ތާލިބާނާއި އެމެރިކާއާ ދެމެދު ކުރާ މަޝްވަރާތައް އަންނަ ހަފުތާގައި ފެށުމަށް އިއުލާން ކޮށްފިއެވެ.

މި މަޝްވަރާތައް ބޭއްވުމަށް ތައްޔާރުވަމުން އަންނަނީ ގަތަރުގައެވެ. އެމެރިކާގެ ޚާރިޖިއްޔާގެ ތަރުޖަމާނު ނެޑް ޕްރައިސް ވިދާޅުވީ އެމެރިކާގެ ފަރާތުން މަޝްވަރާގައި އިސްކޮށް ބައިވެރިވެވަޑައިގަންނަވާނީ އަފްގާނިސްތާނަށް ޚާއްސަ މަންދޫބު ޓޮމް ވެސްޓް ކަމަށެވެ. މި މަޝްވަރާތަކުގައި އިންސާނީ އެހީ ފޯރުކޮށްދިނުމާ ގުޅޭ ގޮތުންނާއި، ޓެރަރިޒަމާއި ދެކޮޅަށް މަސައްކަތް ކުރުމާ ބެހޭ ގޮތުން ފުޅާދައިރާއެއްގައި މަޝްވަރާ ކުރެވޭނެއެވެ.

އަފްޣާނިސްތާނުގެ ވެރިކަމާ އޮގަސްޓް މަހު ތާލިބާނުން ހަވާލުވުމަށްފަހު އެގައުމަށް އިގްތިސާދީ ގޮތުންވެސް ބޮޑެތި ގޮންޖެހުންތަކެއްވަނީ ކުރިމަތި ވެފައެވެ. އަދި އިންސާނީ އެހީ ހޯދުމަށްވެސް ބޮޑެތި ގޮންޖެހުންތަކެއްވަނީ ކުރިމަތިވެފައެވެ.

ތާލިބާނުން ވެރިކަމަށް އައުމަށް ފަހު އޮކްޓޫބަރު މަހުގައިވެސް ގަތަރުގައި އެމެރިކާއާއެކު ބައްދަލުވުމެއް ބޭއްވިއެވެ. އޭގެ ފަހުން ޕާކިސްތާނުގައި ވެސް މި މަހުގެ ކުރީކޮޅު ވަނީ ބައްދަލު ކޮށްފައެވެ. މި ބައްދަލުވުންތަކުގައިވެސް އެމެރިކާއިން ބުނަމުންދަނީ ތާލިބާނުންނަށް އެހީ ލިބޭނީ ޝަރުތުތަކެއްކެއްގެ މަތިން ކަމަށެވެ. އެގޮތުން، ޓެރަރިޒަމާ ދެކޮޅު ހަނގުރާމަ ވަރުގަދަ ކުރުމާއި، އެންމެންގެ ބައިވެރިވުން ހިމެނޭ ސަރުކާރެއް ގާއިމްކުރުމާއި، އަންހެނުންނާއި މައިނޯރިޓީންގެ ހައްގުތައް ދިނުމަށް ވަނީ ޝަރުތުކޮށްފައެވެ.