އަފްޣާނިސްތާނުގެ މިސްކިތެއްގައި ބޮމެއް ގޮއްވާލައިފިއެވެ.
މިހާދިސާ ހިނގާފައި ވަނީ ހުކުރު ނަމާދު ވަގުތުގައި ކަމަށް ތާލިބާނުގެ އޮފިޝަލުން މައުލޫމާތުދެއެވެ. ބޮމުގެ ހާދިސާގައި ތިން މީހަކު މަރުވެ 15 މީހަކު ޒަޚަމްވެފައިވާ ކަމަށް ނަންގަރްހާރު ޕްރޮވިންސްގައި ހުންނަ ހޮސްޕިޓަލުން ބުނެއެވެ. މިހާދިސާ ހިނގާފައިވަނީ އަފްޣާނިސްތާނުގެ ނަންގަރްހާރު ޕްރޮވިންސްގެ ސްޕިންގާރުގައެވެ.
އަފްޣާނިސްތާނުގައި އޮންނަ އިސްލާމިކް ސްޓޭޓް ގްރޫޕުން ބުނީ މީގެ ޒިންމާ ތާލިބާނުން ނަގަން ޖެހޭނެ ކަމަށެވެ.
ނޮވެމްބަރ މަހުގެ ކުރީކޮޅުގައި އައިއެސްގެ ހަތިޔާރުއެޅި ހަނގުރާމަވެރިންތަކެއް ވަނީ އަފްޣާނިސްތާނުގެ ކާބުލް މިލިޓަރީ ހޮސްޕިޓަލަށްް ވަދެ އެތަނުގައި ތިބި މީހުންނަށް ހަމަލާދީފައެވެ. މިހާދިސާގައި 19 މީހަކު ވަނީ މަރުވެފައެވެ. އަދި 50 މީހަކަށް އެކިވަރުގެ އަނިޔާތައް ލިބުނެވެ.
މިއަހަރުގެ ތެރޭގައި އައިއެސްގެ ހަނގުރާމަވެރިން ދެ މިސްކިތަކަށް ދިން ހަމަލާތަކުގައި 120ށް ވުރެ ގިނަ މީހުން ވަނީ މަރުވެފައެވެ.
