މީގެ ކުރިން ދުވަހަކުވެސް ކޮވިޑްގެ ކޭސްތައް އިތުރުނުވާ މިންވަރަށް އޮސްޓްރޭލިއާގައި ކޮވިޑް ކޭސްތައް ގިނަވެއްޖެއެވެ.

މިހާތަނަށް ދުވާލެއްގެ މައްޗަށް އޮސްޓްރޭލިއާގައި އެންމެ ގިނަ އަދަދަކަށް ކޮވިޑްގެ ކޭސް ރެކޯޑު ކުރެވިފައިވަނީ އެއްދުވަހުގެ މަތީން 3،820 ކޭހެވެ. ނަމަވެސް ހޮނިހިރު ދުވަހު އޮސްޓްރޭލިއާގެ ސައުތު ވޭލްސް ސްޓޭޓުން 2،482 ކޭސް ރިޕޯޓުކޮށްފައި ވާއިރު، ވިކްޓޯރިއާ ސްޓޭޓުން ވަނީ 1،504 ކޭސް ރިޕޯޓު ކޮށްފައެވެ. މީގެ އިތުރުން ކުއީންސް ލޭންޑް ސްޓޭޓުން 31 ކޭސް ރިޕޯޓުކޮށްފައިވެއެވެ. މިއާއެކު ހޮނިހިރު ދުވަހު އޮސްޓްރޭލިއާއިން ކޮވިޑަށް ޕޮސިޓިވްވީ މީހުންގެ އަދަދު ވަނީ 4،017ށް އަރާފައެވެ.

މިކަމާ ގުޅިގެން އަޮސްޓްރޭލިއާގެ ޕްރައިމް މިނިސްޓަރ ސްކޮޓް މޮރިސަން ވިދާޅުވީ ކޮވިޑް ކޭސްތަކުގެ ނަންބަރަށް ބެލުމުގެ ބަދަލުގައި މިވަގުތު ސަމާލުކަން ދޭންޖެހޭނީ ހޮސްޕިޓަލުގައި އެނދުމަތިކޮށްގެން ފަރުވާ ދޭންޖެހޭ ފަރާތްތަކާ، ހާލު ސީރިއަސް ފަރާތްތަކުގެ އިތުރުން ވެންޓިލޭޓަރުގައި ބާއްވައިގެން ފަރުވާ ދޭންޖެހޭ ފަރާތްތަކަށް ކަމަށެވެ.

މޮރިސަން އިތުރަށް ވިދާޅުވީ ސައުތު ވޭލްސްގައި ކޮވިޑްގެ އަދަދުތައް މަތިވުމުގެ ސަބަބުން ހޮސްޕިޓަލުތަކަށް ބާރުބޮޑު ނުވާނެ ކަމަށެވެ. ސައުތު ވޭލްސްގައި ހާލުދެރަވެގެން ހޮސްޕިޓަލުގައި އެޑްމިޓްކޮށްގެން ފަރުވާދެމުން އަންނަނީ 26 މީހަކަށެވެ.

އޮސްޓްރޭލިއާގައި ކޮވިޑްގެ ކޭސްތައް އިތުރުވަމުން އަންނައިރު، އެގައުމުން އަޅާފައިވާ ރައްކާތެރިކަމުގެ ފިޔަވަޅުތަކަށް ވަނީ ލުއިދީފައެވެ. އެގޮތުން ސިޑްނީއާ މެލްބަންއަށް އިންޓަނޭޝަނަލް ދަތުރުތައްކުރާ ފަތުރުވެރިން މިހާރު 72 ގަޑިއިރު އައިސޮލޭޝަންގައި ހުންނާކަށް ނުޖެހޭނެއެވެ.

މޮރިސަން ވިދާޅުވީ ކޮވިޑާއެކު އުޅެން އޮސްޓްރޭލިއާގެ ރައްޔިތުން ދަސްކުރަންޖެހޭ ކަމަށެވެ. އަދި އިނގިރޭސިވިލާތާ، ޔޫރަޕާ، ނޯތު އެމެރިކާގެ ގައުމުތައް އޮތް ހާލަތަށް އޮސްޓްރޭލިއާ ނުވެއްޓޭކަމަށެވެ.