ރ. އަލިފުށީގައި އެއަރޕޯޓް އެޅުމަށް ނިންމުމާ ގުޅިގެން ފާޑު ކިޔާ މީހުންނަށް އެ ދާއިރާގެ ރައްޔިތުންގެ މަޖިލީހުގެ މެންބަރު މުހައްމަދު ރަޝީދު ހުސެއިން (ބިގޭ) ވަރުގަދަ ރައްދެއް ދެއްވައިފިއެވެ.

ބިގޭ ވިދާޅުވީ، ކިތަންމެ ވަރަކަށް ޒާތީ ގޮތުން އިނގިލި ދިއްކުރި ނަމަވެސް އެންމެ ތަންފުކެއް ވެސް ފަހަތަށް ޖެހިވަޑައި ނުގަންނަވާނެ ކަމަށެވެ. ހަވާލުވި ޒިންމާ އަމާނާތްތެރިކަމާއެކު ގެނެސްދެއްވާނެ ކަމަށާއި، 2023 ވަނަ އަހަރު އަލިފުއްޓަށް ވަޑައިގަންނަވާނީ އެއަރޕޯޓުން ކަމަށެވެ. ބިގޭ މިހެން ވިދާޅުވީ، ރައީސުލްޖުމްހޫރިއްޔާ ރ. އަތޮޅަށާއި، ށ. އަތޮޅަށް ކުރައްވާ ދަތުރުފުޅުގެ ތެރެއިން އަލިފުއްޓަށް ވަޑައިގެން އެރަށުގައި ޖޮބްސެންޓަރު ހުޅުއްވައިދެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ބިގޭ ވިދާޅުވީ، އެއަރޕޯޓްގެ މަޝްރޫޢާއެކު ގޮންޖެހުންތަކެއް އެބަހުރި ކަމަށާއި، ޒާތީ ގޮތުން ދިމާކުރުންތައް ވެސް އަމާޒުވާ ކަމަށެވެ. ޚާއްސަކޮށް ރައްޔިތުންގެ މަޖިލީހުގެ މެމްބަރުންގެ ފަރާތުން ފާޑުކިޔުންތައް އަމާޒުވާ ކަމުގައެވެ.

އެއަރޕޯޓް މަޝްރޫއަކީ ބަޖެޓްގައި ނެތް މަޝްރޫއެއް ކަމަށް ވިދާޅުވެ ބައެއް މެމްބަރުން ހަގީގަތާ ޚިލާފު ވާހަކަ ދައްކަވާ ކަމަށް ވިދާޅުވިއެވެ. މެންބަރު ވިދާޅުވީ، އަލިފުށީ ބިން ހިއްކުމުގެ މަޝްރޫއު ބަޖެޓްގައި އޮންނާނެ ކަމަށާއި، އެކި ރަށްރަށުގައި އެއަރޕޯޓް ތަރައްގީކުރުމުގެ މަޝްރޫއަކީ ވެސް ބަޖެޓް ކުރެވިފައިވާ މަޝްރޫޢެއް ކަމަށެވެ. އެހެންކަމުން ބަޖެޓްގައި ނުހިމެނޭ މަޝްރޫޢެއް ކަމަށް ވިދާޅުވުމަކީ ރައްޔިތުންނަށް އޮޅުން އަރާނެ ކަމަށް ކަމަށެވެ.

ބިގޭ ވިދާޅުވީ، ބަޖެޓްގައި ނެތް ކަމެއް ސަރުކާރުން ނުކުރާނެ ކަމަށެވެ. ކޮންމެ ރަށެއްގެ ރައްޔިތުންނަށް ލިބޭ ހިތްހަމަ ޖެހުމަކީ މުޅި ރާއްޖެއަށް ލިބިދޭ ހިތްހަމަ ޖެހުމެއްގެ ގޮތުގައި ބިގޭ ސިފަކުރެއްވިއެވެ. އަދި އަލިފުށީ ރައްޔިތުންނަށްޓަކައި ކޮންމެފަދަ ގުރުބާނީއެއް ވެވަޑައިގަންނަވަން ޖެހުނަސް ތައްޔާރަށް ހުންނެވި ކަމަށް ބިގޭ ވިދާޅުވިއެވެ.

ބިގޭ ވިދާޅުވީ އަލިފުށީގެ ތަރައްގީއަށް ސަރުކާރުން އިސްކަން ދެއްވި ކަމަށާއި، ތަރައްގީގެ މަޝްރޫޢުތައް އެހެން ހަރުފަތަކަށް ގެންގޮސްދެއްވި ކަމަށެވެ.

އަލިފުށީ ޒުވާނުންގެ އުންމީދަކަށްވި، ރަނގަޅު ފެންވަރުގެ ފުޓުބޯޅަ ދަނޑުގެ މަސައްކަތް ވެސް ކުރިއަށްދާ ކަމަށާއި، އެތަނަކީ ބައިނަލްއަގުވާމީ ފެންވަރުގެ މުބާރާތްތައް ބޭއްވޭ ފެންވަރުގެ ދަނޑެއް ކަމަށް ވިދާޅުވިއެވެ.

ޑިޒައިން އެންޑް ބިލްޑް އުސޫލުން ހަވާލުކުރެވުނު ބިން ހިއްކުމާއި، އެއަރޕޯޓް މަޝްރޫޢުގެ ދަށުން ރ. އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްގީކުރުމަށް ހިއްކޭ ބިމެކެވެ. މި މަޝްރޫޢުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތް ވަނީ އެމްޓީސީސީއާ ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއް ވެސް ގާއިމުކުރެވިގެންދާނެއެވެ.

މިއީ 451.61 މިލިއަން ރުފިޔާ ގެ މަޝްރޫޢެކެވެ. މި މަޝްރޫޢުގެ ނިންމުމަށް ހަމަޖެހިފައިވަނީ 750 ދުވަހުގެތެރޭގައެވެ.