ކޮވިޑް-19ގެ ފަސް ވަނަ ރާޅެއް އިރާނަށް ކުރިމަތިވެފައިވާއިރު އެމެރިކާގެ ޖޯންސަން އެންޑް ޖޯންސަން އިން ކޮވިޑަށް އުފައްދާފައިވާ ވެކްސިން ބޭނުންކުރުމުގެ ހުއްދަ އިރާނުގެ އައު ސަރުކާރުން ދީފިއެވެ.
އިރާނުގެ ސީނިއަރ އޮފިޝަލެއް މިކަން ހާމަކޮށްފައިމިވަނީ އިރާނުގެ ރޫހާނީ ލީޑަރ އާޔަތުﷲ އަލީ ޚާމަނާއީ، އެމެރިކާ އާއި އިނގިރޭސިވިލާތުން އުފައްދާފައިވާ އެއްވެސް ވެކްސިނެއް އިރާނަށް އެތެރެކުރުން މަނާކޮށްފައި އޮންނަތާ 8 މަސް ފަހުންނެވެ. އެހެންނަމަވެސް އިރާނުން ވަނީ ހުޅަނގުގެ ބައެއް ގައުމުތަކުން އެހެން ގައުމުތަކުގައި އުފައްދަމުން އަންނަ ވެކްސިން އެގައުމުގައި ބޭނުންކުރުމުގެ ހުއްދަދީފައެވެ.
އިރާނުގައި ކޮވިޑްގެ ހާލަތު ގޯސްވަމުންދިޔުމާއެކު ވެކްސިނޭޝަން ޕްރޮގްރާމް ފުޅާކުރުމުގެ ޕްރެޝަރ އިރާނުގެ އައު ރައީސް އިބްރާހިމް ރައީސީއަށް ވަނީ ބޮޑުވެފައެވެ.
އިރާނުގެ މީޑިޔާތަކުން އެގައުމުގެ ފުޑް އެންޑް ޑްރަގް އެޑްމިނިސްޓްރޭޝަންގެ ހެޑް މުހައްމަދު ރިޒާ ޝަނެޝާޒް އާ ހަވާލާދީ ރިޕޯޓްކޮށްފައިވާ ގޮތުގައި ކޮވިޑް ވެކްސިންގެ އެއް ޑޯޒް ޖަހަންޖެހޭ ޖޯންސަން އެންޑް ޖޯންސަން ވެކްސިން އިރާނުގައި ޖެހުމުގެ ހުއްދަވަނީ ދީފައެވެ. އެވެކްސިން އުފައްދާ ތަނެއް ހާމަކޮށްފައެއްނުވެއެވެ.
މި އަހަރުގެ ޖެނުއަރީ މަހު އެމެރިކާ އާއި އިނގިރޭސިވިލާތުން ވެކްސިން އެތެރެކުރުން މަނާކަމަށް ޚާމަނާއީ އިއުލާނުކުރެއްވީ އެދެގައުމަށް އިތުބާރު ނުކުރެއްވޭ ކަމަށް ވިދާޅުވެފައެވެ. ޚާމަނާއީ ފަހުން ވިދާޅުވެފައިވަނީ އެތެރެކުރުން މަނާވާނީ އެދެ ގައުމުގައި އުފައްދާ ވެކްސިން ކަމަށެވެ.
ބުރާސްފަތި ދުވަހު ވަނީ ރަޝިޔާގެ ސްޕަޓްނިކް ވެކްސިނަށް ވެސް ހުއްދަދީފައެވެ.
މިއާއެކު އިރާނުގައި ކޮވިޑް ވެކްސިންގެ ގިނަ ގައުމުތަކެއްގެ އުފެއްދުންތަކަށް ހުއްދަދީފައިވާކަމަށް މުހައްމަދު ރިޒާ ވިދާޅުވިއެވެ.
އިރާނުން އަންނަނީ އެގައުމަށް އެތެރެކޮށްފައިވާ ރަޝިޔާގެ ސްޕަޓްނިކްވީ ވެކްސިނާއި އިންޑިޔާގެ ކޮވެކްސިން ވެކްސިން އަދި ރަޝިޔާގެ އާރު ފަރމާއި ދެކުނު ކޮރެއާގެ އެސްޓްރަޒެނެކާ-އެސްކޭބައޯ ގުޅިގެން އުފައްދާފައިވާ އިނގިރޭސިވިލާތުގެ އޮކްސްފޯރޑާއި އެސްޓްރަޒެނިކާ ގުޅިގެން އުފައްދާފައިވާ އެސްޓްރަޒެނިކާ ވެކްސިން އެގައުމުގެ ރައްޔިތުންނަށް ދިނުމުގެ ޕްރޮގްރާމް ހަލުވިކުރުމަށް މަސައްކަތްކުރަމުންނެވެ. މީގެއިތުރުން އިރާނުން އަންނަނީ އެގައުމުގައި އުފައްދާފައިވާ ކޮވިޑް ވެކްސިން ކޮވިއިރާން ބަރަކާތު ވެސް ދެމުންނެވެ.
އިރާނުގެ ހެލްތު މިނިސްޓްރީން ބުނެފައިވަނީ 83 މިލިއަން މީހުން ދިރިއުޅެމުން އަންނަ އިރާނުގެ 13 މިލިއަން މީހުންނަށް ދެ ޑޯޒް ދީފައިވާކަމަށެވެ. އިރާނުގެ ދައުލަތުގެ މީޑިޔާއިން އެގައުމުގެ ހެލްތު މިނިސްޓަރ ބަހްރަމް އިނުﷲ އާ ހަވާލާދީ ރިޕޯޓްކޮށްފައިވާ ގޮތުގައި ފާއިތުވި ހަފްތާގައި އެގައުމުގެ 7.9 މިލިއަން މީހުންނަށް ވަނީ ވެކްސިން ދީފައެވެ.
އިރާނުގައި ކޮވިޑް ޖެހިފައިވާ މީހުންގެ އަދަދު ވަނީ 5،378،408 (ފަސް މިލިއަން ތިން ލައްކަ ހަތްދިހަ އަށް ހާސް ހަތަރު ސަތޭކަ އަށެއް)ށް އަރާފައެވެ. އިރާނަކީ މެދު އިރުމަތީގައި ކޮވިޑްގެ ހާލަތު އެންމެ ގޯސް ސަރަހައްދެވެ. އެގައުމުގައި މިހާތަނަށް ކޮވިޑް ޖެހިގެން 116،072 މީހުން ވަނީ މަރުވެފައެވެ.
