އަލަމާ-5 ދޯނީގެ ފަޅުވެރިން ހޯދުމަށް މިހާތަނަށް ކަނޑާއި ވައިގެ މަގުން 2720 ސްކޮޔަރ ނޯޓިކަލްމޭލްގެ ސަރަހައްދެއް ބަލާފައިވާ ކަމަށާއި، އަދިވެސް ނުފެންނަ ކަމަށް އެމްއެންޑީއެފުން ބުނެފިއެވެ.

ވ. ފުއްސަރު ކައިރިން އަލަމާ ނަމަކަށް ކިޔާދޯންޏެއް، އަޑިއަށްދާ ކަމުގެ މައުލޫމާތު ލިބިގެން ކޯސްޓްގާޑުން ހަރަކާތްތެރިވާން ފަށައިފައިވަނީ އަންގާރަ ދުވަހުގެ ހެނދުނު 7:15 ހާއިރުއެވެ. އެ ދޯނީގައި ތިބީ ދިވެހި ކައްޕިއަކާއި ބިދޭސީ ދެ ފަޅުވެރިންނެވެ. އެއީ 60 ފޫޓުގެ ދޯންޏެކެވެ.

އެމްއެންޑީއެފުން ބުނީ ފަޅުވެރިން ހޯދުމުގެ މަސައްކަތް މެދުކެނޑުމެއްނެތި ކުރިއަށްދާއިރު މި ކަމުގައި ހަރަކާތްތެރިވަމުން ދަނީ އެމްއެންޑީއެފް ޑޯނިއަރ ފްލައިޓާއި ކޯސްޓްގާޑް އެކޯ-905, ސީ އެމްބިއުލާންސް ކަމަށެވެ. ދޯނިން ކަނޑަށް ދޫވެ އޮޔާދާކަމަށް ބެލެވޭ ސާމާނުތަކެއް ފ. އަތޮޅުގެ އުތުރުން 1 ނޯޓިކަލް މޭލު ބޭރުން، ކޯސްޓްގާޑަށް ފެނިފައިވެއެވެ.

މިހާދިސާގެ މައުލޫމާތު އެމްއެންޑީއެފް ކޯސްޓްގާޑަށް ލިބިފައިވަނީ ޖަނަވަރީ 3 ވަނަ ދުވަހުގެރޭ 11:22 ހާއިރުއެވެ. އަދި މިދޯނި ދަތުރު ކުރަމުން ދިޔައީ، ފ. ފީއަލީ ކައިރިން ފާނަ މަސްވެރިކަމުގައި އުޅޭ ދޯނިފަހަރުން ފާނަ ގަނެގެން, މާލެއަށެވެ.