ކުރީގެ ނައިބު ރައީސް އަހުމަދު އަދީބުގެ ސިއްޚީ ހާލުކޮޅާ މެދު އިހުމާލުވަމުންދާ ކަމަށް ބުނެ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އަށް މައްސަލައެއް ހުށަހަޅައިފި އެވެ.
އަދީބުގެ އަނބިކަނބަލުން މަރްޔަމް ނަޝްވާ ބުދަ ދުވަހު އެޗްއާރްސީއެމް އަށް ފޮނުއްވި ސިޓީއެއްގައި ބުނެފައި ވަނީ އަދީބަށް ދިމާވެފައިވާ ސިއްޚީ މައްސަލަތަކުގެ ތެރޭގައި އެތެރެ ހަށީގައި ސިސްޓް ހުރުމާއި، ކިޑްނީގައި ހިލަ އުފެދިފައިވުމުގެ އިތުރުން ލޮލުގެ ވަރަށް ނުރައްކާތެރި ބައްޔެއް ކަމަށްވާ ގްލޮކޮމާ ޖެހިފައިވުން ހިމެނޭ ކަމަށެވެ.
އަދީބުގެ އަނބިކަނބަލުންގެ ސިޓީގައި ވަނީ އެ ބަލިތަކާ ގުޅިގެން، އަދީބުގެ ބޭސްފަރުވާގެ ކަންތައްތަކުގައި ޒިންމާ ނަގަންޖެހޭ ހުރިހާ މުއައްސަސާއެއްގެ ސަމާލުކަމަށް އެކަންކަން ގެނެސްފައިވާނެ ކަމަށެވެ. އެހެން ނަމަވެސް، އަދީބުގެ ބޭސްފަރުވާގެ ޒިންމާ އެއްވެސް މުއައްސަސާއަކުން އުފުލާނެ ކަމަށް އަންގާފައިނުވާ ކަމަށް ސިޓީގައި ބުނެފައި ވެއެވެ.
ސިޓީގައިވާގޮތުގައި އަދީބަށް ދިމާވެފައިވާ ސިއްޚީ މައްސަލަތަކަކީ ރާއްޖެއިން ފަރުވާކުރެވޭ ކަންތައްތަކެއް ނޫނެވެ. ވީހާވެސް އަވަހަކަށް ރާއްޖެއިން ބޭރުން ފަރުވާ ހޯދުމަށް ޑޮކްޓަރުން ވަނީ ލަފާދީފަ އެވެ.
ރާއްޖެއިން ފަރުވާ ނުކުރެވޭ ބަލިތަކަށް ރާއްޖެއިން ބޭރުން ފަރުވާކުރުމަކީ ކޮންމެ ގައިދީއަކަށް ވެސް ދެމުންދާ ހައްގެއްކަން ފާހަގަކޮށް ސިޓީގައި ބުނެފައި ވަނީ އަދީބަށް އެ ހައްގު ނުދީ ހިފަހެއްޓުމަކީ ތަފާތުކުރުން ކަމަށާއި، އަދި އެއީ ޖަލުތަކާ ޕެރޯލްގެ ގާނޫނުގެ ދަށުން ޓޯޗަރގެ އަމަލެއް ކަމުގައި ބަލަންޖެހޭ ކަމަށެވެ.
"ގާނޫނު އަސާސީ އިންނާއި، ގާނޫނުން ލިބިދޭ ހައްގުތައް ލިބޭނޭ އިންތިޒާމް ދައުލަތުގެ މުއައްސަސާތަކުން ހަމަޖައްސަވައި ދެއްވަމުން ގެންދަވާކަން ކަށަވަރުކުރުމަކީ ތިޔަ ކޮމިޝަނުގެ ގާނޫނީ މަސްއޫލިއްޔަތަކަށްވާތީ މި މައްސަލަ ބައްލަވައި މިކަމުގައި ތިޔަ ކޮމިޝަނަށް އެޅުއްވެން އޮތް ފިޔަވަޅެއް އަޅުއްވައި ދެއްވުން އެދެމެވެ." ސިޓީގައި ބުނެފައިވެ އެވެ.
ބޭސްފަރުވާ ކުރުމަށް އަދީބު ރާއްޖެއިން ބޭރަށް ފޮނުވައިދިނުމަށް އެދި އާއިލާއިން ވަނީ ފުލުހުންނަށާއި މޯލްޑިވްސް ކަރެކްޝަނަލް ސާވިސް އަށް ސިޓީ ފޮނުވާފަ އެވެ. ނަމަވެސް، ބޭސްފަރުވާ އަށް ރާއްޖެއިން ބޭރަށް ވަޑައިގަތުމުގެ ހުއްދަ އަދީބަށް ދޭނެ ފަރާތެއް މިހާރު ވަނީ އޮޅުމެއްގެ ތެރޭގަ އެވެ.
އަދީބުގެ މައްޗަށް 33 އަހަރުގެ ޖަލު ހުކުމްތަކެއް އިއްވާފައިވާއިރު، އެ ހުކުމްތައް ތަންފީޒް ކުރައްވަމުން ގެންދެވީ މާފުށީ ޖަލުގަ އެވެ. ނަމަވެސް، މިއަހަރުގެ މާޗް މަހުގެ 8 ވަނަ ދުވަހު ފުލުހުން ބެލުމުގެ ދަށަށް އަދީބު ބަދަލުކޮށް، ދޫނިދޫގައި ވަނީ ބަންދުކޮށްފަ އެވެ.
ކަރެކްޝަނުން ބުނަމުންދަނީ އަދީބަށް އެފަދަ ހުއްދައެއް ދިނުމުގެ އިހުތިސާސެއް އެ މުއައްސަސާއަށް ނެތް ކަމަށާއި ހުއްދަ ދޭނީ ފުލުހުން ކަމަށެވެ. ނަމަވެސް، ފުލުހުން ބުނަމުންދަނީ އަދީބަކީ ހުކުމް ތަންފީޒް ކުރަމުންދާ ބޭފުޅަކަށް ވާތީ އެ ހުއްދަ ދޭނީ ކަރެކްޝަނުން ކަމަށެވެ.
