ޓެރަރިޒަމް އަށް ނަފްރަތު ކޮށް ލޯތްބާއި އޯގާތެރިކަމަށް ހިތްވަރު ދިނުމަށް މި ރޯދަ މަހަށް ޚާއްސަ ކޮށް ތައްޔާރުކޮށްފައިވާ އަރަބި ލަވައެއް ޔޫޓިއުބްގައި ވައިރަލް ވެއްޖެއެވެ.
ލަވަ ފެށިގެންދަނީ ކުޑަ ދެކުދިން ޓެރަރިސްޓަކަށް އަމާޒުކޮށް "އަހަރެން ހުރިހާ ވާހަކައެއް ﷲ ގެ ހަޒްރަތުގައި ދަންނަވާނަމެވެ. ކަލޭ އަހަރެމެންގެ ކުޑަކުދިންތައް އަޅާ ކައްބިންތައް ފުރާލިއެވެ. އަދި ކަލޭ އަހަރެމެންގެ މަދަރުސާތަކުގެ ޑެސްކްތައް ފަޅު ކުރިއެވެ"
ކުޑަ ދެކުދިން މިހެން ކިޔަމުންދާއިރު ފެނިގެންދަނީ މީހަކު ޖާނުން ފިދާވުމަށް ގައިގައި ބޮން ހަރުކުރާ މަންޒަރެވެ. އަދި އެމީހާ އާއްމުން ދަތުރު ކުރާ އުޅަނދަކަށް އަރާ ޖާނުން ފިދާވަން އުޅޭ މަންޒަރު ލަވައިން ފެނިގެން ދެއެވެ. އެހިނދު އެ އުޅަނދުގައި ތިބި މީހުން އޭނާއާ ކުރިމަތިލައެވެ. އޭގެ ތެރޭގައި ހިމެނޭ ކުޑަކުއްޖަކު އުރައިގެން ހުރި ދުވަސްވީ މީހަކު އޭނާއާ ދިމާލަށް "ﷲ އީ ދިރުން އުފައްދަވާ ފަރާތް" ކަމަށް ބުނެއެވެ. އެއާ ޚިލާފަށް ޓެރަރިސްޓުންނަކީ ފަނާކުރާ ފަރާތްތަކުގެ ގޮތުގައި އޭނާ ސިފަކުރެއެވެ.
ލަވަ ކިޔާފައިވަނީ ޔުނައިޓެޑް އެރަބް އެމިރޭޓްސްގެ އަރަބި ލަވަކިޔުންތެރިޔާ ހުސެއިން އަލް ޖަސްމީއެވެ.
ލަވައިގައި އަލްގައިދާ އާއި އިސްލާމިކް ސްޓޭޓުން ދާދި ފަހުން ދީފައިވާ ނުރައްކާތެރި ޓެރަރިސްޓް ހަމަލާތަކުގެ ހާދިސާތައް ފާހަގަ ކޮށްފައިވެއެވެ.
ލަވަ އުފައްދާފައިވަނީ ކުވޭތުގެ ޓެލެކޮމް ކޮމްޕެނީ ޒައިން އިންނެވެ. ލަވަ ޔޫޓިއުބްގައި ޕޯސްޓްކޮށްފައިވަނީ ހުކުރު ދުވަހުއެވެ.
މި ވީޑިއޯ މިހާތަނަށް 2.3 މިލިއަނަށްވުރެ ގިނަ މީހުން ބަލައިފައިވެއެވެ.
