ބިދޭސީ މަސައްކަތްތެރީންގެ މައްސަލައިގެ ވާހަކައަކީ އަބަދުވެސް އިވޭ ވާހަކައެކެވެ. މިއީން ޒަމާނަކުވެސް ދިވެހީންގެ ހިތަށް ނުގެނެވޭވަރަށް ބިދޭސީ މަސައްކަތްތެރީންވަނީ އިތުރުވެފައެވެ. ޔަގީނުންވެސް މިއީ ކޮންމެވެސް ބަޔެއްގެ އިހުމާލުން ވެފައިވާ ކަމެކެވެ.
ބިދޭސީންގެ ވާހަކަ އާންމުވެފައިވަނީ ކީއްވެގެން ހެއްޔެވެ؟ މި ސުވާލު ކޮށްލަ ކޮށްލާ ތިބެވޭކަށް ނެތެވެ. ކަންމަތީ ފިހާރައިގެ ސޭޓުން ފެށިގެން ގޮސް މަތީ މަގާމުތަކުގައިވެސް ބިދޭސީންނެވެ. ރާއްޖޭގެ ބޯހިމެނުން ދައްކާ ގޮތުން އެންމެ ގިނައީ ބަންގްލަދޭޝް މީހުންނެވެ.
އެއް ބަޔަކު ބިދޭސީންގެ މައްސަލަ ގައުމީ ސަލާމަތަށް އޮތް ނުރައްކަލެއްގެ ގޮތުގައި ސިފަ ކުރާއިރު، އަނެއްބަޔަކު ސިފަ ކުރަނީ ދިވެހި ޒުވާނުންނަށް ވަޒީފާ ހޯދުމުގައި ދައްޗެއްގެ ގޮތުގައެވެ.
މި ބަހުސް ކުރުމުގެ މާނައެއް ނެތް ކަމަށް ބުނާ މީހުންވެސް ގިނައެވެ. ސަބަބަކީ ބިދޭސީ މަސައްކަތްތެރީންނަކީ ދިވެހީންގެ ގެނައި ބައެއް ކަމުގައި ވުމެވެ.
ފެންނަން އޮތް ހަގީގަތަކީ ގަވާއިދާ ޚިލާފަށް އުޅޭ ބިދޭސީންގެ އަދަދު ވެސް އިތުރު ކަމެވެ. ގައުމުގެ އިގްތިސާދުން އެތައް މިލިއަން ޑޮލަރެއް ކޮންމެ އަހަރަކުވެސް ބިދޭސީން ބޭރުކުރުމެވެ. އަދި ޑޮލަރުގެ ވަގު ވިޔަފާރީގައިވެސް އެންމެ ބޮޑަށް ހަރަކާތްތެރިވަމުން އަންނަނީ ބިދޭސީންކަމެވެ.
މީގެ އިތުރުން ބިދޭސީންގެ ސަބަބުން ދިވެހި ސަގާފަތް ނެތި ދާން ފަށައިފިއޭވެސް ބުނެވިދާނެއެވެ. އޭގެ ހެއްކަކީ ދިވެހީންގެ ލޭ ނާރު ކަމަށްވާ މަސްވެރިކަމުން ފެށިގެން ގޮސް ދަނޑުވެރިކަމުގައިވެސް ބިދޭސީން ހަރަކާތްތެރިވާ އަދަދު ދުވަހެއް ދުވަހަކަށް އިތުރުވަމުން ދިއުމެވެ.
މާރާމާރީގެ މައްސަލަތަކުން ފެށިގެން ގޮސް މަސްރުވާތަކެތީގެ މައްސަލަތަކުގައި ހައްޔަރު ކުރެވޭ ބިދޭސީންގެ އަދަދު ވެސް އިތުރުވަމުން އަންނަ ކަމަށް މޯލްޑިވްސް ޕޮލިސް ސާވިސްއިން ބުނެއެވެ.
މުޅި މައްސަލައަށް ހައްލެއް ހޯދަން މީގެ ކުރީގެ ސަރުކާރުންތަކުން މި ސަރުކާރުން މަސައްކަތްކުރާ ވަރަށް ކުރި ތަނެއް ނުފެނެއެވެ. ގަވާއިދާ ޚިލާފަށް އުޅޭ ބިދޭސީން ގަވާއިދުގެ ތެރެއަށް ފައްތަން އިކޮނޮމިކް މިނިސްޓްރީން ވަނީ މަސައްކަތްތަކެއް ފަށާފައެވެ. މުޅި މައްސަލައަށް ހައްލެއް ގެނައުމުގެ މަސައްކަތްވެސް އެބަކުރެއެވެ. މިހެން ބުންޏަސް މިއީ ފަސޭހައިން ހައްލެއް ހޯދޭނެ މައްސަލައެއް ނޫނެވެ. ޒަމާންތަކެއް ވަންދެން ފެއިލްކޮށްލާފައި އޮތް ނިޒާމެއް އަލުން ކޮޅަށް ޖެހޭނީ ލައްކަ މަސައްކަތުންނެވެ. ނަތީޖާ ނެރެވޭނީ އެންމެން އެކަތިގަނޑަކަށް ވެގެންނެވެ.
