2070 ވަނަ އަހަރު އިންޑިޔާއިން ނެޓް ޒީރޯގެ ޓާގެޓަށް ވާސިލުވުމަށް ކަނޑައަޅާފައިވާ ލަނޑުދަނޑި ހާސިލުކުރުމަށް އިލެކްޓްރިކް ވެހިކަލް ޗާރޖިންގ ސްޓޭޝަންތައް ހެދުމަށް ހަމަޖެހިފައިވާކަން އެގައުމުން އިއުލާންކޮށްފިއެވެ.
އިންޑިޔަން އޮއިލް ކޯރޕް (އައިއޯސީ)ން ކުރިޔަށް އޮތް ތިން އަހަރު އިންޑިޔާގެ އެކި ހިސާބުތަކުގައި 10،000, އިލެކްޓްރިކް ވެހިކަލް ޗާރޖިންގ ސްޓޭޝަންތަކެއް ހަދާނެކަމަށް އެކުންފުނީގެ ޗެއާރމަން ވިދާޅުވިއެވެ. މީގެއިތުރުން ބާރަތު ޕެޓްރޯލިއަމް ކޯރޕް(ބީޕީސީއެލް)ން ވެސް ވަނީ އެފަދަ 7000 ސްޓޭޝަން ކުރިޔަށް އޮތް އަހަރުތަކުގައި ހަދާނެކަމަށް ބުނެފައެވެ. މީގެއިތުރުން ސެޕްޓެމްބަރ މަހު ހިންދުސްތާން ޕެޓްރޯލިއަމް ކޯރޕް (އެޗްޕީސީއެލް)ން ވެސް ވަނީ ކުރިޔަށްއޮތް ތިން އަހަރު 5000 އިލެކްޓްރިކް ސްޓޭޝަން ހަދާނެއެވެ.
އިންޑިޔާގެ ބޮޑުވަޒީރު ނަރެންދްރަ މޯދީ ވަނީ އިންޑިޔާއިން ނެޓް ޒީރޯއަށް ވާސިލުވުމަށް ނިންމާފައިވަނީ 2070 ވަނަ އަހަރަށް ކަމަށް އިއުލާންކުރައްވާފައެވެ. މީގެއިތުރުން 2030 ވަނަ އަހަރު އަންނަންވާއިރަށް އިޔާދަކުރަނިވި ހަކަތަ ބޭނުންކުރާ މިންވަރު 38 އިންސައްތައިން 50 އިންސައްތައަށް އަރާނެކަމަށް ވަނީ ވިދާޅުވެފައެވެ. އަދި ޖައްވަށް ދޫކުރާ ވިހަ ގޭސް, އެތައް ބިލިއަން ޓަނަކުން މަދުވާނެކަމަށް ވިދާޅުވިއެވެ.
އައިއޯސީއަކީ އިންޑިޔާގެ އެންމެ ބޮޑު, ފިޔުލް އުފައްދާ އަދި ވިއްކާ ކުންފުންޏެވެ.
މުޅި ދުނިޔެއަށް ބަލާލާއިރު އެންމެ ބޮޑަށް ތެލާއި ގޭސް އުފައްދާ ކުންފުނިތަކުން ވަނީ 2050 ވަނަ އަހަރު އަންނަންވާއިރަށް, ޖައްވަށް ދޫކުރާ ވިހަ ގޭސް މަދުކުރުމުގެ ސިޔާސަތު ހާމަކޮށްފައެވެ.
