އދ. ދަނގެތިން ހައްޔަރު ކުރި މުހައްމަދު ޖަމްޝާދާއި، ޝާރިހު އަލީ ދޫކޮށްލައިފިއެވެ.

ފުލުހުންގެ މީޑިއާ އޮފިސަރު ވިދާޅުވީ 31 އަހަރުގެ ޖަމްޝާދާއި، 20 ޝާރިހު މިމަހުގެ 23 ވީ ހޮނިހިރު ދުވަހު ދޫކޮށްލާފައިވާ ކަމަށެވެ. އަދި 21 ވީ ބުރާސްފަތި ދުވަހު އެ މީހުންނާއެކު ހައްޔަރުކުރި އަންހެން މީހާ ދޫކޮށްލާފައިވާ ކަމަށެވެ. ނަމަވެސް އިތުރު ތަފްސީލެއް ނުދެއެވެ.

ރާއްޖެއެމްވީއަށް އިތުބާރުހުރި ފަރާތަކުން މައުލޫމާތު ދިން ގޮތުގައި ޖަމްޝާދާއި، ޝާރިހު ހައްޔަރުކޮށްފައިވަނީ ޑްރަގް ޓްރެފިކިންގެ މައްސަލައެއްގައެވެ.

އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި ދަނގެތީގެ ވިޔަފާރިވެރިޔާ 57 އަހަރުގެ މަހުމޫދު އަބޫބަކުރު ގެއްލިގެން ހޯދަނިކޮށް ފެނުނީ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ.

މިމަރާ ގުޅިގެން އެރަށުގެ ރައްޔިތުން ޖަމްޝާދާއި، ޝާރިހަށް ތުހުމަތު ކުރިއެވެ. އެ މައްސަލައާ ގުޅިގެން އެ ދެމީހުންގެ އިތުރުން އިތުރު އަންހެނަކަށް ހިމާޔަތް ދީގެން އދ. މަހިބަދޫ ގެންދިޔައެވެ. އަދި އެމީހުން ހައްޔަރުކުރީ އެހެން މައްސަލައެއްގައި ކަމަށް ފުލުހުން ހާމަކޮށްފައިވަނީ މި މަހުގެ 15 ވީ ހުކުރު ދުވަހުގެ ވަގުތެއްގައެވެ.

މަހުމޫދު މަރުގެ މައްސަލައާ ގުޅިގެން އެރަށުގައި ގިނަ އަދަދެއްގެ ފުލުހުން ދަނީ ހަރަކާތްތެރިވަމުންނެވެ. ރަށުގެ އެކި ސަރަހައްދުތައް ބަންދުކޮށްފައިވާއިރު، ތަހުގީގަށް ބޮޑެތި ކުރިއެރުންތަކެއް ލިބިފައިވެއެވެ. އަދި ތަހުގީގަށް ބޭނުންވާ ބައެއް ހެކިތައް ހޯދިފައިވެއެވެ. އެގޮތުން މަހުމޫދުގެ މޯބައިލް ފޯނު ހޯދާފައިވާ ކަމަށް މައުލޫމާތު ލިބެއެވެ.

މަހުމޫދު މަރާލި މައްސަލައިގެ ތުހުމަތުގައި ބަންގްލަދޭޝް ރައްޔިތެއް ކަމަށްވާ މުހައްމަދު ސާލިމް މި މަހުގެ 16 ވީ ހޮނިހިރު ދުވަހު ހައްޔަރުކުރި ނަމަވެސް އޭނާ އެކަނި މި އަނިޔާވެރި އަމަލު ނުހިންގޭނެ ކަމަށް އާއިލާއިން ބުނެއެވެ. ސާލިމް އަކީ މަޑުމައިތިރި، ނަމާދު ކުރާ ރަނގަޅު މީހެއް ކަމަށާއި، އޭނާ އެފަދަ ކަމެއް ކުރާނެ ކަމަށް ގަބޫލުކުރަން ދަތިކަމަށް ވެސް އާއިލާއިން ބުނެއެވެ.