ދުނިޔޭގެ ފަތުރުވެރިކަމުގެ ދުވަހާ ގުޅިގެން ހއ. ތުރާކުނުން ފެށިގެން އައްޑޫ ސިޓީގެ އެންމެ ދެކުނަށް "ޖެޓްސްކީ ޓުއަރ 2021" ގެ ނަމުގައި ކުރިއަށްގެންދިޔަ ޖެޓްސްކީ ދަތުރު ނިންމާލައިފިއެވެ.

އުތުރުން ދެކުނަށް ކުރި މި ދަތުރު ދިގުދެމިގެންދިޔައީ މިދިޔަ ސެޕްޓެމްބަރ މަހު 22 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށެވެ. މި ދަތުރުގައި 20 މަންޒިލަށް ދަތުރުކޮށްފައިވާއިރު 4 ރަށެއްގައި މަޑުކޮށްފައިވެއެވެ.

މި ދަތުރު ފެށިގެން ގޮސް ނިމެންދެން ތަޖުރިބާ ލިބިފައިވާ 6 މީހުން ދަތުރުގައި ބައިވެރިވެފައިވެއެވެ. އަދި މި ހަރަކާތް ކުރިއަށް ގެންގޮސްފައިވަނީ ރައްކާތެރިކަމުގެ ގޮތުން އަޅަން ޖެހޭ ހުރިހާ ފިޔަވަޅުތައް އަޅައިގެން، ދަތުރުގެ ސަލާމަތީ ކަންތައްތައް ބެލެހެއްޓުމަށް އެމްއެންޑީއެފުން ހަރަކާތްތެރިވެގެންނެވެ.

ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން މި ހަރަކާތް ހިންގާފައިވާއިރު، އެހެން މަޤްޞަދެއް ވެސް މީގައި އެކުލެވިގެންވެއެވެ. އެގޮތުން ރާއްޖޭގައި ރިކޯޑެއް ހެދުމަކީ އަނެއް އަމާޒު ކަމުގައިވާއިރު، ވަރަށް ބޮޑެތި ގޮންޖެހުންތަކާ ދިމާވެފައިވެއެވެ.