ޗައިނާ ސަރުކާރުގެ އެދުމުގެ މަތީން އެޕަލް އެޕް ސްޓޯރުން ޤުރުއާން މަޖީދު އެޕް ނަގައިފިއެވެ.
މި އެޕަކީ މުޅި ދުނިޔޭގެ އެކި ސަރަހައްދުން ދެ މިލިއަނާ ގާތްކުރާ އަދަދަށް މީހުން ބޭނުންކުރާ އެޕެކެވެ. އެހެން ނަމަވެސް އެޕަލްގެ ޗައިނާގެ އެޕް ސްޓޯރުން ޤުރުއާން މަޖީދު ނަގާފައިވަނީ ދީނީ ހަމަނުޖެހުން އަތުވެދާނެތީ, ޗައިނާގެ ސަރުކާރުގެ އެދުމުގެ މަތީން ކަމަށް އެޕަލްއިން ބުނެއެވެ.
އެޕަލްއިން ބުނީ މި އެޕް ޗައިނާގެ އެޕް ސްޓޯރުން ނެގީ އެގައުމުގެ ގާނޫނު އަސާސީއަށް އިހުތިރާމް ކުރުމުގެ ގޮތުން ކަމަށާއި، ނަމަވެސް އެ އެޕަކީ ދުނިޔޭގެ އެކި ސަރަހައްދުތަކުން އެތައް ހާސް ބަޔަކު ބޭނުން ކުރަމުން އަންނަ, މީހުންގެ އިތުބާރު ލިބިފައިވާ އެޕެއް ކަމަށެވެ. އަދި އެޕަލްއިން މީހުންގެ ދީންތަކަށް އަބަދުވެސް އިހުތިރާމް ކުރާނެ ކަމަށާއި، އެކަމުގެ ޔަގީންކަން ޗައިނާގެ މުސްލިމުންނަށް ދޭން ބޭނުންވާ ކަމަށް އެޕަލްއިން ބުނެއެވެ.
ޗައިނާގެ އެދުމުގެ މަތީން އެޕަލްއިން ޤުރުއާން މަޖީދު އެޕް ނަގާފައިވާއިރު، ޗައިނާއިން މުސްލިމުންނަށް ތަފާތު އެކި އަނިޔާ ދެމުންދާ ކަމަށް މީގެ ކުރިން ވަނީ ރިޕޯޓްކޮށްފައެވެ. އެގޮތުން އެގައުމުގައި ދިރިއުޅޭ ވީގްރޫ މުސްލިމުންނަށް ލާއިންސާނީ އަނިޔާ ދެމުން ގެންދާ ކަމަށް ވަނީ ރިޕޯޓްކޮށްފައެވެ.
