަދާހަމައަށް މަސްވެރިންނަށް މިފްކޯއިން ޑީސަލް ލީޓަރެއް ވިއްކަމުން އައީ 9.03 ރުފިޔާއަށެވެ. އަދި އާއްމުންނަށް ޑީސަލް ލީޓަރެއް ވިއްކީ 13.19 ރުފިޔާއަށެވެ.
މިފްކޯއިން ޑީސަލްގެ އަގު ބޮޑުކޮށްފައި މިވަނީ ދުނިޔޭގެ ބާޒާރުގައި ތެލުގެ އަގު ރެކޯޑު އަދަދަކަށް ބޮޑުވުމާގުޅިގެންނެވެ. މިފްކޯއިން ޑީސަލްގެ އަގު ބޮޑުކޮށްފައި ވާއިރު، އެސްޓީއޯގެ ސަބްސިޑަރީ ކުންފުނި އެފްއެސްއެމުންވެސް ވަނީ ތެލުގެ އަގު ހުކުރު ދުވަހުން ފެށިގެން ބޮޑުކޮށްފައެވެ.
އެފްއެސްއެމުން ތެލުގެ އަގު ބޮޑުކުރުމާއެކު މިހާރު ޑީސަލް ލީޓަރެއް ލިބެންހުރީ 12.44 ރުފިޔާއަށެވެ. އަދި އެފްއެސްއެމުން ޕެޓްރޯލް ވިއްކަމުން އަންނަނީ ލީޓަރެއް 12.06 ރުފިޔާގެ ރޭޓުންނެވެ.
ދުނިޔޭގެ ބާޒާރުގައި ތެލުގެ އަގު ހުރީ ފީފާއެއް 87.35 ޑޮލަރު (1،346ރ)ގައެވެ. މިއީ މި އަހަރު ފެށުނު އިރު ހުރި އަގާ އަޅައިބަލާއިރު 10 އިންސައްތައިގެ އިތުރުވުމެކެވެ.
