އަބޫދާބީއަށް ދަތުރު ކުރާ މީހުން ބޫސްޓަރ ޑޯޒް ޖެހުން މަޖުބޫރު ކޮށްފިއެވެ.
މިއީ އެ ސިޓީގައި ކޮވިޑް ފެތުރެމުދާތީ ރައްކާތެރިކަމުގެ ގޮތުން އެޅި ފިޔަވަޅެކެވެ. ޔޫއޭއީގެ ސަރުކާރުން ބުނީ، ވެރިރަށް އަބޫދާބީއަށް ދަތުރުކުރާ މީހުން ވެކްސިން ޖަހާފައިވާކަން ކަށަވަރުކުރުމުގެ ގޮތުން ގްރީން ޕާސް ދައްކަން ޖެހޭ ކަމަށެވެ. އެ ގޮތުން ބޫސްޓަރ ޑޯޒް ނުޖަހާނަމަ ވެކްސިން ފުރިހަމަ ކޮށްފައިވާ ކަމަށް ބަލައި ނުގަނެވޭނެ ކަމަށެވެ. އަދި އަބޫދާބީއަށް ދަތުރުކުރުމުގެ ދެ ހަފްތާ ކުރިން ނެގެޓިވް ނަތީޖާއެއް އޮންނަން ޖެހޭނެ ކަމަށެވެ.
އަބޫދާބީގައި ފިޔަވަޅުތައް ވަރުގަދަ ކުރަމުންދާއިރު، އާންމުން އެއްވެ އުޅޭ ތަންތަނަށް ނުވަތަ ސަރުކާރުގެ އިމާރާތްތަކަށް ވަނުމުގެ ކުރިން ވެކްސިން ޖަހާފައިވާކަން އަންގައިދޭ ލިޔުން ދައްކަން ޖެހެއެވެ.
ޔޫއޭއީގައި މި ހަފްތާގައި ދުވާލެއްގެ މައްޗަށް 3000 އަށްވުރެ މަތިން ކޭސްތައް އަންނަނީ ރިޕޯޓް ކުރަމުންނެވެ. އަދި މި ބަލީގައި މިހާތަނަށް އެޤައުމުން 2195 މީހުންވަނީ މަރުވެފައެވެ. އާބާދިގެ 90 އިންސައްތައަށްވުރެ މަތިން ވެކްސިން ފުރިހަމަ ކޮށްފައިވާކަމަށް އެ ޤައުމުގެ ސަރުކާރުން ބުނެއެވެ.
