ސްޕެނިޝް ލީގުގައި ހޯމަ ދުވަހުގެރޭ ކުޅުނު މެޗުން ގްރަނާޑާ އަތުން ފަހު ވަގުތު ބާސެލޯނާ ބަލިނުވެ ސަލާމަތްވެއްޖެއެވެ.

ބާސާގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގައި ބާސާގެ ފަރާތުން ފެނިގެންގޮސްފައިވަނީ އާދައިގެ ކުޅުމެކެވެ. މި މެޗުގެ ވަރަށް ކުރީކޮޅު ގްރަނާޑާއިން ވަނީ ލީޑު ނަގާފައެވެ. އެގޮތުން މެޗު ފަށައިގެން ދެވަނަ މިނެޓުގައި އޭރިއާ ތެރެއިން ލިބުނު ފުރުސަތަކުން އެ ޓީމަށް ލީޑު ނަގައިދިން ލަނޑު ކާމިޔާބުކޮށްދިނީ ޑޮމިންގޯސް ޑުއާޓޭ އެވެ.

އޭގެ ފަހުން މި މެޗުގައި ނަތީޖާ އެއްވަރުކުރަން ބާސާއިން ގިނަ މަސައްކަތްތަކެއް ކުރިއިރު، އެ ޓީމުން ވަނީ ގްރަނާޑާގެ ގޯލާ އަމާޒުކޮށް ގިނަ ހަމަލާތަކެއް އުފައްދާފައެވެ. އެކަމަކު އެ ހަމަލާތައް ދިފާއުކުރުމުގައި ގްރަނާޑާގެ ގޯލްކީޕަރު ލުއިސް މެކްސިމިއާނޯ ވަނީ މުހިންމު ދައުރެއް އަދާކޮށްފައެވެ. އެކަމަކު މެޗުގެ ފަހު މިނެޓުގައި ރޮނާލްޑް އަރައުހޯ ވަނީ ލަނޑެއް ޖަހައި، ބާސާ މި މެޗުން ސަލާމަތްކޮށްދީފައެވެ.

މި މެޗުން ބާސާ އފަހު ވަގުތު ސަލާމަތްވި ނަމަވެސް، ލީގުގައި މިހާތަނަށް ކުޅުނު ހަތަރު މެޗުންވެސް އެ ޓީމު ބަލިވެފައެއް ނުވެއެވެ. އެއާއެކު ބާސާ އޮތީ ތާވަލުގެ ހަތްވަނައިގައި ކުޅުނު ހަތަރު މެޗުން ލިބުނު އަށް ޕޮއިންޓާއެކުއެވެ.

މި ފަހުން ބާސާގެ ކުޅުން ވަރަށް ބޮޑަށް ދަށްވުމާއެކު، އެ ޓީމުގެ ކޯޗުގެ މަގާމުގައި ހުރި ނެދަލެންޑްސްގެ ރޮނާލްޑް ކޫމަންގެ މުސްތަގުބަލާ މެދު ވަނީ ސުވާލު އުފެދިފައެވެ. ހޯމަ ދުވަހުގެރޭގެ މެޗަށްފަހު ކޫމަން ވަނީ އޭނާގެ ވަޒީފާއާ ގުޅޭ ސުވާލުތަކަށް ދެން ޖަވާބު ދޭން ޖެހޭނީ ކުލަބުގެ ވެރިން ކަމަށް ބުނެފައެވެ.