އަންގާރަ ދުވަހު ނޫސްތަކުގެ ފަލަ ސުރުޚީން ޖާގަ ހޯދީ އެދުރުންގެ މަސައްކަތުގެ ވާހަކައާ އެދުރުން ޅަ ޖީލެއް ބިނާ ކުރުމަށް ކުރަމުން ގެންދާ މަސައްކަތުގެ ވާހަކަ އެވެ. ތެދެކެވެ. އެދުރުންނަކީ ނުހަނު ބުރަ މަސައްކަތާއިއެކު ގައުމުގެ މުސްތަގުބަލު ބިނާ ކުރުމުގެ ޒިންމާ ކޮނޑު އަޅައިގެން ތިބޭ ބައެކެވެ. އެކަމަކު އެދުރުންނަށް އެންމެ އެކަށޭނެ މުސާރަ ލިބޭތޯ މިއީ އުފެދޭ ބޮޑު ސުވާލެކެވެ.
މީގެ ކުރިން ރައީސް އަބްދުﷲ ޔާމީންގެ ސަރުކާރުގައި އެދުރުންގެ މުސާރަ ކުޑަވެގެން ހަޅުތާލާއި ހަމައަށް ނުކުތްތަން ފެނުނެވެ. ކަޅު ހެދުމުގައި ސްކޫލަށް ނުކުތް ދުވަސްވެސް މާޒީވެ ގޮސްފިއެވެ. އެކަމަކު އަދިވެސް އެދުރުންނަށް އެންމެ އެކަށޭނެ މުސާރަ ދެވޭބާވައޭ ހިތަށް އަރައެވެ.
އެދުރުންނަކީ ހެނދުނު ހޭލާ ގޮތަށް މުޅި ދުވަހު ސްކޫލުގެ މަސައްކަތުގައި ޝާމިލުވެގެން އުޅޭބަޔެކެވެ. ސްކޫލުގައި އެދުރުން ކިޔަވާ ދިނުމަށްފަހު، ކުރިޔަށް އޮތް ދުވަހުގެ ލެސަން ޕްލޭންތައް ހެދުމުގެ މަސައްކަތް ކުރެއެވެ. އެހެންގޮސް ސްކޫލުގައި އިތުރު ހަރަކާތެއް އޮތް ނަމަ އެކަން ރާވައި އިންތިޒާމް ކުރުމުގައިވެސް އެދުރުން ހަރަކާތްތެރިވެއެވެ. ދުވަސް ނިންމާލެވޭނީ އާންމުކޮށް ރޭގަނޑު ނިދަން ކައިރިވެފައިވަނިކޮށެވެ.
އެހެން ނަމަވެސް ތައުލީމީ ދާއިރާގައި ހަރަކާތްތެރިވާ ތައުލީމު އުނގަންނައިދޭން ތިބޭ އެދުރުންގެ އާންމު މުސާރަ އަކީ ފަނަރަ ހާހެއްހާ ރުފިޔާއެވެ. އެއީ މާސްޓާސް ނަގައިގެން ތިބޭ އެދުރުންނަށްވެސް އާންމުކޮށް ލިބޭވަރެވެ. އެކަމަކު ތައުލީމީ ދާއިރާއެއް ނޫން ދާއިރާއެއް އިޚުތިޔާރު ކޮށްފިނަމަ އެ އެދުރު މީހާއަށްވެސް ގާތް ގަނޑަކަށް ވިއްސަކަށް ހާސް ރުފިޔާއާ ގާތް ކުރާ އާމްދަނީއެއް ލިބުމުގެ ފުރުސަތު އޮވެއެވެ. އެގޮތަށް އެދުރުން ތައުލީމީ ދާއިރާ ދޫކޮށްލާނަމަ ދެރަ ލިބޭނީ އަޅުގަނޑުމެންގެ ޅަ ދަރީންނަށެވެ.
ގައުމީ ޔުނިވަރސިޓީގެ ފެކަލްޓީ އޮފް އެޑިއުކޭޝަނަށް ބަލާލަމާ ހިނގާށެވެ. ނިމިދިޔަ އިންޓޭކްގައިވެސް އެ ފެކަލްޓީގެ ބައެއް ކޯސްތައް ނުފެށި ހުރީ އެންމެ އެކަށޭނެ މިންވަރަށް ކުދިން ކޯހަށް ކުރިމަތިލާފައި ނުވުމުންނެވެ. މިއިން ދޭހަވަނީ ބޮޑުވަމުން އަންނަ ޒުވާނުން ތައުލީމީ ދާއިރާއަށް ދާން ބޭނުންނުވާ ކަމެވެ. ސަބަބަކީ ކޮބައިތޯ ބަލާއިރު، ފަށަން ޖެހޭނީ މުސާރައިގެ ވާހަކައިންނެވެ. ފުރަ މާލޭގައި ދިރިއުޅެން ގިނަ ޚަރަދުތަކެއް ހިނގާއިރު، ޓީޗަރުންނަށް ލިބޭ ފަނަރަ ހާސް ރުފިޔާއިން ދެކޮޅު ނުޖެހެއެވެ. އެހެންކަމުން މުދަރިއްސުންގެ ދުވަސް ސަރުކާރުން ފާހަގަ ކުރާއިރު، މުދައްރިސުންގެ ކެކުޅުންތަކަށް ފަރުވާ ހޯދާދީފައި އެ ދުވަސް ފާހަގަ ކުރުން އެއީ މާ އައުލާކަން ބޮޑު ކަމެކެވެ.
