އަފްޣާނިސްތާނުގެ ކޮންޓްރޯލް ހޯދާފައިވާ ތާލިބާނުންނާއެކު މަސައްކަތް ކުރަން ޖެހިއްޖެ ހާލަތެއްގައި އެގޮތަށް މަސައްކަތްކުރައްވާނެ ކަމަށް އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވެއްޖެއެވެ.

ނޫސްވެރިންނާ ވާހަކަދައްކަވަމުން ބޮރިސް ޖޯންސަން ވަނީ އަފްޣާނިސްތާނުގެ ހާލަތު ބަލަމުން އަންނަ އިނގިރޭސި ފޮރިން މިނިސްޓަރ ދިފާއުކުރައްވާ ވާހަކަދައްކަވާފައެވެ.

"އަހަރެން ދޭން ބޭނުންވާ ޔަގީންކަމަކީ އަހަރުމެންގެ ސިޔާސީ އަދި ޑިޕްލޮމެޓިކް މަސައްކަތްތައް ހުރީ އަފްޣާނިސްތާނުގެ މައްސަލައަށް ހައްލެއް ހޯދުމަށް ކަމަށް. އެއީ ތާލިބާނުންނާ ގުޅިގެން އެކަން ކުރަން ޖެހިއްޖެނަމަ އެމީހުންނާ ގުޅިގެން އެކަން ކުރުން." ޖޯންސަން ވިދާޅުވިއެވެ.

އޭނާ އިތުރަށް ވިދާޅުވީ ކާބުލް އެއަރޕޯޓްގެ ހާލަތު މިހާރު ކުރިޔަށްވުރެ ރަނގަޅު ކަމަށެވެ. ތާލިބާނުން އަފްޣާނިސްތާނުގެ ކޮންޓްރޯލް ހޯދުމާއެކު އެތައް ހާސް ބަޔަކު ވަނީ ކާބުލްގެ އެއަރޕޯޓަށް ޖަމާވެ އަފްޣާނިސްތާން ދޫކޮށް ދިޔުމަށް މަސައްކަތްކޮށްފައެވެ. އެކަމުގެ ތެރޭގައި ބައެއް މީހުން މަރުވެފައިވެސްވެއެވެ.

އިނގިރޭސި ސަރުކާރުން ބުނެފައިވަނީ ހޮނިހިރު ދުވަހުން ފެށިގެން މިހާތަނަށް 1615 މީހުން އަފްޣާނިސްތާނުން ބާލުވާފައިވާކަމަށެވެ. އޭގެތެރޭގައި އިނގިރޭސިވިލާތުގެ 399 މީހުންނާއި އެމީހުންނާއި ގުޅުންހުރި މީހުން ހިމެނެއެއެވެ. އެމްބަސީގެ 320 ސްޓާފުން އަދި 402 އަފްޣާން ރައްޔިތުން މީގެތެރޭގައި ހިމެނެއެވެ.

އަފްޣާނިސްތާނުގެ ކަންކަން ބަލަހައްޓަމުން ގެންދާ ގޮތާއި ގުޅިގެން އިނގިރޭސި ފޮރިން ސެކެޓްރީ ޑޮމިނިކް ރާބުގެ އިސްތިއުފާއަށް އިނގިރޭސިވިލާތުގެ އިދިކޮޅުން ގޮވާލާފައިވާއިރު ބޮޑުވަޒީރު ޖޯންސަން ވިދާޅުވެފައިވަނީ ޚާރިޖީ ވަޒީރާމެދު ފުރިހަމަ އިތުބާރު އޮތްކަމަށެވެ.