މި އަހަރުގެ ޖެނެރަލް މެނޭޖަރސް ފޯރަމް ސެޕްޓެމްބަރ މަހުގެ 23 ވަނަ ދުވަހު ބާއްވަން ނިންމައިފިއެވެ.
މިއީ ހޮޓެލިއަރ މޯލްޑިވްސް މަޖައްލާއިން އަހަރަކު އެއްފަހަރު އިންތިޒާމްކުރާ ހަރަކާތެކެވެ. ކޮވިޑްގެ ސަބަބުން މިދިޔަ އަހަރު ޖީ.އެމް ފޯރަމް ބާއްވާފައެއް ނުވެއެވެ. ޖީ.އެމް ފޯރަމް އަމާޒުކޮށްފައިވަނީ ހޮޓެލްތަކުގެ މެނޭޖަރުންނަށެވެ. މި އަހަރުގެ ފޯރަމް އޮންނާނީ ސެޕްޓެމްބަރު މަހު ޕެރަޑައިސް އައިލެންޑް ރިސޯޓުގައެވެ.
މި އިވެންޓް އެންމެ ފުރަތަމަ ބާއްވާފައިވަނީ 2016 ވަނަ އަހަރުއެވެ. މިއަހަރުގެ ފޯރަމްގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް ބައިވެރިވެވަޑައިގަންނަވާނެއެވެ. މީގެއިތުރުން ވެސް ފަތުރުވެރިކަމުގެ ސިނާއަތުގައި ރާއްޖެއާ އަދި ރާއްޖެއިން ބޭރުގެ ތަޖުރިބާކާރު ފަރާތްތަކުން ބައިވެރިވާނެކަމަށް ހޮޓެލިއަރ މޯލްޑިވްސްއިން ބުނެއެވެ.
މިއަހަރުގެ ފޯރަމްގައި ވެސް ކީނޯޓް ސްޕީޗްއާއި ޕެނަލް ޑިސްކަޝަންތައް ކުރިއަށްދާނެއެވެ. ކޮވިޑަށްފަހު އަލަށް ބާއްވާ މި އަހަރުގެ ޖީއެމް ފޯރަމްގައި މި ދާއިރާއަށް ބޭނުންވާ މީހުން ހޯދުމާއި އަދި ރާއްޖެ އިޝްތިހާރުކުރެވޭނެ ގޮތްތަކާ ގުޅޭގޮތުން މަޝްވަރާކުރާނެކަމަށް ހޮޓެލިއަރ މޯލްޑިވްސްއިން ބުނެއެވެ.
