ފަތުރުވެރިންގެ މެދުގައި މަގުބޫލު އިންޑޮނޭޝިޔާގެ ބާލީ އޮކްޓޯބަރ މަހުގެ ތެރޭގައި ބައެއް ގައުމުތަކުގެ ފަތުރުވެރިންނަށް ހުޅުވާލުމަށް ވިސްނަމުންދާކަމަށް އެގައުމުގެ ސީނިއަރ މިނިސްޓަރ ވިދާޅުވެއްޖެއެވެ.

ކޮވިޑް-19 ގެ ނުރައްކާތެރި ދެ ވަނަ ރާޅަކަށްފަހު އިންޑޮނޭޝިޔާއިން އަންނަނީ އެގައުމުގެ ބޯޑަރު ހުލުވާލާ އާންމު ހާލަތަށް ރުޖޫޢަވުމަށް މަސައްކަތްކުރަމުންނެވެ. ޖުލައި މަހުގެ މެދެއްހާ ހިސާބުގައި އައި ޕީކަށްފަހު މިހާރު ކޭސްތައް ފެންނަ މިންވަރު ވަނީ 94.5 އިންސައްތަ ދަށަށްގޮސްފައެވެ. އަދި އާރުވެލިޔު މިހާރު ވަނީ 1ން ދަށުގައި ކަމަށް އެގައުމުގެ ސީނިއަރ މިނިސްޓަރ ވިދާޅުވިއެވެ.

އެހެންކަމުން މިހާރުގެ ހާލަތަށް ބަލާއިރު ކުރިޔަށް އޮތް އޮކްޓޯބަރ މަހު ބާލީ ހުޅުވާލެވޭނެކަމުގެ ވަރަށް ބޮޑު ޔަގީންކަމެއް އެބައޮތްކަމަށް މިނިސްޓަރ ވިދާޅުވިއެވެ.

އިންޑޮނޭޝިޔާގެ ސަރުކާރުން އެންމެ ފުރަތަމަ ބާލީ ހުޅުވާލާ ގައުމުތަކުގެ ތެރޭގައި ހިމެނެނީ ދެކުނު ކޮރެއާ، ޖަޕާން، ސިންގަޕޯރު އަދި ނިއުޒިލެންޑްކަމަށްވެސް މިނިސްޓަރ ވިދާޅުވިއެވެ. އެއީ އެގައުމުތަކުގައި ކޮވިޑްގެ ކޭސްތައް ފެންނަ މިންވަރު ދަށްވީމަކަމަށް މިނިސްޓަރ ވިދާޅުވިއެވެ.

އިންޑޮނޭޝިޔާގެ ހެލްތު މިނިސްޓަރ މިދިޔަ ހަފްތާގައި ވިދާޅުވެފައިވަނީ އެގައުމުގެ އާބާދީގެ 70 އިންސައްތަ މީހުންނަށް ކޮވިޑް ވެކްސިންގެ ފުރަތަމަ ޑޯޒް ޖެހުމުން އެހެން ފަތުރުވެރިންނަށް އިންޑޮނޭޝިޔާ ހުޅުވާލާނެކަމަށެވެ. 208 މިލިއަން މީހުން ދިރިއުޅެމުން އަންނަ އިންޑޮނޭޝިޔާގެ 21 އިންސައްތަ މީހުން ވަނީ ދެ ޑޯޒް ފުރިހަމަކޮށްފައެވެ. އަދި 40 އިންސައްތަ މީހުން ފުރަތަމަ ޑޯޒް ޖަހާފައިވާކަމަށް އެގައުމުގެ ހެލްތު މިނިސްޓްރީން ބުނެއެވެ.

މެލޭޝިޔާއިން މިދިޔަ ހަފްތާގައި ވަނީ ފަތުރުވެރިންގެ މެދުގައި މަގުބޫލު ބައެއް ތަންތަން އެގައުމުގެ ރައްޔިތުންނަށް ހުޅުވާލާފައެވެ. އަދި ތައިލެންޑުން ވަނީ ޕުކެޓް އާއި ސަމުއި ވެކްސިން ޖަހާފައިވާ ފަތުރުވެރިންނަށް ހުޅުވާލާފައެވެ.

އިންޑޮނޭޝިޔާ އަކީ އޭޝިޔާ ސަރަހައްދުން ކޮވިޑްގެ ހާލަތު އެންމެ ގޯސް އެއް ގައުމެވެ. އެގައުމުގެ 4.1 މިލިއަން މީހުންނަށް ކޮވިޑް ޖެހިފައިވާއިރު 140،000 މީހުން ވަނީ މިބަލީގައި މަރުވެފައެވެ. އެގައުމުގެ ސިއްހީ މާހިރުން ލަފާކުރާ ގޮތުގައި މިއަދަދުތައް މިއަށްވުރެވެސް މަތިވާނެއެވެ.