މޯލްޑިވްސް މީޑިއާ ކައުންސިލުން ނޫސްވެރިކަމުގެ އިނާމް ދޭ އުސޫލު ބަދަލުކޮށް ބްރޯޑްކާސްޓިން ކެޓަގަރީ އާއި އޮންލައިން ކެޓަގަރީއަށް ވަކިން އެވޯޑު ދިނުމަށް ގޮވާލައި ގިނަ އަދަދެއްގެ މީޑިއާތަކުން ހުށަހެޅި ޕެޓިޝަން އަމަލު ނުކުރެވޭނެކަމަށް ބުނެ މީޑިއާ ކައުންސިލުން ބޭރުކޮއްލައިފިއެވެ.
މި ޕެޓިޝަންގައި ސޮއިކުރި މީޑިއާތަކުގެ ތެރޭގައި "ވަގުތު"، "މިހާރު"، "އަވަސް"، "ވަން އޮންލައިން"، "ވޮއިސް"، "މޯލްޑިވްސް ބިޒްނަސް ސްޓޭންޑާޑް"، "ފަހު މިނެޓު" ހިމެނެއެވެ. މިފަހަރުގެ އެވޯޑަށް 10 މީޑިއާއަކުން ކުރިމަތިލި އިރު، ޕެޓިޝަންގައި ސޮއިކުރީ އޭގެ ތެރެއިން ހަތް މީޑިއާއެކެވެ.
ހުށަހެޅުނު ޕެޓިޝަންގައި ބުނެފައި ވަނީ މީޑިއާ ކައުންސިލުން ދޭން ތައްޔާރުވަމުން އަންނަ ނޫސްވެރިންގެ އިނާމް ދޭ އުސޫލު ބަދަލުކޮށް އޮންލައިން ނޫސްތަކާއި ބްރޯޑްކާސްޓިން މީޑިއާތަކުން އެވޯޑަށް ހުށަހެޅި ހުށަހެޅުންތައް ފަނޑިޔާރުންގެ ދެ ޕެނަލަކުން ބަލައި ދެ ބާވަތުގެ މީޑިއާތައް އެއްކޮށްލައިގެން އެވޯޑު ދޭން ނިންމާފައިވާ ކަމުގެ މައުލޫމާތު ލިބިފައިވާ ކަމަށެވެ.
އޮންލައިން ނޫސްވެރިކަމާއި ބްރޯޑްކާސްޓިން ނޫސްވެރިކަމަކީ ދުނިޔޭގެ ހުރިހާ ގައުމެއްގައި ވެސް ވަކިވަކިން ދޭ އެވޯޑަކަށްވެފައި އޭގެ ޒާތުގައިވެސް މި ދެ މަސައްކަތަކީ ވަރަށް ތަފާތު ދެ ކަމަކަށްވާތީ އާއި މަސައްކަތް ކުރަން ޖެހޭ ގޮތްވެސް ވަރަށް ތަފާތު ކަމަށްވާތީ އެވޯޑުގައި އެއްއުސޫލަކަށް އިންސާފު ކުރުމަކީ ރަނގަޅު އަދި އެންމެ އިންސާފުވެރި ގޮތް ނޫން ކަމަށާއި އޭގެ ސަބަބުން އެތައް ނޫސްވެރިންގެ ހައްގު ގެއްލުމުގެ ފުރުސަތު އެބައޮތް ކަމަށް މި ޕެޓިޝަންގައި ފާހަގަ ކޮށްފައިވެއެވެ. އަދި މި މައްސަލަ ހައްލުކޮށްފައި ނޫނީ ކުރިއަށް އޮތް އެވޯޑުގެ ކަންތައްތައް ކުރިއަށް ނުގެންދިއުމަށްވެސް ވަނީ މި ޕެޓިޝަންގައި އެދިފައެވެ.
މީޑިއާ ކައުންސިލުން ނޫސްވެރިކަމުގެ އިނާމް ދިނުމަށް ބާއްވާ ހަފްލާ އޮންނާނީ އަންނަ މަހުގެ 11 ވަނަ ދުވަހުއެވެ.
