ރާޒުވާއަކީ އިހު މީހުން އާންމުކޮށް ޖަގަހަތަކުގައި ކުޅޭ ކުޅިވަރެކެވެ. ޚާއްސަކޮށް ރަމަޟާން މަހު ރޯދަ ކުރުކުރުމަށް މި ކުޅިވަރު ކުޅޭ އެތައް ބަޔަކު ދިވެހިރާއްޖޭގައި އުޅެއެވެ. އެހެންނަމަވެސް މި ފަހުން ގައުމީ ފެންވަރުގައި ރާޒުވާ ކުޅޭ ދިވެހި ކުޅުންތެރިން ވަނީ ބައިނަލްއަގުވާމީ މުބާރާތްތަކުގައިވެސް އެތައް ކާމިޔާބީތަކެއް ހޯދާފައެވެ.

ރާޒުވާއަކީ ވަކި އުމުރަކަށް އޮތް ކުޅިވަރެއް ނޫނެވެ. އަދި މި ކުޅިވަރަކީ އިންސާނާގެ ސިކުނޑި ތަނަވަސްކޮށްދޭ ކުޅިވަރެކެވެ. އާންމުކޮށް ސައުތު އޭޝިއާގެ ގިނަ ސްކޫލުތަކުގައި މި ކުޅިވަރު އެ ސްކޫލުތަކުގެ ކަރިކިއުލަމުގައި ހިމަނައިގެން ކުޅެއެވެ. އުމުރުން ޅަ ކުޅުންތެރިން ގައުމުތަކުގެ ޗެމްޕިއަނުންގެ ގޮތުގައިވެސް އެބަތިއްބެވެ. އޭގެ ތެރެއިން ފާހަގަކޮށްލެވޭ އެއް ކުޅުންތެރިޔަކީ ސްރީ ލަންކާގެ ރާޒުވާގެ ރާނީ ސަޗިނީ ރަނަސިންހޭއެވެ.

މި މަހު ރާއްޖޭގައި ބޭއްވި އިންޓަ އޮފީސް ރާޒުވާ މުބާރާތުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) ޓީމަށް ކުޅުމަށް ރާއްޖެ އައި ސަޗިނީ ވަނީ މެޗަކުން ބަލިނުވެ އެޓީމާއެކު އެ މުބާރާތުގެ ރަން މެޑަލް ހޯދާފައެވެ.

ރާޒުވާ ކުޅޭތާ މިހާރު 23 އަހަރުވެފައިވާ ސަޗިނީ ރާއްޖޭގެ މީޑިއާތަކަށް ދިން އިންޓަވިއުއެއްގައި ބުނީ ރާޒުވާއަކީ ވަކީ އުމުރަކަށް، ޖިންސަކަށް އޮތް ކުޅިވަރެއް ނޫން ކަމަށެވެ. އެގޮތުން އުމުރުން 70 އަހަރުން މަތީގެ ކުޅުންތެރިންވެސް ބައިނަލްއަގުވާމީ މުބާރާތްތަކުގައި މިހާރުވެސް ވާދަކުރަމުން އަންނަ ކަމަށް ސަޗިނީ ބުންޏެވެ. އެގޮތުން ދުނިޔޭގެ ފެންވަރުގައި އުމުރުން 12 އަހަރުގެ ރާޒުވާ ކުޅުންތެރިންވެސް ޗެސް ގްރޭންޑް މާސްޓާސްގެ ގޮތުގައި ތިބިކަން ސަޗިނީ ފާހަގަކުރިއެވެ.

ސަޗިނީ ބުނީ ރާޒުވާގެ ސަބަބުން ހަމަޖެހި ކަންކަންމުގައި ރަނގަޅަށް ފޯކަސް ކޮށްގެން ރަނގަޅު ވަގުތުގައި ދެން ކަންތައް ވާނެ ގޮތަކަށް ވިސްނައި، އެއަށްފަހު ނިންމުންތައް ނިންމަން ދަސްވާ ކަމަށެވެ. އެގޮތުން ސަޗިނީ ދެކޭ ގޮތުގައި ޗެސް އަކީ މެޑިޓޭޝަނެކެވެ. އަދި ސިކުނޑި ތަނަވަސްވެ ސިކުނޑި ޑިވެލޮޕްވާން ރާޒުވާގެ ސަބަބުން ފުރުސަތު ލިބޭ ކަމަށް ސަޗިނީ ބުންޏެވެ.

ސަޗިނީ ބުނީ އަންހެނުން ހުއްޓާނުލައި ރާޒުވާ ކުޅޭތަން ދެކުން އެއީ އޭނާގެ ހުވަފެނެއް ކަމަށާއި، އެކަމަކު މިހާރު ކުޑައިރު ރާޒުވާ ކުޅޭ ކުޅުންތެރިން އޭ ލެވަލް އަށްފަހު ރާޒުވާ ކުޅުން ހުއްޓާލާތަން ފެންނަ ކަމަށެވެ. މި ފަހަރުގެ އިންޓަ އޮފީސް މުބާރާތަށް ރާއްޖެ އައިސް ހުރިއިރު، ސަޗިނީއަށް ފާހަގަވި އެންމެ ބޮޑު މަންޒަރަކީ ބައިނަލްއަގުވާމީ ތަޖުރިބާއެއް ނެތިވެސް ރާއްޖޭގެ ރާޒުވާ ކުޅުންތެރިން މަތީ ފެންވަރުގައި ރާޒުވާ ކުޅޭތަނެވެ.

އުމުރުން 13 އަހަރުގައި ލަންކާގެ އަންހެން ޗެމްޕިއަންކަން ހޯދި ސަޗިނީ ރާއްޖޭގެ މުބާރާތެއްގައި ވާދަކުރިއިރު، އޭނާ ވަނީ ޖުމްލަ ހަތަރު ފަހަރު ލަންކާގެ ޗެމްޕިއަންކަން ހޯދާފައެވެ. މީގެ އިތުރުން 2011 ވަނަ އަހަރު ވިމެންސް އިންޓަނޭޝަނަލް މާސްޓާ ޓައިޓަލްވެސް ވަނީ ހޯދާފައެވެ.