ސްޕެނިޝް ލީގުގައި އަންގާރަ ދުވަހުގެރޭ ލުއިސް ސުއަރޭޒް ކާމިޔާބުކުރި ދެ ލަނޑާއެކު ގެޓާފޭ ބަލިކޮށް، ތާވަލުގެ އެއްވަނައަށް އެންމެ ފަހުގެ ޗެމްޕިއަން އެތުލެޓިކޯ މެޑްރިޑް ޖެހިލައިފިއެވެ.

ރަށުން ބޭރުގައި ކުޅުނު މެޗުން އެތުލެޓިކޯ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގެ ފަހު މިނެޓުގައި ގެޓާފޭއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ސްޓެފަން މިޓްރޮވިޗެވެ. އެކަމަކު މި މެޗުގައި ގެޓާފޭއަށް މައްސަލަތަކެއް ކުރިމަތިވީ މެޗުގެ 74 ވަނަ މިނެޓުގައި އެ ޓީމުގެ ކާލްސް އަލޭނާއަށް ސީދާ ރަތް ކާޑެއް ދެއްކުމުންނެވެ. ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު އޭނާއަށް ރަތް ކާޑެއް ދެއްކީ އެތުލެޓިކޯގެ މަތެއުސް ކުންޔާއަށް ކުރި ނުރައްކާތެރި ފައުލަކާ ގުޅިގެންނެވެ.

އެއާއެކު ގެޓާފޭގެ އެއް ކުޅުންތެރިއަކު މަދުވުމުގެ ފައިދާ ނަގައި، މެޗުގެ 78 ވަނަ މިނެޓުގައި އެތުލެޓިކޯއިން ވަނީ ނަތީޖާ އެއްވަރުކޮށްފައެވެ. މާރިއޯ ހާމޯސޯ ނަގައިދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ސުއަރޭޒެވެ. އަދި މެޗުގެ އިތުރު ވަގުތުގައި ސުއަރޭޒް ވަނީ މި މެޗުން އެތުލެޓިކޯ މޮޅުކޮށްދިން ލަނޑު ޖަހައިދީފައެވެ.

މި މޮޅާއެކު ތާވަލުގެ އެއްވަނައަށް އެތުލެޓިކޯ ޖެހިލީ ކުޅުނު ހަ މެޗުން ލިބުނު 14 ޕޮއިންޓާއެކުއެވެ. ދެވަނައިގައި އޮތް ރެއާލް މެޑްރިޑަށް ފަސް މެޗުން 13 ޕޮއިންޓް ލިބިފައިވާއިރު، ލީގުގައި ބުދަ ދުވަހުގެރޭ މަޔޯކާއާ ދެކޮޅަށް ކުޅޭ މެޗުން މޮޅުވެގެން ރެއާލަށް އަލުން އެއްވަނައަށް އެރޭނެއެވެ.