ނޭޝަނަލް ޑްރަގް އެޖެންސީން (އެންޑީއޭ)އިން ދެމުންދާ ހުރިހާ ޚިދުމަތްތަކަކީ ހިލޭ ފޯރުކޮށްދެވޭ ޚިދުމަތްތަކެއް ކަމަށް އެ އެޖެންސީން ބުނެފިއެވެ.
އެންޑީއޭއިން ބުނީ މަސްތުވާތަކެއްޗާބެހޭ ގާނޫނުގެ ދަށުން އެ އޭޖެންސީއާއި ހަވާލުކުރެވިފައިވާ މަސްއޫލިއްޔަތުތަކުގެ ތެރެއިން, މަސްތުވާތަކެތި ބޭނުންކުރުމުގެ މައްސަލަ ހުންނަ މީހުންނަށް ފަރުވާދީ، ރީއިންޓަރގްރޭޓްކޮށް އަލުން އަނބުރާ މުޖުތަމައަށް ނެރުމުގެ ގޮތުން އެ އޭޖެންސީން ފޯރުކޮށްދޭ އެއްވެސް ޚިދުމަތަކީ އަގު ނަގާގޮތަށް ދެވޭ ޚިދުމަތެއް ނޫން ކަމަށެވެ. އަދި އެ އޭޖެންސީގެ އެންމެހާ ޚިދުމަތްތަކަކީ ހިލޭ ފޯރުކޮށްދެވޭ ޚިދުމަތްތަކެއް ކަމަށް އެންޑީއޭއިން ބުނެއެވެ.
އެންޑީއޭއިން ބުނީ އެ އޭޖެންސީގެ ޑޮކްޓަރަށް ދެއްކުމާއި، ބޭސް ފޯރުކޮށްދިނުން ފަދަ ބައެއް ޚިދުމަތްތަކަކީ އަގު ނަގައިގެން ފޯރުކޮށްދެވޭ ޚިދުމަތްތަކެއް ކަމުގައި ބައެއް ފަރާތްތަކަށް އޮޅުންއަރާފައިވާ ކަމަށެވެ.
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ދަށުން ހިންގަމުން އައި "ނޭޝަނަލް ޑްރަގް އެޖެންސީ" މިނިސްޓްރީ އޮފް ހެލްތުގެ ދަށުން ހިނގަމުންދާ އިދާރާއެއްގެ ގޮތުގައި ވަނީ ހަމަޖައްސާފައެވެ.
އެންޑީއޭގައި ފަރުވާގެ ނިޒާމު އެހާ ރަނގަޅަށް ހިނގަމުން ނާންނަ ކަމުގެ ޝަކުވާ ފަހަކަށް އައިސްވަނީ އިތުރުވެފައެވެ. މިއާއެކު އެތަން ހަރުދަނާ ކުރުމުގެ މަސައްކަތް ސަރުކާރުން ވަނީ ފަށާފައެވެ.
މަސްތުވާތަކެއްޗަށް ހުޅުވިފައިވާ ހުރިހާ ދޮރުތަކެއް ބަންދުކޮށް, ތަންފީޒީ އިދާރާތަކަށް އޮންނަ ނޭއްގާނީ ނުފޫޒުތައް ކަނޑުވާލައި، މިނިވަންކަމާއި ޕްރޮފެޝަނަލްކޮށް މަސައްކަތްކުރެވޭނެ ޖާގަ ހޯދައިދިނުމަކީ މިސަރުކާރުގެ މެނިފެސްޓޯގައި ހިމެނޭކަމެކެވެ.
