ރާއްޖޭގެ މަސްވެރިންނާއި މުޖުތަމައުންނާއި، ވަކިވަކި ފަރުދުންނާއި، ފަތުރުވެރިކަމުގެ ސިނާއަތުންނާއި އަދި އެނޫންވެސް ފަރާތްތަކުން ރާއްޖޭގެ ކަނޑުގެ ސަރަހައްދު ބޭނުންކުރާ ގޮތާއި، އެފަރާތް ތަކަށް މުހިންމުވާ ސަރަހައްދުތައް ދެނެގަތުމުގެ ޚާއްސަ ސާވޭއެއް ފަށައިފިއެވެ.

މިއީ ނޫ ރާއްޖެ ޕްރޮގްރާމްގެ ދަށުން 6 މަސް ދުވަހަށް ކުރިއަށް ގެންދާ ސާވޭއެކެވެ.

މި އޯޝަން ޔޫސް ސާވޭގެ ބޭނުމަކީ، އިގްތިސޯދީ، ސަގާފީ އަދި ތިމާވެށީގެ ގޮތުން ދިވެހިންނާއި ކަނޑުތަކާއި އޮންނަ ގުޅުން އިތުރަށް ދެނެގަތުމެވެ. އެގޮތުން މި ސާވޭ މެދުވެރިކޮށް ދިވެހި ރާއްޖޭގެ ކަނޑު ފަޅުތައް ބޭނުންކުރާ އެކިއެކި ފަރާތްތަކަށް މުހިންމު ސަރަހައްދުތައް ފާހަގަކުރެވި، ކަނޑުގެ ދިރުން ހިމާޔަތްކޮށް މެނޭޖްކުރާނެ ގޮތްތައް ހޯދައި ދެނެގަތުމަށް ފަސޭހަ ވެގެންދާނެއެވެ. މި ސާރވޭގެ މަގުސަދަކީ ރާއްޖޭގެ މެރިން ސްޕޭޝަލް ޕްލޭން އެކުލަވާލާއިރު ކަނޑުގެ ވަސީލަތްތައް ބޭނުންކުރާ ފަރާތްތަކުގެ ބައިވެރިވުން ކަށަވަރުކުރުމެވެ.

އޯޝަން ޔޫސް ސާވޭ ޓީމުގެ އަމާޒަކީ ރާއްޖޭގެ އެކި ކަންކޮޅުތަކުން ވީހާވެސް ގިނަބައެއްގެ ހިއްސާއާއި އެކު، އެކިފަރާތްތަކުން ކަނޑުފަޅުގެ ސަރަހައްދުތައް ބޭނުންކުރާގޮތް ދެނެގަނެ، އެފަރާތްތަކަށް މުހިންމުވާ ސަރަހައްދުތައް ވަޒަންކުރުމެވެ. އެގޮތުން މަސްވެރިކަމާއި، ފަތުރުވެރިކަމާއި، ޢުމްރާނީ މަސައްކަތްތައް ކުރާ ފަރާތްތަކާއި މަޝްވަރާކޮށް މިފަރާތްތަކުން ދިވެހި ރާއްޖޭގެ ކަނޑުފަޅުތައް ބޭނުންކުރާ ގޮތާއި، އެތަންތަން އަގު ވަޒަންކުރާގޮތް ދެނެގަތުމެވެ. އަދި ވަކިވަކި ސާވޭ ތަކުގެ ނަތީޖާ އެއްކުރުމަށްފަހު މަސްވެރިކަމާއި، ފަތުރުވެރިކަމާއި، މުނިފޫހިފިލުވުމާއި އެހެނިހެން ކަންކަމަށް ދިވެހިން އާންމުކޮށް ބޭނުންކުރާ ސަރަހައްދުތައް ފާހަގަކޮށް ހީޓްމެޕް ތަކެއް އެކުލަވާލާނެއެވެ. މި މެޕްތައް އުފައްދަނީ ސްޓޭކް ހޯލްޑަރުންނާއި މުޖުތަމައުގެ ޚިޔާލާއި މަޝްވަރާތައް އެއްކުރުމަށް ދުނިޔޭގެ އެކި ކަންކޮޅުތަކުގައި ބޭނުންކުރަމުން އަންނަ ޔުނިވަރސިޓީ އޮފް ކެލިފޯނިއާ، ސަންޓާ ބާބަރާގެ މެކްލިންޓޮކް ލެބުން ތައްޔާރުކޮށްފައިވާ 'ސީސްކެޗް' ޓޫލް މެދުވެރިކޮށެވެ.

ރާއްޖޭގެ މެރިން ސްޕޭޝަލް ޕްލޭން އެކުލަވާލައި، ސަރުކާރުގެ ނޫ އިގްތިސާދުގެ ތެރެއިން ދެމެހެއްޓެނިވި މަސްވެރިކަން އަދި ފަތުރުވެރިކަން ކުރިއެރުވުމަށް މި ސާވޭގެ ހޯދުންތައް އެހީތެރިވެދޭނެއެވެ. އަދި ރާއްޖޭގެ އިގްތިސޯދީ ކަނޑުގެ ސަރަހައްދުގެ 20 އިންސައްތައަކީ ހިމާޔަތްކުރެވިފައިވާ ކަނޑުގެ ސަރަހައްދު ތަކަކަށް ހެދުމަށް ސަރުކާރުން ކަނޑައަޅާފައިވާ އަމާޒަށް ވާސިލްވުމަށް، ހިމާޔަތް ކުރެވިދާނެ ކަނޑުފަޅުގެ ސަރަހައްދުތައް ދެނެގަތުމަށް ވެސް، ސާވޭގެ ނަތީޖާ ބޭނުން ކުރެވޭނެއެވެ.

އޯޝަން ޔޫސް ސާވޭއާ ގުޅޭގޮތުން މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ވިދާޅުވީ މިއީ ރާއްޖޭގެ ކަނޑުފަޅުތަކުގެ ވަކިވަކި ސަރަހައްދުތައް ބޭނުންކުރެވޭ ގޮތް ދެނެގަތުމަށް ހިންގޭ ފުރަތަމަ ސާވޭ ކަމަށާއި، މި ސާވޭގައި ހުރިހާ ފަރާތްތަކުން ވެސް ބައިވެރިވުމަށް އެދޭ ކަމަށެވެ. މިނިސްޓަރު ވިދާޅުވީ މި ސާވޭއިން ލިބޭ މައުލޫމާތަކީ ރާއްޖޭގެ ކަނޑުފަޅުތަކުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކޮށް އަންނަން އޮތް ޖީލުތަކަށް ފޯރުކޮށްދިނުމަށް ވަރަށް މުހިންމު މައުލޫމާތުތަކަކަށް ވެގެންދާނެ ކަމަށެވެ.

މީގެ އިތުރުން އާންމު ފަރާތްތަކުން މި ސާވޭ ގައި ބައިވެރިވެ ހިޔާލު ހިއްސާކުރުމަށް ނޫ ރާއްޖޭ ޕްރޮގްރާމުން އެދިފައިވެއެވެ. މި ސާވޭގައިnooraajje.org/oceanusesurveyލިންކް މެދުވެރިކޮށް އޮންލައިންކޮށް ބައިވެރިވެއެވެ. އަދި ސާވޭ ފެސިލިޓޭޓަރުން ކޮންމެ ރަށެއްގައި ވެސް އެ ރަށެއްގެ ސްޓޭކް ހޯލްޑަރުންނާ ބައްދަލުކޮށް މައުލޫމާތު އެއްކުރާނެއެވެ. މި ސާވޭގެ ޒަރިއްޔާއިން ލިބޭ ވަކިވަކި ޖަވާބުތަކުގެ ސިއްރު ހިފެހެއްޓާނެ ކަމުގެ ޔަގީންކަން ނޫ ރާއްޖެ ޕްރޮގްރާމުން ދީފައިވެއެވެ. ނޫ ރާއްޖޭ ޕްރޮގްރާމުން ބުނީ ސާވޭގެ ނަތީޖާއިން އެކުލަވާލެވޭ ހީޓްމެޕްތައް ދިވެހި ސަރުކާރަށާއި އާންމު ރައްޔިތުންނަށް ލިބޭނެ ކަމަށާއި، ހީޓްމެޕްތަކުގެ އަލީގައި ރާއްޖޭގެ ނޫ އިގްތިސޯދު ކުރިއެރުވުމަށް ކުރެވޭ މަސައްކަތްތަކަށާއި، މެރިން ސްޕޭޝަލް ޕްލޭނިންގެ މަސައްކަތްތަކަށް ބޭނުންވާ މައުލޫމާތު ލިބޭނެ ކަމަށެވެ.

ނޫ ރާއްޖޭ ގެ ސައިޓް މެނޭޖަރ ނިސްތަރަން ވިދާޅުވީ ހިމާޔަތް ކުރަން ޖެހޭ ސަރަހައްދުތައް ދެނެގަތުމަކީ ވަރަށް މުހިންމު ކަމެއް ކަމަށާއި، އަމާޒަކީ އެއީ ތިމާވެށީގެ ގޮތުން ފާހަގަކޮށްލެވޭ ސަރަހައްދުތަކެއްތޯ ބެލުމެވެ.

ނޫ ރާއްޖެއަކީ ރައީސުލްޖުމްހޫރިއްޔާގެ އޮފީހާއި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ގެ އިސްނެގުމާއެކު މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީއާއި، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓާއި، މިނިސްޓްރީ އޮފް ޓޫރިޒަމާއި އެންވަޔަރަންމަންޓަލް ޕްރޮޓެކްޝަން އޭޖެންސީއާއި، މޯލްޑިވްސް މެރިން ރިސަރޗް އިންސްޓިޓިއުޓް ހިމެނޭ ގޮތަށް، ސަރުކާރުގެ އެކި އިދާރާތަކާއި ގުޅިގެން ހިންގާ ޕްރޮގްރާމެކެވެ.

މި ޕްރޮގްރާމަކީ ބްލޫ ޕްރޮސްޕެރިޓީ ކޯލިޝަންގެ ވެއިޓް އިންސްޓިޓިއުޓާއި ވެއިޓް ފައުންޑޭޝަނާއި ނެޝަނަލް ޖިއޮގްރަފިކް ޕްރިސްޓީން ސީސްއާއި، ސްކްރިޕްސް އިންސްޓިޓިއުޝަން އޮފް އޯޝަނޯގްރަފީއާއި، ސީސްކެޗްކުގެ އިތުރުން އެންވަޔަރަންމަންޓަލް މާކެޓްސް ސޮލިއުޝަންސް ލެބާއި ޔޫސީ ސަންޓާ ބާބަރާއާއި، ޔޫސީއެލްއޭ އިންސްޓިޓިއުޓް އޮފް ދަ އެންވަޔަރަންމަންޓް އެންޑް ސަސްޓެއިނަބިލިޓީއާއި، އަދި މިނޫންވެސް އެހެނިހެން ބައިނަލްއަޤްވާމީ ފަރާތްތަކުގެ އެހީތެރިކަމާއެކު ކުރިއަށް ގެންދާ ޕްރޮގްރާމެކެވެ.