ރާއްޖޭގައި ކޮވިޑް-19ން ދިފާއުވުމަށް ކުރިޔަށް ގެންދާ ވެކްސިނޭޝަން ޕްރޮގްރާމްގައި އިތުރު 1751 މީހުން ވެކްސިން ޖަހައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ބުރާސްފަތި ދުވަހު ކޮވިޑް ވެކްސިންގެ ފުރަތަމަ ޑޯޒް 359 މީހުން ޖަހާފައިވާކަމަށެވެ. އެއީ މާލެ ސަރަހައްދުން 115 މީހުންނާއި އަތޮޅުތަކުން 244 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 390،644ށް އަރާފައެވެ.

އެޗްޕީއޭއިން ބުނީ ބުރާސްފަތި ދުވަހު ވެކްސިންގެ ދެ ވަނަ ޑޯޒް 1392 މީހުން ޖަހާފައިވާކަމަށެވެ. އެއީ މާލެ ސަރަހައްދުން 546 މީހުން އަދި އަތޮޅުތަކުން 846 މީހުންނެވެ. މިއާއެކު ވެކްސިންގެ ދެ ވަނަ ޑޯޒް ޖެހި މީހުންގެ ޖުމްލަ އަދަދު ވަނީ 330،022ށް އަރާފައެވެ.

ރާއްޖޭގައި ކޮވިޑުން ދިފާއުވުމަށް ވެކްސިން ޖަހަން ފަށާފައިވަނީ ފެބްރުއަރީ މަހުގެ 1 ވަނަ ދުވަހުއެވެ. މާލެ ސަރަހައްދުގައި އުމުރުން 18 އަހަރާ 60 އަހަރާ ދެމެދުގެ މީހުންނަށް ސިނޮފާރމްއާއި އެސްޓްރާޒެނެކާ ވެކްސިން ޖަހަމުން އަންނައިރު، އުމުރުން 12 އަހަރާ 17 އަހަރާ ދެމެދުގެ ކުދިންނަށާއި އެޗްޕީއޭއިން ކަނޑައަޅާފައިވާ ޚާއްސަ ކެޓަގަރީތަކުގެ މީހުންނަށް މިހާރު އަންނަނީ ފައިޒަރ ވެކްސިން ދެމުންނެވެ.

ވެކްސިން ފުރިހަމަނުކޮށް ތިބި ފަރާތްތަކުން ވީއެންމެ އަވަހަކަށް ވެކްސިން ފުރިހަމަ ކުރުމަށް ސަރުކާރުން ވަނީ އިލްތިމާސްކޮށްފައެވެ.