ޗައިނާ ސަރުކާރާ ގުޅިގެން ޕާކިސްތާނުގައި ހިންގަމުން ގެންދާ ބިލިއަން ޑޮލަރުގެ އިންވެސްޓްމެންޓްއެއް ކަމަށްވާ ބެލްޓް އެންޑް ރޯޑް ޕްލޭނާ ދެކޮޅަށް ޕާކިސްތާނު ރައްޔިތުން އިހުތިޖާޖުކުރަން ފަށައިފިއެވެ.
މި ހަފްތާގެ ތެރޭގައި ގަވްދާރުގެ މަގުމައްޗަށް ނުކުމެ، މަސްވެރިންނާއި އާންމު މަސައްކަތްތެރީން ވަނީ އިހުތިޖާޖު ކޮށްފައެވެ. އެގޮތުން މި އިހުތިޖާޖުގައި ބައިވެރިވި މީހުން ވަނީ ސިޓީ ބަންދުކޮށް، ޓަޔަރު އެންދުން ފަދަ ކަންކަން ކޮށްފައެވެ.
މި އިހުތިޖާޖުގެ ބައިވެރިން ވަނީ ގަވްދާރުގެ ޗައިނާއިން ކުރިޔަށް ގެންދާ ޕްރޮޖެކްޓް ކުށްވެރިކޮށްފައެވެ. އަދި ޗައިނާގެ މަސްވެރިން ޕާކިސްތާނުގެ ކަނޑުގެ ސަރަހައްދުން ގަވާއިދާ ހިލާފަށް މަސްވެރިކަން ކުރާ ކަމަށާއި، ޗައިނާއަށް މަސް އެކްސްޕޯޓްކުރުން ޕާކިސްތާނުން ހުއްޓާލަން ޖެހޭ ކަމަށް ވަނީ ބުނެފައެވެ. އަދި ގަވްދާރުގެ ތަރައްގީއަށް ކުރިޔަށް ގެންދާ ޕްރޮޖެކްޓްތައް ޗައިނާގެ ކުންފުނިތަކާ ހަވާލުނުކުރުމަށް ވަނީ ގޮވާލާފައެވެ.
މި އިހުތިޖާޖުގައި ބައިވެރިވި މީހަކު ޖާނުން ފިދާވެގެން ޗައިނާގެ ބަޔަކަށް ދިން ހަމަލާގައި ދެ ކުޑަކުދިން ވަނީ މަރުވެފައެވެ. ޕާކިސްތާނުގެ ސަރުކާރުގެ އޮފިޝަލަކު ވަނީ މި ޖާނުން ފިދާވެ ދިން ހަމަލާގައި ދެ ކުދިން މަރުވެފައިވާ ކަން ކަށަވަރު ކޮށްދީފައެވެ. އޮފިޝަލު ވިދާޅުވީ ދެ ކުޑަ ކުދިން މަރުވެފައިވާއިރު، އެ ހަމަލާގައި ޗައިނާގެ އިންޖިނިއަރަކު ޒަހަމްވެފައިވާ ކަމަށާއި، އަދި އޭނާގެ ހާލު ސީރިއަސް ކަމަށެވެ.
ގަވްދާރުގެ އާންމުން އިހުތިޖާޖު ކުރަން ފަށާފައިވާއިރު، މިދިޔަ ހަފްތާގައި ގަވްދާރުގެ ޕޯޓަށް ކަރަންޓު ދިނުމަށް އީރާނުގެ އެހީ ހޯދުމަށް ޕާކިސްތާނުން ވަނީ ނިންމާފައެވެ. ޕާކިސްތާނުން ބުނީ ގަވްދާރުގެ ޕޯޓަށް ކަރަންޓް ދިނުމަށް އީރާނުގެ އެހީ ހޯދަން ނިންމީ ޗައިނާ ސަރުކާރާ ވާހަކަ ދެއްކުމަށްފަހު މަސްލަހަތަށް އެންމެ ރަނގަޅު ގޮތަކީ އެއީ ކަމަށް ފެންނާތީ ކަމަށެވެ.
