ޕާކިސްތާނުގެ ޖަލުތަކުގައި އެކަށީގެންވާ މިންވަރަށްވުރެ އިތުރަށް ގައިދީން ތިބި ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން ޕިޝާވަރުގެ ފަސް ޖަލެއްގައި އެކަށީގެންވާ މިންވަރަށްވުރެ އިތުރަށް ގައިދީން ބަންދުކޮށްފައިވެއެވެ. ޕިޝާވަރު ޖަލަކީ ޕާކިސްތާނުގެ އެންމެ ބޮޑު ޖަލުތަކުގެ ތެރެއިން އެއް ޖަލެވެ. އެ ޖަލުގެ ކެޕޭސިޓީއަކީ 2،820 އެވެ. އެކަމަކު ރިޕޯޓްތައް ބުނާ ގޮތުން އެ ޖަލުގައި މިވަގުތު 3،139 މީހުން ބަންދުގައި އެބަތިއްބެވެ.

ޕާކިސްތާނުގެ އޮފިޝަލަކު ބުނީ ޖަލުތަކުގައި ގައިދީން އިތުރުވެފައިވުމުން އިތުރު ޖަލުތަކެއް ހެދުމުގެ މަސައްކަތް ސަރުކާރުން މިވަގުތު ކުރަމުން އަންނަ ކަމަށެވެ. އަދި މިވަގުތު ޖަލުތަކުގައި ތިބި މީހުންގެ ތެރެއިން ތިން ބައިކުޅަ އެއްބައި މީހުންނަކީ ތަހުގީގަށް ބަންދު ކުރެވިފައިވާ މީހުން ކަމަށެވެ.

ޖަލުތަކުގައި މީހުން އިތުރުވެފައިވާއިރު، ޕާކިސްތާނުގެ ޖަލުތަކުގައި ގައިދީންނާމެދު ލާއިންސާނީ އަމަލު ހިންގާ ކަމުގެ ތުހުމަތުވެސް ވަނީ ކުރެވިފައެވެ. އެގޮތުން ޖަލުތަކުގައި ގައިދީންނަށް އަނިޔާ ކުރުމާއި، ސާފު ނޫން ބޯފެނާއި، ކާތަކެތި ދިނުން އާންމުވެފައިވާ ކަމަށް ރިޕޯޓްތައް ބުނެއެވެ.