މޯލްޑިވްސް މީޑިއާ ކައުންސިލުން ދޭ ނޫސްވެރިކަމުގެ އިނާމު ދިނުން އަންނަ އޮކްޓޯބަރ މަހު 11 ގައި އޮންނާނެކަމަށް އެކައުންސިލުން ބުނެފިއެވެ.
މީޑިއާ ކައުންސިލުން ބުނީ 2020 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ހަފްލާ މި އަހަރު ބާއްވާނީ 11 އޮކްޓޯބަރ ގައި ކަމަށެވެ. 2020 ވަނަ އަހަރުގެ ނޫސްވެރިކަމުގެ އިނާމު ދިނުމަށް 12 ދާއިރާއަކުން ވަނީ ހުޅުވާލާފައެވެ. މީޑިޔާ ކައުންސިލުން ބުނީ ހުށަހެޅުންތައް ލިބިފައި ވަނީ އޭގެ ތެރެއިން 10 ދާއިރާއަކަށް ކަމަށެވެ.
މީޑިއާ ކައުންސިލުން ބުނީ މިއަހަރުގެ ނޫސްވެރިކަމުގެ އިނާމަށް 10 ދާއިރާއަކުން ޖުމްލަ 87 ހުށަހެޅުން ލިބިފައިވާ ކަމަށެވެ. އެއީ:
ތަހުގީގީ ނޫސްވެރިކަން (އިންވެސްޓިގޭޓިވް ޖާނަލިޒަމް) ދާއިރާ - 9 ހުށަހެޅުން
ދެމެހެއްޓިނިވި ތަރައްގީ އާއި އިޖުތިމާއީ ދާއިރާ - 21 ހުށަހެޅުން
ސިޔާސީ ދާއިރާ - 9 ހުށަހެޅުން
ޝަރުއީ އަދި ގާނޫނީ ދާއިރާ - 6 ހުށަހެޅުން
ވިޔަފާރިއާއި އިގުތިސާދީ ދާއިރާ - 9 ހުށަހެޅުން
ކުޅިވަރު ދާއިރާ - 5 ހުށަހެޅުން
ފޮޓޯ ޖާނަލިޒަމް ދާއިރާ - 6 ހުށަހެޅުން
ވީޑިއޯ ޖާނަލިޒަމް ދާއިރާ - 3 ހުށަހެޅުން
ފީޗަރ/ރިޕޯޓް ދާއިރާ - 17 ހުށަހެޅުން
އެންމެ އުއްމީދީ ނޫސްވެރިޔާގެ އިނާމު - 2 ހުށަހެޅުން މިއެވެ.
މިއަހަރު އަލަށް ތައާރަފްކުރި ދެ ދާއިރާ ކަމަށްވާ އޯޑިއޯ ޖަރނަލިޒަމް އަދި ނިއުސް ގްރެފިކްސް އެންޑް އިލެސްޓްރޭޝަންސްގެ ދާއިރާއިން އެއްވެސް ހުށަހެޅުމެއް ލިބިފައިނުވާއިރު ފީޗަރ ރިޕޯޓް ދާއިރާއަށް 17 ހުށަހެޅުން އަދި އުންމީދީ ނޫސްވެރިޔާގެ އިނާމަށް 2 ހުށަހެޅުން ހުށަހަޅާފައިވެއެވެ.
އެހެން އަހަރުތަކާ ޚިލާފަށް މިއަހަރު އިނާމަށް ހުޅުވާލާފައިވާ އިޖުތިމާއީ، ސިޔާސީ، ޝަރުއީ އަދި ގާނޫނީ، ވިޔަފާރި އާއި އިގުތިސާދު، ކުޅިވަރު އަދި ފީޗާރ ރިޕޯޓު ކެޓަގަރީން ކުރިމަތިލާނަމަ އެ ކެޓަގަރީއަކުން މަދުވެގެން 12 ފީޗަރ ހުށަހަޅަންޖެހެއެވެ. އަދި އިނާމަށް ނޮމިނޭޓްކުރަން ބޭނުންވާ ތިން ހުށަހެޅުމެއް އޭގެ ތެރެއިން ފާހަގަކުރަން ޖެހެއެވެ.
މީޑިއާ ކައުންސިލުން ވަނީ މިއީ މިހާތަނަށް ނޫސްވެރިކަމުގެ އިނާމަށް އެންމެ ބޮޑު ތަރުހީބެއް ލިބުނު އަދި އެންމެ ގިނަ ހުށަހެޅުން ލިބުނު އަހަރުކަން ފާހަގަކޮށްފައެވެ.
