ކުރިއަށް އޮތް ޖެނުއަރީ ޓްރާންސްފާ ބާޒާރުގައި ޗެލްސީއަށް ކުޅެމުން އަންނަ ޖަރުމަނުގެ ފޯވާޑް ޓިމޯ ވާނާ ހޯދުމަށް ބަޔާން މިއުނިކުން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 25 އަހަރުގެ ވާނާގެ ސޮއި ޗެލްސީން ހޯދީ މިދިޔަ އަހަރުގެ ޖޫން މަހުގެ މެދުތެރޭގައެވެ. އެގޮތުން އާރްބީ ލެއިޕްޒީގާއެކު ވާނާ އޭރު ހަދާފައި އޮތް އެއްބަސްވުން އުވާލަން ޗެލްސީން ވަނީ އެ ޓީމަށް 50 މިލިޔަން ޔޫރޯ ދައްކާފައެވެ. ޗެލްސީއާއެކު ވާނާ ހަދާފައިވަނީ ފަސް އަހަރު ދުވަހުގެ އެއްބަސްވުމެއް ހެދިއިރު، ރިޕޯޓުތައް ބުނާ ގޮތުން ވާނާއާށް ޗެލްސީގައި އަހަރަކު 10 މިލިޔަނަށް ވުރެ ގިނަ ޔޫރޯ ލިބޭނެއެވެ.

ޗެލްސީއަށް ބަދަލުވެ ވާނާއަށް އެ ޓީމުގައި އެންމެ އެދެވޭ ކުޅުމެއް ދެއްކިފައެއް ނުވި ނަމަވެސް، ޖަރުމަނުގެ ރިޕޯޓުތައް ބުނާ ގޮތުން ބަޔާނުން މިހާރު އަންނަނީ ޖެނުއަރީގައި ވާނާ ގަންނަން ބިޑްކުރަން ތައްޔާރުވަމުންނެވެ. އަދި ބަޔާނުން ވާނާގެ ސޮއި ހޯދަން މަސައްކަތްކުރަމުން އަންނަނީ އެ ޓީމަށް ކުޅެމުން އަންނަ ތަޖުރިބާކާރު ފޯވާޑް ރޮބަޓް ލެވަންޑޯސްކީ އެ ޓީމު ދޫކޮށްދިޔުމުގެ ފުރުސަތު އޮތުމުން ކަމަށްވެސް ޖަރުމަނުގެ ރިޕޯޓުތައް ބުނެއެވެ.

ބަޔާނުން ވާނާގެ ސޮއި ހޯދަން މަސައްކަތްކުރަމުން އަންނައިރު، ވާނާ ޗެލްސީއަށް ބަދަލުވުމުގެ ކުރިން އޭނާ ހޯދަން މެންޗެސްޓާ ސިޓީ އާއި، އިންޓަ މިލާނާއި، ބާސެލޯނާ އާއި، މެންޗެސްޓާ ޔުނައިޓެޑް އަދި ލިވަޕޫލުންވެސް ވަނީ މަސައްކަތްކޮށްފައެވެ. މީގެ ތެރެއިން ވާނާއަށް އެ ފަހަރު އެންމެ ބޮޑަށް ފާރަލި އެއް ކުލަބަކީ ލިވަޕޫލެވެ.

ޗެލްސީގައި ވާނާއަށް އެންމެ އެދެވޭ ކުޅުމެއް ދެއްކިފައެއް ނުވި ނަމަވެސް، އޭނާ ވަނީ ޗެލްސީއާއެކު ޔުއެފާ ޗެމްޕިއަންސް ލީގާއި ޔުއެފާ ސުޕަ ކަޕް ކާމިޔާބުކޮށްފައެވެ. އަދި ވަނީ އެ ޓީމަށް ކުޅެދުން 56 މެޗުގައި 12 ލަނޑު ޖަހާފައެވެ. އެކަމަކު މި ފަހުން ޗެލްސީން އިތުބާރު ފޯވާޑް ރޮމެލޫ ލުކާކޫގެ ސޮއި ހޯދުމާއެކު، ވާނާއަށް ވަނީ ޗެލްސީގެ ފުރަތަމަ އެގާރައިން ފުރުސަތު ލިބުން މަދުވެފައެވެ.

ޗެލްސީއަށް ބަދަލުވުމުގެ ކުރިން ވާނާ ވިދާލީ ލައިޕްޒީގުންނެވެ. އެގޮތުން އޭނާ ވަނީ ލައިޕްޒީގަށް ކުޅެދިން 159 މެޗުގައި 95 ލަނޑު ޖަހާފައެވެ.