ފަރުތައް ހިމާޔަތް ކުރުމަށް އެންމެ ގިނަ މަސައްކަތްތަކެއް ކުރަމުން އަންނަނީ އިންޑޮނީޝިއާއިން ކަމަށް ދިރާސާއަކުން ދައްކައިފިއެވެ. އިންޑޮނީޝިއާގައި ފަރުތައް އަލުން ދިރުވުމަށް 500ށް ވުރެ ގިނަ މަޝްރޫއު މިހާރުވެސް ދަނީ ހިންގަމުންނެވެ.
މި ދިރާސާ ހެދުމުގައި އެންމެ އިސްދައުރެއް އަދާކުރި ސައިންޓިސްޓަކު ފާހަގަ ކުރި ގޮތުގައި އިންޑޮނޭޝިއާއިން ހިންގާ ޕްރޮޖެކްޓްތަކުގެ ސަބަބުން ގިނަ ޒަމާންތަކެއް ވަންދެން އެގައުމުގެ ފަރުތައް ރައްކާތެރި ކުރެވިފައި ހުންނާނެއެވެ. އިންޑޮނީޝިއާއިން މަސައްކަތް ކުރަމުން އަންނަނީ 30 މިލިން ހެކްޓަރުގެ ސަރަހައްދެއްގެ ފަރުތައް ހިމާޔަތް ކުރުމަށެވެ.
އެއީ ދެކުނު އިރުމަތީ އޭޝިއާގެ "ކޮރަލް ޓްރޭންގަލް"ގެ ނަމުން މަޝްހޫރުވެފައިވާ ދުނިޔޭގެ ފަރުތަކުގެ ތިންބައިކުޅަ އެއްބައެވެ. މޫސުމީ ބަދަލުތަކާއެކު ދުނިޔެ ހޫނުވުމުގެ ސަބަބުން މާބޮޑު އަސަރެއް މިފަރުތަކަށް ކޮށްފައި ނުވާ ކަމަށް މި ދިރާސާއިން ދައްކައެވެ.
ގްލޯބަލް ކޮރަލް ރީފް މޮނިޓަރިންގ ނެޓްވޯރކުން ހެދި ދިރާސާއަކުން ދައްކާ ގޮތުގައި މޫސުމީ ބަދަލުތަކާއެކު ދުނިޔެ ހޫނުވުމުގެ ސަބަބުން 2009ން 2018 އާއި ދޭތެރޭގައި ދުނިޔޭގެ ފަތުތަކުގެ 14 އިންސައްތައް ވަނީ ހަލާކުވެގެން ގޮސްފައެވެ.
