ހުމް.. ހުމް.. ހާދަ ބޮޑު ވަޒީރަކާ ވައްތަރެވެ. މިއީ ސޯޝަލް މީޑިއާގައި މިއަދު ދައުރުވަމުންދާ ޗެޓް ލޮގް ތަކުން އަޅުގަނޑަށް ދޭހަވި އެއްޗެކެވެ. މީގައި ޖުމްހޫރީ ޕާޓީގެ ލީޑަރު ގާސިމް އިބްރާހީމަށް ތައުރީފު ކުރައްވައި އެމްޑީޕީގެ މެމްބަރުން ވާހަކަ ދައްކަވާފައިވަނީ ގާސިމް ނޫނީ ދެން ހަމަ ބޮޑުވަޒީރަކާ ވައްތަރު ބޭފުޅަކުވެސް މި ގައުމުގައި ނެތޭ ހީވާ ބީދަޔަކުންނެވެ.
ވާނީވެސް ދެން އެހެން ނޫންތޯއެވެ. ކަމެއް ވަކި ގޮތަކަށް އަނބުރާލަން ގާސިމަކީ ވަރަށްވެސް މުހިއްމު ބޭފުޅެކެވެ. ގާސިމަކީ، ރާއްޖެއަށް މިހާތަނަށް އައި ހުރިހާ ވެރިކަމެއްގައިވެސް މުހިއްމު ދައުރެއް އަދާކުރެއްވި ބޭފުޅެކެވެ. އެމަނިކުފާނު ގުޅި ވަޑައިގަންނާ ކޯލިޝަނަކީ އެއިރެއްގެ އިންތިޚާބު ކާމިޔާބު ކުރައްވާ ކޯލިޝަނެއްކަން އެއީ ފެންނަން އޮތް ހަގީގަތެކެވެ.
ދެން އޮތީ ބޮޑުވަޒީރުކަން ކުރަން ގެންނަން ބޭނުންވާ ނިޒާމެވެ. ބަރުލަމާނީ ނިޒާމެވެ. އެހެންކަމުން ބަރުލަމާނީ ނިޒާމު ގެންނަން އެމްޑީޕީގެ ތެރެއިން ބައެއް ބޭފުޅުން ކުރައްވާ މަސައްކަތުގައި ގާސިމްގެ ތާއީދަކީ ވަރަށް ބޭނުންތެރި އެއްޗަކަށް ވަނީ ވެފައެވެ.
ކޯލިޝަނުގެ ލީޑަރުންގެ ތެރެއިން ބަރުލަމާނީއާ އެންމެ ދެކޮޅަށް ވާހަކަދައްކަވާ ލީޑަރަކީ ގާސިމެވެ. ފާޅުގައި މީޑިއާތަކުގައި އެއީ މޮޔަކަމެއް ކަމަށް ސިފަވާގޮތަށް ވާހަކަ ދައްކަވަން ކެރިވަޑައިގެންނެވި ބޭފުޅަކީވެސް ގާސިމެވެ. އަދި އެއީ ވަކި ބޭފުޅެއްގެ އަމިއްލަ އެދުން އިސްކޮށް ވަކި ބޭފުޅަކަށް ބޮޑުވަޒީރުކަން ދިނުމަށް ކުރާ ކަމެއް ކަމަށް ވިދާޅުވާންވެސް ކެރިވަޑަައިގަތީ ގާސިމަށެވެ.
ގާސިމް މިގޮތަށް ވާހަކަފުޅު ދައްކަވާތީ، މިއަދާ ހަމައަށްވެސް ގާސިމަށް އެންމެ ބޮޑަށް ފާޑު ވިދާޅުވި ބޭފުޅުން މިއަދު ތަބަކަކަށް ލާފައި ގާސިމަށް ބޮޑުވަޒީރުކަން އަރުވައިފިއެވެ. ކޯލިޝަން ސަރުކާރުގެ ތެރެއިން ޖުމްހޫރީ ޕާޓީއަށް ދީފައި އޮތް ސްލޮޓްތަކުގެ ވާހަކަ މި ބޭފުޅުން ނުދައްކަވާ ދުވަހެއް ނުދެއެވެެ. ގާސިމް ފަދަ ބޭފުޅަކު ގޮވައިގެން ސަރުކާރު ހިންގަވާތީ އެކަމާވެސް މި ބޭފުޅުން ނުކިޔުއްވާކަށް އެއްޗެއް ނެތެވެ. ރައީސް ސާލިހު، އެއްފަޅީގައި ގާސިމް އަނެއް ފަޅީގައި އިމްރާން ބަހައްޓައިގެން އެމީހުން ބޭނުންވާހާ ގޮތަކަށް ސަރުކާރު ހިންގަނީ ކަމަށް ބުނެ ރައީސް ސާލިހަށްވެސް ފާޑު ވިދާޅުވީ އިއްޔެ މެންދުރުއެވެ. މިއަދު ހެނދުނު ހޭލި އިރު މުޅިން ރާގު ބަދަލުވެއްޖެއެވެ. ގާސިމް ވަރުގެ ބޭފުޅަކު ގައުމުގައިވެސް ނެތީއެވެ.
ބޮޑުވަޒީރުކަން ކުރަން ގާބިލު އަދި އެކަމަށް ކުފޫ ހަމަވާ ބޭފުޅަކު ގާސިމް ނޫނީ ނެތީއެވެ. ބޮޑުވަޒީރަކާ އެއަށްވުރެ ވައްތަރު ބޭފުޅަކުވެސް ހަމަ ނެތީއެވެ. ނަމުގެ ކުރިއަށް ބޮޑުވަޒީރު ލުމުން އެހާ ފުރިހަމަވެސް ވަނީއެވެ. ދެން ބާކީ އޮތީ ބޮޑުވަޒީރުކަމުގެ ހުވާކުރެއްވުން އެކަންޏެވެ.
އަދި މިހެން އެއްފަހަރު ކޮށްލާ ތައުރީފަކުން އެމަނިކުފާނު ބަދަލުކޮށްލަން ފަސޭހަ ނުވާނެކަން ޖަވާބު ދެއްވި ގޮތުން އެނގެއެވެ. ގާސިމް ވިދާޅުވެފައިވަނީ، ބޮޑުވަޒީރުކަން ކީއްކުރަން ޕިއޯނުކަން ދޭންވެސް އެމްޑީޕީން ބޭނުމެއް ނުވާނެ ކަމަށެވެ. މަޖިލިސް މެމްބަރުން ތިއްބަވާ ވަޓްސްއެޕް ގްރޫޕްގައި ގާސިމަކީ ބޮޑުވަޒީރު ކަމަށް ގާބިލް ބޭފުޅެއް ކަަމަށް ވިދާޅުވީ ބިލެތްދޫ ދާއިރާގެ މެމްބަރު އަހްމަދު ހަލީމެވެ. އަދި މި ރާއްޖެއަށް ގާސިމަށް ކޮށްދެވޭނެ އެންމެ ބޮޑު ކަމަކީ، އަދުލުވެރިކަންމަތީގައި ރައްޔިތުންނަށް އެ މަނިކުފާނުގެ ބޮޑުވަޒީރުކަމުގެ އިންގިލާބީ ބަދަލެއް ގެނެސްދިނުން ކަމުގައި އެ ގްރޫޕްގައި ހަލީމް ވިދާޅުވެފައިވެއެވެ. ހަލީމްގެ ވާހަކައަށް ތާއީދުކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވާހަކަ ދެއްކެވިއެވެ. އެމަނިފާނު ވިދާޅުވީ، ގާސިމަކީ ބޮޑުވަޒީރު ކަަމަށް ވަރަށް ރަނގަޅު ބޭފުޅެއް ކަމަށެވެ. ރައީސް ނަޝީދު މިހެން ވިދާޅުވިއިރު، ރައީސް ނަޝިދުވެސް ހުންނެވީ، ބޮޑުވަޒީރު ކަމަށް ފައިންޕުޅު ނަންގަވައިގެންނެވެ.
މިބޭފުޅުންގެ މި ތައުރީފަށް ގާސިމް ވިދާޅުވީ، މިހާރު ގޯނީގެ މައްޗާ ހިސާބަށް ދެވިއްޖެ ކަމަށެވެ. ދެން ވީ ތުން ބަނދެލަން ކަމަށެވެ. ކޮންމެއަކަސް ކަންތައްވާ ގޮތް ބަލަން ތިބޭނީ ރައްޔިތުންނެވެ. މި ކުރައްވާ ތައުރީފުގެ ހުރި ވަރެއްވެސް އެނގެން އަދި ދުވަސްކޮޅެއް ނަގާނެ ކަމަށް ބެލެވެއެވެ. މިއީ ފެށުމެއް ކަމަށް ބަލަމާ ހިނގާށެވެ.
