ދެކުނު އެފްރިކާއިން ފެނިފައިވާ އައު ވޭރިއަންޓް އޮމިކްރޯނަށް ވެކްސިނެއް އުފެއްދުމުގެ މަސައްކަތްކުރަމުން އަންނަ ކަމަށާއި ކުރިޔަށް އޮތް ހަފްތާތަކުގައި ޓެސްޓްކުރެވޭ ވަރުވާނެ ކަމަށް ނޮވޭވެކްސުން ބުނެފިއެވެ.
އެކަމާއި ގުޅޭގޮތުން ނޮވޭވެކްސުން ބުނީ އެކުންފުނިން އުފައްދަމުން އަންނަ ވެކްސިންގައި ވައިރަސްގެ އަސްލު ސްޕްއިކް ޕްރޮޓީން ހުންނާނެއެވެ. އެ ސްޕައިކުން ބަލި ނުޖައްސާނެކަމަށާއި ނަމަވެސް މީހާގެ ދިފާއީ ނިޒާމަށް އަސަރުކުރުވާނެއެވެ. އެކުންފުނިން މިހާރު މަސައްކަތްކުރަމުން އަންނަނީ އައު ވޭރިއަންޓް ބީ.1.1.529ގެ ޖެނެޓިކް ސީކުއެންސަށް ބިނާކޮށް ސްޕްއިކް ޕްރޮޓީން ތަރައްޤީކުރުމުގެ މަސައްކަތެވެ.
ނޮވޭވެކްސްގެ ކޮވިޑް ވެކްސިނަށް އެމަރޖެންސީ ހުއްދަ އެންމެ ފުރަތަމަ ލިބިފައިވަނީ މިމަހު އިންޑޮނޭޝިޔާގައެވެ. އޭގެފަހުން ފިލިޕީންސްގައިވެސް ވަނީ އެވެކްސިން އެމަރޖެންސީ ބޭނުންކުރުމުގެ ހުއްދަދީފައެވެ.
ވެކްސިން އުފައްދާ އެހެން ކުންފުނިތައް ކަމުގައިވާ ޖަރުމަންގެ ބައޯއެންޓެކް އާއި ފައިޒަރ ގެ އިތުރުން ޖޯންސަން އެންޑް ޖޯންސަން އަދި މޮޑާނާއިންވެސް އަންނަނީ އެކުންފުނިތަކުން އުފައްދާފައިވާ ކޮވިޑް ވެކްސިން އައު ވޭރިއަންޓާ ދެކޮޅަށް މަސައްކަތްކުރާ މިންވަރު ދެނެގަތުމުގެ ޓެސްޓްތައް ކުރަމުންނެވެ.
