ޗައިނާގެ ސްކޫލުތަކުން 6 އަހަރުގެ ކުޑަ ކުދިންނަށް އިމްތިހާނު ދިނުން މަނާކޮށްފިއެވެ.
ޗައިނާގެ އެޑިއުކޭޝަން މިނިސްޓްރީން ބުނީ މާ ގިނައިން އިމްތިހާނު ހަދަން ޖެހުމުން ކުދިންނަށް ބުރަވެ ޕްރެޝަރުތަކާ ކުރިމަތިވާ ކަމަށެވެ. އަދި އެހާ ހަގު އުމުރުގައި ކުދިންނަށް ވިސްނަން ޖެހުމުން ނަފްސާނީ އަދި ޖިސްމާނީ ދުޅަހެޔޮކަމަށް އަސަރުކުރާ ކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
މި އުމުރުގެ ކުދިންނަށް އިމްތިހާނު ނުދިނުމަށް ނިންމާފައިވާއިރު، އެހެން ގްރޭޑްތަކުގެ ކުދިން ހަދަންޖެހޭ އިމްތިހާނު ބޭއްވޭނީ ޓަރމަކު އެއްފަހަރު ކަމަށް ޗައިނާގެ އެޑިއުކޭޝަން މިނިސްޓްރީން ވަނީ ނިންމާފައެވެ. ނަމަވެސް ޖޫނިއަރ ހައި ސްކޫލުގެ މޮކް އިމްތިހާނު ބޭއްވިދާނެކަމަށް އެޑިއުކޭޝަން މިނިސްޓްރީން ބުނެއެވެ.
ޗައިނާއިން ދަނީ ތައުލީމީ ނިޒާމު އިސްލާހު ކުރުމަށް ބޮޑު ބަދަލުތަކެއް ގެނައުމަށް ނިންމާފައެވެ. އެގޮތުން ޖުލައި މަހުން ފެށިގެން ޓިއުޝަން ދޭ އަމިއްލަ ފަރާތްތަކަށް އެކަން ނުކުރެވޭނެ ކަމަށް ވަނީ ނިންމާފައެވެ. އަދި ހަފުތާ ބަންދާއި ޗުއްޓީ ދުވަސްވަރު ޓިއުޝަން ދިނުން ވަނީ މަނާ ކޮށްފައެވެ.
