ޗައިނާގެ ޝިންޖާން ޕްރޮވިންސްގައި ދިރިއުޅެމުން އަންނަ ވީގަރ މުސްލިމުންނާމެދު އެޤައުމުގެ ސަރުކާރުން ހިންގާ ލާއިންސާނީ ޢަމަލުތައް ފޮރުވުމަށް މަސައްކަތްކުރާ ޓްވިޓާ އެކައުންޓްތަކެއް ބްލޮކްކޮށްފައިވާ ކަމަށް ރިޕޯޓްތައް ބުނެފިއެވެ.

އޮސްޓްރޭލިއަން ސްޓްރެޓީޖިކް ޕޮލިސީ އިންސްޓިޓިއުޓް (އޭއެސްޕީއައި) އިން ބުނީ ޓްވިޓާއިން 2،160 ފޭކް އެކައުންޓް ބްލޮކްކޮށްފައިވާ ކަމަށެވެ. އަދި މި އެކައުންޓްތަކަކީ ޗައިނާއިން ވީގަރ މުސްލިމުންނާ ދެކޮޅަށް ހިންގަމުންދިޔަ ލާއިންސާނީ ޢަމަލުތައް ފޮރުވުމަށް މަސައްކަތްކުރި އެކައުންޓްތަކެއް ކަމަށް އެ އިދާރާއިން ކުރި ދިރާސާތަކުން ދައްކައެވެ.

އޭއެސްޕީއައިގެ ދިރާސާއިން ދައްކާ ގޮތުގައި ޓްވިޓާއިން ބްލޮކްކުރި ޗައިނާގެ 2،048 އެކައުންޓަކީ ޗައިނާގެ ވެރިކަންކުރާ ކޮމިއުނިސްޓް ޕާޓީގެ ޕްރޮޕަގެންޑާ ފަތުރަމުންދިޔަ އެކައުންޓްތަކެކެވެ. އަދި އަނެއް 112 އެކައުންޓަކީ ޗައިނާގެ ޝިންޖާން މުސްލިމުން އެގައުމުގެ ސަރުކާރަށް ތައުރީފް ކުރާކަން ދެއްކުމަށް ދޮގު މައުލޫމާތު ފަތުރަމުންދިޔަ އެކައުންޓްތަކެއް ކަމަށެވެ.

މީގެ އިތުރުން މި ޓްވިޓާ އެކައުންޓްތަކަކީ އެމެރިކާގެ ވެރިކަމުގެ ނިޒާމަށް ފާޑުކިޔާ ގިނަ ޓްވީޓްތަކެއް ކުރަމުން ގެންދިޔަ އެކައުންޓްތަކެއް ކަމަށް އޭއެސްޕީއައިގެ ދިރާސާއިން ވަނީ ދައްކައިފައެވެ.

މީގެ ކުރިންވެސް ޗައިނާގެ ބައެއް ކުންފުނިތަކުން ވީގަރ މުސްލިމުންނާއި ދެކޮޅަށް ހިންގަމުންދާ ލާއިންސާނީ ޢަމަލުތައް ފޮރުވާން ވަނީ މަސައްކަތް ކޮށްފައެވެ. އެގޮތުން ޗައިނާގެ ގްލޯބަލް ޓެލެވިޒަން ނެޓްވޯކުން އުފެއްދި ޑޮކިއުމެންޓްރީއެއްގައި ދައްކުވައިދީފައިވަނީ ހަގީގަތާއި ހިލާފު ވާހަކަތަކެއްކަން ވަނީ ފަޅާއަރާފައެވެ.