ފަނޑިޔާރުންގެ ވަޒީފާ ގެއްލިދާނެތީ އެކަމުގެ ބިރު އެއީ އެތައް ބައެއްގެ ހައްގަށް އަރައިގަންނަން ލިބޭ ޓިކެޓެއް ނޫންކަމުގައި ކުރީގެ ރައީސް ޕީޕީއެމްގެ ރައީސް އަބްދުﷲ ޔާމީން ވިދާޅުވެއްޖެއެވެ.
ދެ އަހަރުގެ ޖަލު ހުކުމުގައި އޮންނެވުމަށްފަހު މިނިވަންވެ ފުރަތަމަ ފަހަރަށް އިދިކޮޅު ކޯލިޝަންގެ ޕޯޑިއަމްގައި ވާހަކަ ދައްކަވަމުން ރައީސް ޔާމީން ވިދާޅުވީ ފަނޑިޔާރުންނަކީ ގައުމުގެ މަސްލަހަތު ހިފެހެއްޓުމުގެ އެންމެ މަތީ މަސްލަހަތާއި ހަވާލުވެފައިވާ ބައެއް ކަމަށެވެ. ހުރިހާ ފަރާތަކުން ސަލާމަތްވެ ނުފޫޒުން އެއްކިބާވެގެން ތިބެން ޖެހޭ ބައެއް ކަމަށެވެ. އެއްވެސް ހާލެއްގައި ވަޒީފާ ގެއްލިދާނެކަމަށް ބަލައި، އަންނަ ނުފޫޒަށް ކަންކަން ނިންމާ ބަޔަކަށް ވެގެން ނުވާނެކަމަށެވެ. އަދުލު އިންސާފުގެ ތެރެއިން ނޫންގޮތަކަށް ކަންކަން ނިންމުމަކީ، އަދުލުވެރި ގޮތެއް ނޫންކަމަށް ރައީސް ޔާމީން ވިދާޅުވިއެވެ. އެއްވެސް މީހަކު މި ދުނިޔެ މައްޗަށް އަންނަނީ ވަޒީފާއަކާއެކު ނޫން ކަމަށާއި، ވަޒީފާ ގެއްލި އަނބިދަރިން ބިކަވެދާނެތީ އެއީ އެތައް ބައެއްގެ ހައްގަށް އަރައިގަތުމަށް ލިބޭ ޓިކެޓެއް ނޫން ކަމުގައި ޔާމީން ވިދާޅުވިއެވެ.
ޔާމީން ވަނީ، މީހެއްގެ މުސްތަގްބަލް ދުއްވާލައި، ދެ ތިން އަހަރު ޖަލުގައި ބޭއްވުމުން ފަނޑިިޔާރުންގެ ވަޒީފާ ގެއްލިދާނެތީ ހަމްދަރުދީވާ މީހުން އެ މަނިކުފާނުގެ އާއިލާއިން ތަހައްމަލްކުރީ ކޮންކަމެއްތޯ ނުބައްލަވަނީ ކީއްވެގެންތޯ ސުވާލު އުފައްދަވާފައެވެ. މި ކަމުގައި ވަކި ބަޔަކު ކުށްވެރި ނުކުރެއްވި ނަމަވެސް އަސަރާއެކު އެވާހަކަތައް ދައްކަވާނެ ކަމަށް ވިދާޅުވިއެވެ.
މި ވަގުތު އެންމެ ބޮޑު ކޮރުކަމެއް އޮތީ އަދުލުގެ ނިޒާމުގައި ކަމަށާއި، އެ ނިޒާމުގެ ތެރެއަށް މުއްސަނދި މަހުޖަނުން އަތްބޭނުން ރަނގަޅު ނޫން ކަމަށް ވިދާޅުވިއެވެ. އަދުލުގެ ނިޒާމުގައި އޮތް ކޮރު ކަމަށް ހައްލު އަންނަން ޖެހޭ ކަމަށް ވިދާޅުވިއެވެ.
ރައީސް ޔާމީން ވިދާޅުވީ އެމަނިކުފާނުގެ މައްސަލަ ބެއްލެވި ފަނޑިޔާރުންގެ ތެރެއިން ތިން ފަނޑިޔާރަކު ވާހަކަ ދައްކަވާ ކަމަށް ބުނާ އޯޑިއޯތަކެއް އާންމުވެ އެކަމުގެ ކަންބޮޑުވުން އުފެދުނު ނަމަވެސް އަދިވެސް އޯޑިއޯތަކުގެ ސައްހަކަން ކަށަވަރުކޮށް ނުދެއްވޭ ކަމަށެވެ. އަދި އެ މައްސަލާގައި ފަނޑިޔާރުންގެ ޖަމިއްޔާއިންވެސް އެއްޗެއް ނުބުނުމުން އިތުރު ސުވާލު އުފެދޭ ކަމަށެވެ. އެ އޯޑިއޯތަކުން އަދުލުގެ ނިޒާމަށް އޮތް ނުފޫޒު ހާމަވާ ކަމަށާ އެއީ ކަންބޮޑުވެވަޑައިގަންނަވާ ކަމެއް ކަަމަށް ވިދާޅުވިއެވެ. އެއްވެސް ވަރަކަށް އަދުލުވެރިކަމަށް ސުވާލު އުފެެދިއްޖެނަމަ އެއީ މުޅި ނިޒާމަށް ސުވާލު އުފެދޭ ކަމެއް ކަމުގައި ވިދާޅުވިއެވެ.
އަދި ފުރުސަަތު ލިބިވަޑައިގެންފިނަމަ ރާއްޖެއަކީ މާއްދީ ގޮތުން ފުރިހަމަ ތަނަކަށް ހައްދަވާނެ ކަމަށް ވިދާޅުވިއެވެ.
