ރާއްޖެއަކީ މިހާތަނަށް ދިމާވެފައިވާ ބޮޑެތި ކާރިސާތަކުން އަަރައިގަތުމުގައި ކާމިޔާބު ހޯދާފައިވާ ގައުމެއްކަން ދުނިޔެއަށް ސާބިތުކޮށްދީފައިވާ ގައުމެއްކަމަށާއި ރާއްޖޭގައި އިންވެސްޓްކުރުމުގެ ފުރުސަތުތައް އެބައޮތްކަމަށް މިނިސްޓަރ އޮފް ހައުސިންގ އެންޑް އިންފްރާ ސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

އެމްޓީސީސީން ހިއްކައިގެން ތަރައްގީކުރި 3 ރަށް ހަވާލުކުރުމަށް ބޭއްވި ރަސްމިއްޔާތުކަމުގައިވާ "ސަންޓާރާ 3 އައިލެންޑްސް ޕްރޮޖެކްޓް" ޝަރަފްވެރިކޮށް ދެއްވައި ވާހަކަދައްކަވަމުން މިނިސްޓަރ ވަނީ، ރާއްޖެއަކީ ބޮޑެތި ކާރިސާތަކުން އަރައިގަތުމުގައި ފަސޭހަކަމާއެކު ކާމިޔާބު ހޯދާ ގައުމެއްކަން ފާހަގަކުރައްވައި، ރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ތަފާތު ކަންކަން ހުރިކަން ފާހަގަކުރައްވާ ވާހަކަދައްކަވާފައެވެ. އެގޮތުން 2004 ވަނަ އަހަރުގެ ސުނާމީ ކާރިސާއާއި، 2008 އަދި 2009ގައި ދުނިޔެއަށް ކުރިމަތިވި އިގުތިސާދީ ކާރިސާއާއި، މިހާރު މުޅި ދުނިޔެ ތަހައްމަލުކުރަމުންދާ ކޮވިޑް-19ގެ ޕެންޑަމިކުން އަރައިގަތުމުގައި ރާއްޖެއިން ކާމިޔާބު ހޯދާފައިވާކަމަށާއި، ރާއްޖޭގައި އެގާބިލްކަން އެބަހުރިކަމަށް މިނިސްޓަރ ވިދާޅުވިއެވެ.

ކޮވިޑް މެނޭޖްކުރުމުގައި ސަރުކާރުގެ ކަމާބެހޭ އިދާރާތަކުން ކާމިޔާބު ހޯދާފައިވާއިރު، ރާއްޖޭގެ ބޯޑަރު ހުޅުވާލައި ފަތުރުވެރިންނަށް ރައްކާތެރި މަންޒިލެއްގެ ގޮތުގައި ރާއްޖެއިން ދުނިޔެއަށް ދެއްކި ދެއްކުމުގައިވެސް ކާމިޔާބު ހޯދާފައިވާކަމަށް މިނިސްޓަރ ވިދާޅުވިއެވެ. އެގޮތުން ކޮވިޑްގެ ކުރިން ރާއްޖެއަށް ފަތުރުވެރިން އައި މިންވަރަށް މިހާރު ރާއްޖެއަށް ފަތުރުވެރިން އަންނައިރު، އެއީ ކުރިން އެންމެ ބޮޑު އެއް މާކެޓްގެ ގޮތުގައި ބެލެވުނު ޗައިނާގެ މާކެޓާ ނުލައި ކަމަށް މިނިސްޓަރ ވިދާޅުވިއެވެ. އެހެންކަމުން މިކަމުގައި ރާއްޖެއިން ކުރިއެރުންތަކެއް ހޯދާފައިވާކަމަށް މިނިސްޓަރ ވިދާޅުވިއެވެ.

މީގެއިތުރުން ފަޅުތެރޭގައި ތިން ރަށެއް ހިއްކައި، އެކަށީގެންވާ ރައްކާތެރިކަމުގެ ފިޔަވަޅުތަކާއެކު ތަރައްގީކޮށްފައިވާއިރު، މިއީ ރާއްޖެއަށް ކުރިމަތިވެފައިވާ މޫސުމީ ބަދަލުތަކުގެ އަސަރުތަކުން އަރައިގަތުމަށްވެސް ހައްލެއްގެ ގޮތުގައި ބެލެވިގެންދާކަމެއްގެ ގޮތުގައި މިނިސްޓަރ ފާހަގަކުރެއްވިއެވެ. ހިއްކައިގެން ރަށްތަކެއް ތަރައްގީކޮށްފައިވާތީ، އެކަންކަމުގެ މައްޗަށް ސަމާލުވުމަށް މިނިސްޓަރ ވަނީ، މިތަން ހިންގުމާ ހަވާލުވާ ސަންޓާރާގެ ކިބައިން އެދިވަޑައިގެންފައެވެ.

އެމްޓީސީސީން ދެ އަހަރުގެ ތެރޭގައި މިރަށްތައް ތަރައްްގީކޮށްފައިވާއިރު، މިނިސްޓަރ ވިދާޅުވީ، ސަތޭކަ އިންސައްތަ ދިވެހިން ހިއްސާވާ ކުންފުންޏަކުން މިފަދަ ބޮޑު މަސައްކަތެއް ކާމިޔާބު ކަމާއެކު ނިންމާލުމުން އެކަމާ ފަޚުރުވެރިވާކަމަށެވެ.